பொருளாதார நெருக்கடியை வென்று மீண்டும் நாட்டில் அபிவிருத்தி போரை ஆரம்பிக்க அரசாங்கம் தயாராக உள்ளது – அமைச்சர் பிரசன்ன தெரிவிப்பு!
Friday, October 7th, 2022
நாடு பொருளாதார நெருக்கடியை எதிர்கொண்டுள்ள போதிலும், வசதியான வீடுகள் மற்றும் உரிமைப் பத்திரம் வழங்கும் வேலைத்திட்டம் தொடர்ந்தும் நடைமுறைப்படுத்தப்படுமென நகர அபிவிருத்தி மற்றும் வீடமைப்பு அமைச்சின் செயலாளர் பிரதீப் ரத்நாயக்க தெரிவித்துள்ளார்.
நகர அபிவிருத்தி மற்றும் வீடமைப்பு அமைச்சர் பிரசன்ன ரணதுங்கவின் ஆலோசனையின் பேரில், எதிர்வரும் இரண்டு வருடங்களுக்குள் 30,000 வீட்டு உரிமைப் பத்திரங்களை வழங்கும் வேலைத்திட்டம் ஏற்கனவே ஆரம்பிக்கப்பட்டுள்ளதாகவும் அவர் குறிப்பிட்டுள்ளார்.
நகர அபிவிருத்தி மற்றும் வீடமைப்பு அமைச்சுக்கு சொந்தமான நிறுவனங்களின் முன்னேற்றம் குறித்து அறிவிக்கும் செய்தியாளர் மாநாட்டில் அவர் இந்த கருத்துக்களை வெளியிட்டார்.
“நாட்டில் அண்மைக்காலமாக ஏற்பட்ட பொருளாதார நெருக்கடியால், வீடுகள் கட்டுவதில் பின்னடைவு ஏற்பட்டது. ஆனால் பொருளாதார நெருக்கடியை வென்று மீண்டும் நாட்டில் அபிவிருத்தி போரை ஆரம்பிக்க அரசாங்கம் தயாராக உள்ளது.
அதற்கேற்ப, வீட்டுத் திட்டங்களை மீண்டும் தொடங்க நடவடிக்கை எடுத்து வருகிறோம். கொழும்பு நகரில் வீடற்ற மக்களின் வீட்டுப் பிரச்சினையைத் தீர்க்க சுமார் இரண்டு இலட்சம் அடுக்குமாடி குடியிருப்புகள் கட்டப்பட வேண்டும். எந்த நெருக்கடி வந்தாலும் அந்த இலக்கை அடைய அமைச்சு ஏற்கனவே சில திட்டங்களை செயல்படுத்தியுள்ளது.
மேலும், திறைசேரியின் பணத்தில் சுமார் 260 நகர அபிவிருத்தி திட்டங்கள் ஆரம்பிக்கப்பட்டுள்ளதுடன் மேலும் ஐந்து வேலைத்திட்டங்கள் நகர அபிவிருத்தி அதிகார சபையின் நிதியில் ஆரம்பிக்கப்பட்டுள்ளன.
நகர்ப்புற மேம்பாடு மற்றும் வீட்டுவசதி அமைச்சும், மேம்பாட்டு அனுமதிகளின் ஒப்புதலை விரைவுபடுத்துவதற்காக One-Stop Unit, OSU என்ற சேவைப் பிரிவை அறிமுகப்படுத்த திட்டமிடப்பட்டுள்ளது.
வளர்ச்சி அனுமதிகளை அங்கீகரிக்கும் அனைத்து நிறுவனங்களையும் சேர்த்து, இந்த சேவைப்பிரிவு நிறுவப்படவுள்ளது.
வளர்ச்சி அனுமதிகளை அங்கீகரிக்க எடுக்கும் நேரத்தை குறைத்து, எளிமையாக்குவதன் மூலம், அதிக முதலீட்டை ஈர்க்க முடியுமென நம்புகிறோம். வெளிநாடுகளிலுள்ள இலங்கையருக்கும் தொழிலாளர்களுக்கும் வீடுகளை டொலர்களுக்கு விற்பனை செய்யும் வேலைத்திட்டத்தின் கீழ், ஏற்கனவே ஒரு வீடு 40,000 டொலர்களுக்கு விற்பனை செய்யப்பட்டுள்ளது.
வெளிநாடுகளில் வாழும் இலங்கையருக்கு மேலதிகமாக, வீடுகளை கொள்வனவு செய்ய வெளிநாட்டவர்களிடமிருந்தும் பல கோரிக்கைகள் வந்துள்ளன.
அதற்கமைய, இந்த ஆண்டு இறுதிக்குள் டொலர்களுக்கு வீடுகளை விற்பனை செய்யும் இலக்கை எளிதில் எட்டிவிடுவோம். மேலும், குறைந்த வருமானம் பெறும் 25,000 வீடுகளுக்கு சூரிய சக்தி மூலம் மின்சாரம் வழங்கும் திட்டத்துக்கு அமைச்சரவை தற்போது ஒப்புதல் அளித்துள்ளது.
இது, 500 மெகாவாட் புதுப்பிக்கத்தக்க எரிசக்தியை தேசிய கட்டத்திற்கு சேர்க்கும் என எதிர்பார்க்கப்படுகிறது” என அவர் மேலும் தெரிவித்துள்ளார்.
Related posts:
|
|
|
