இந்தியாவுக்கும் இலங்கைக்கும் இடையிலான உறவில் விரிசலை ஏற்படுத்த சீனா ஒருபோதும் முற்படவில்லை – ஜனாதிபதி ரணில் விக்ரமசிங்க தெரிவிப்பு!
Saturday, February 10th, 2024
இந்தியாவுக்கும் இலங்கைக்கும் இடையிலான உறவில் விரிசலை ஏற்படுத்த சீனா ஒருபோதும் முற்படவில்லை என ஜனாதிபதி ரணில் விக்ரமசிங்க தெரிவித்துள்ளார்.
மேலும், பொருளாதார நெருக்கடிக்கு மத்தியில் தனது நாட்டிற்கு வழங்கிய பொருளாதார ஆதரவுக்காகவும் அவர் இந்தியாவுக்கு நன்றி தெரிவித்துள்ளார்.
இதேவேளை பொருளாதார நெருக்கடியின் போது இந்தியா சுமார் 4 பில்லியன் அமெரிக்க டொலர்களை நாட்டிற்கு வழங்கியது என்று ஜனாதிபதி சுட்டிக்காட்டினார்.
பேர்த் நகரில் நடைபெறும் 7 ஆவது இந்து சமுத்திர மாநாட்டில் கலந்து கொள்வதற்காக ஜனாதிபதி ரணில் விக்ரமசிங்க அவுஸ்திரேலியா சென்றுள்ளார்.
இதன்போது வியோன் (WION) செய்திச் சேவைக்கு வழங்கிய விசேட செவ்வியிலேயே ஜனாதிபதி இதனைக் கூறியுள்ளார்.
இலங்கைக்கான சீனக் கப்பல்களின் விஜயம் மற்றும் மாலைதீவு ஜனாதிபதி முய்சுவின் இந்தியக் கொள்கை உள்ளிட்ட ஏனைய விடயங்கள் தொடர்பிலும் ஜனாதிபதி உரையாற்றினார்.
இதன்போது அவர் மேலும் கூறுகையில் – உண்மையில் இந்திய-இலங்கை உறவுகள் மேம்பட்டு வருகின்றன, இன்று நாம் நெருங்கிய பொருளாதார உறவுகளையும் இரு நாடுகளுக்கும் இடையிலான தொடர்பை மேம்படுத்துவதை நோக்கமாகக் கொண்டுள்ளோம். அதுதான் வழி என்று நினைக்கிறேன்.
பொருளாதார நெருக்கடியின் போது இந்தியா எமக்கு பாரிய உதவிகளை வழங்கியது. இந்தியா இல்லாமல் நாங்கள் உயிர் பிழைத்திருக்க முடியாது.
அதனால் தான் இரு நாடுகளுக்கும் இடையிலான நெருக்கமான உறவுகளை நாங்கள் பார்க்கிறோம்.
மேலும் நாங்கள் கடன் மறுசீரமைப்பை முன்னெடுத்துச் சென்றுள்ளோம், நாங்கள் அதை நிறைவு செய்துள்ளோம், நாங்கள் உத்தியோகபூர்வ கடனாளிகள் குழுவுடன் (Official Creditors Committee) உடன் ஒப்பந்தம் செய்ய வேண்டும். கொள்கையளவில், நாங்கள் என்ன செய்தோம் என்பதை அவர்கள் ஒப்புக்கொண்டனர்.
முறையான பகுதி இப்போது நடைபெறுகிறது மற்றும் அதிகாரப்பூர்வ கடன் வழங்குநர் குழுவுடனான முறையான ஒப்பந்தத்திற்குப் பிறகு, கடன் வழங்கிய நாடுகள் மற்றும் பிற நிதி அமைப்புகளுடன் முறையான ஒப்பந்தங்களுக்கு வர வேண்டும்.
அத்துடன்: பிராந்திய பாதுகாப்புக்கு வரும்போது, சீனக் கப்பல்களின் வருகை குறித்து இந்தியா கவலை கொண்டுள்ளது, இலங்கை அரசாங்கத்தால் சீனக் கப்பல்களின் வருகையை அனுமதிக்கக் கூடாது என்று சில முடிவுகள் எடுக்கப்பட்டுள்ளன என்று நான் நம்புகிறேன்.
இந்நிலையில் நாம் இந்தியாவிடம் கூறுவது என்னவென்றால், நாங்கள் இந்திய பாதுகாப்பை மனதில் வைத்துள்ளோம், இந்திய பாதுகாப்புக்கு தீங்கு விளைவிக்கும் எதையும் நாங்கள் அனுமதிக்க மாட்டோம், இவை அனைத்தும் ஹைட்ரோகிராஃபிக் கப்பல்கள். அதனால் அவற்றை அங்கு வர அனுமதித்தோம். இந்த ஆண்டு, இலங்கைக்கான திறனைக் கட்டியெழுப்புவது என்று நாங்கள் முடிவு செய்தோம்.
எனவே இப்போது மற்றவர்களுடன் ஒத்துழைப்பதன் மூலம் இலங்கையின் சொந்த நீரியல் திறனைக் கட்டியெழுப்புவதில் கவனம் செலுத்துகிறோம்.
இதனிடையே இந்தியாவுக்கும் இலங்கைக்கும் இடையே எப்படியாவது ஒரு பிளவை உருவாக்க சீனா முயற்சிக்கிறதா என குறித்த ஊடகவியலாளர் கேட்டபோது –
இலங்கைக்கு சீனக் கப்பல்கள் காலங்காலமாக வந்து கொண்டிருக்கின்றன. இந்தியாவுக்கும் இலங்கைக்கும் இடையில் விரிசலை ஏற்படுத்த சீனா ஒருபோதும் முயற்சிக்கவில்லை, இந்தியாவுடன் நாம் இணக்கமாக இருக்க வேண்டும் என்று அவர்கள் எப்போதும் கூறுகின்றனர்.
எங்களைப் பொறுத்த வரையில் எந்தப் பிரச்சினையும் இருந்ததில்லை. வரும் கப்பல்களின் எண்ணிக்கை கூடவில்லை, குறையவில்லை. ஆனால், இதற்கு முன் வராத மற்ற நாடுகளின் கப்பல்களையும் வரவழைத்து வருகிறோம்.
ஜப்பான், இந்தியா, பாகிஸ்தான் நாடு கப்பல்கள் இலங்கைக்கு வந்துகொண்டிருக்கின்றன. ஏனைய பல ஐரோப்பிய நாடுகளை இலங்கைக்கு வருமாறு கேட்டுள்ளோம் என்றார்.
மேலும் இந்த செவ்வியில் எழுப்பப்பட்ட கேள்விகளுக்கு பதிலளித்த ஜனாதிபதி, இலங்கையில் இந்திய ரூபாவின் பயன்பாடு இன்னும் ஆரம்பிக்கப்படவில்லை. அவற்றை இலங்கையில் பயன்படுத்துவதற்கு எந்த சிக்கலும் இல்லை, இந்த பயன்பாடானது சுற்றுலத் துறைக்கு உதவும் என்றார்.
அத்துடன், இந்திய சுற்றுலா பயணிகளின் வருகையானது இலங்கையின் பொருளாதாரத்துக்கு பெரிதும் உதவியுள்ளது.
இந்தியா எங்களுக்கு நிதி உதவி செய்துள்ளது, ஆனால் இலங்கையில் இந்திய முதலீடுகளை எதிர்பார்க்கின்றோம். மேலும் புதிய கட்டமாக சென்னை ஐஐடி இலங்கையில் ஒரு வளாகத்தை கண்டியில் நிறுவ முடிவெடுத்துள்ளது.
இதற்காக அமைச்சர்கள் குழுவொன்று இந்தியாவிற்கு விஜயம் செய்துள்ளது, தற்போது நாம் இடங்களை அடையாளம் காணும் பணியில் ஈடுபட்டுள்ளோம். ஆனால் தற்போதுள்ள சில கட்டிடங்களை எடுத்து அடுத்த ஆண்டு இந்த திட்டத்தை தொடங்க விரும்புகிறோம்.
தமிழக மீனவர்களின் அத்துமீறிய மீன்பிடி நடவடிக்கையானது பெரும் பிரச்சினையாக உள்ளது. இந்த ஆண்டின் நிறைவுக்குள் குறித்த பிரச்சினைக்கு தீர்வுகாண முயல்கிறோம் என்றும் அவர் தெரிவித்துள்ளமை குறிப்பிடத்தக்கது
00
Related posts:
|
|
|
