அமரர் சௌமியமூர்த்தி தொண்டமான் பெயர் நீக்கம் கவலைதரும் விடயம்!

ஹற்றன், தொண்டமான் தொழிற்பயிற்சி நிலையத்திலிருந்து தொண்டமான் அவர்களது பெயர் நீக்கஞ் செய்யப்பட்டமையானது வேதனைதருகின்ற விடயமாகவுள்ளதாக நாடாளுமன்ற உறுப்பினர் டக்ளஸ் தேவானந்தா அவர்கள் தெரிவித்துள்ளார்.

இவ்விடயம் தொடர்பில் கருத்து தெரிவிக்கும்போது அவர் மேலும் கூறுகையில், மலையக மக்களின் வாழ்வுரிமை போராட்டம் முதற்கொண்டு அம் மக்களின் பல்வேறு உரிமைகள் சார்ந்த போராட்டங்களை முன்னெடுத்தவர்களில் அமரர் சௌமியமூர்த்தி தொண்டமான் அவர்கள் முக்கியமானவர். அத்தகையப் போராட்டங்களில் வெற்றியும் கண்டவர். தாம் பிரதிநிதித்துவப்படுத்திய மக்களுக்காக இறுதிவரை அயராது உழைத்த பெருமை அவரைச் சாரும்.

அரசியல் மற்றும் தொழிற்சங்க செயற்பாடுகளுக்கு அப்பாலும் அவர் இன்றும் அனைத்து சமூக மக்களாலும் மதிக்கப்படுகின்றார்.

எனவே, அவரது பெயர் நீக்க விடயமானது பெரிதும் கவலையளிப்பதாக உள்ளது. இது குறித்து பொறுப்பு கூற வேண்டிய தரப்பினர் மீள் பரிசீலனை செய்து, அவரது பெயரை மீள சூட்டுவதே  மிகவும் பொருத்தமாகும்.

அந்தவகையில் சம்பந்தப்பட்ட அனைத்துத் தரப்பினருடனும் தான் கலந்துரையாட விரும்புவதாக டக்ளஸ் தேவானந்தா அவர்கள் தெரிவித்திருப்பது குறிப்பிடத்தக்கது.