போக்குவரத்து நெரிசல் முதல் வைத்தியசாலை வசதிகள் வரை யாழ். நகரை மறுசீரமைக்க வேண்டும் – பேராசிரியர் சுரேந்திரகுமாரன் வலியுறுத்து!

Monday, October 26th, 2026


…….
யாழ்ப்பாண நகரில் அதிகரித்துவரும் போக்குவரத்து நெரிசல், வைத்தியசாலைகளில் நிலவும் உட்கட்டமைப்புக் குறைபாடுகள், பேரிடர்களை எதிர்கொள்வதற்கான தயார்நிலையின்மை உள்ளிட்ட பல்வேறு பிரச்சினைகளுக்குத் தீர்வுகாணும் வகையில், நகரை முறையான திட்டமிடலுடன் மறுசீரமைக்க நடவடிக்கை எடுக்கப்பட வேண்டும் என யாழ்ப்பாணப் பல்கலைக்கழக மருத்துவப் பீடத்தின் பீடாதிபதியும் சமுதாய மருத்துவத் துறைப் பேராசிரியருமான சுரேந்திரகுமாரன் வலியுறுத்தியுள்ளார்.

யாழ். ஊடக அமையத்தில் (26.10.2026) நடைபெற்ற ஊடகவியலாளர் சந்திப்பில் கருத்துத் தெரிவிக்கும்போதே அவர் இதனைத் தெரிவித்தார்.

இதன்போது அவர் மேலும் கூறுகையில் –

யாழ்ப்பாண நகரத்தை ஆரோக்கியமான நகரமாக மாற்றும் நோக்கில், ஆரோக்கிய நகரம் என்ற செயற்திட்டம் 2019ஆம் ஆண்டு முதல் முன்னெடுக்கப்பட்டு வருகின்றது.

யாழ்ப்பாணப் பல்கலைக்கழக மருத்துவ பீடம், யாழ்ப்பாண மாநகரசபை, மாவட்ட செயலகம் மற்றும் ஆளுநர் அலுவலகம் ஆகியன இணைந்து இத்திட்டத்தில் செயற்பட்டு வருகின்றன.

எனினும், நகரை ஆரோக்கியமான பிராந்தியமாக மாற்றுவதற்குப் பல்வேறு ஆலோசனைகள் முன்வைக்கப்பட்டுள்ளபோதிலும், அவற்றை நடைமுறைப்படுத்துவதற்கான தீர்க்கமான முடிவுகளும் செயற்பாடுகளும் இன்னும் முழுமையாக முன்னெடுக்கப்படவில்லை எனவும் பேராசிரியர் சுட்டிக்காட்டினார்.

மேலும் தீர்வின்றித் தொடரும் போக்குவரத்து நெரிசல்
யாழ்ப்பாண நகரில் போக்குவரத்து நெரிசலைக் குறைப்பதற்காக அமைக்கப்பட்ட தொலைதூரப் பேருந்து நிலையம் பல ஆண்டுகள் கடந்தும் முழுமையாகப் பயன்பாட்டுக்கு வரவில்லை.

வெளி மாவட்டங்களிலிருந்து வரும் வாகனங்கள் ஒதுக்கப்பட்ட இடங்களில் தரித்து நிற்காமை, புகையிரத நிலையங்கள் பொதுப் போக்குவரத்துடன் முறையாக இணைக்கப்படாமை போன்றவை நகரின் போக்குவரத்து முகாமைத்துவத்தில் காணப்படும் முக்கிய குறைபாடுகளாக உள்ளன.

தொலைதூரப் பேருந்துகள் நகர மையத்துக்குள் நுழைவதைக் கட்டுப்படுத்துவதுடன், நகருக்கு வெளியே அமைந்துள்ள வர்த்தக நிலையங்கள் மற்றும் வாகனத் தரிப்பிட வசதிகளை முறையாகப் பயன்படுத்துவதற்கும் நடவடிக்கை எடுக்க வேண்டும் என அவர் வலியுறுத்தினார்.

இதேநேரம் 1995ஆம் ஆண்டுக்குப் பின்னர் நகருக்குள் அலுவலகங்களுக்குச் சென்று வரும் மக்களின் போக்குவரத்துத் தேவைகளைக் கருத்திற்கொண்டு, முன்னர் நடைமுறையில் இருந்த உள்நாட்டுப் போக்குவரத்து மற்றும் சுற்றுவட்டப் போக்குவரத்து முறைகளை நவீன தேவைகளுக்கு ஏற்ப மீண்டும் அறிமுகப்படுத்த வேண்டியதன் அவசியத்தையும் அவர் எடுத்துரைத்தார்.

மேலும் யாழ்ப்பாணப் பல்கலைக்கழக மருத்துவப் பீடத்தின் கீழ் நீண்ட காலத்திற்குப் பின்னர் எட்டு மாடிக் கட்டடம் அமைக்கப்பட்டுள்ளதுடன், இலங்கையில் முதன்முறையாகப் பகல்நேரச் சிகிச்சைச் சேவையும் அறிமுகப்படுத்தப்பட்டுள்ளதாகப் பேராசிரியர் தெரிவித்தார்.

இருப்பினும், மரபணு ஆய்வுக்கூடங்களை விரிவுபடுத்துதல், நோயாளர்களைத் துரிதமாக வைத்தியசாலைக்குக் கொண்டுவந்து இறக்குதல், அவசர ஊர்திகள் தடையின்றிச் சென்று வருதல் உள்ளிட்ட தேவைகளுக்குப் போதுமான உட்கட்டமைப்பு வசதிகள் இல்லை என அவர் சுட்டிக்காட்டினார்.

வெளிநாடுகளில் உள்ள வைத்தியசாலைகளில் காணப்படுவதைப் போன்று, அவசர சிகிச்சைப் பிரிவுகள், நோயாளர்களை இறக்கும் இடங்கள் மற்றும் வாகனத் தரிப்பிடங்கள் ஆகியவற்றை முறையாகத் திட்டமிட்டு அமைக்க வேண்டும்.

இதன்மூலம் நோயாளர்களுக்குத் தாமதமின்றிச் சிகிச்சை வழங்குவதை உறுதிப்படுத்த முடியும் என்றும் அவர் குறிப்பிட்டார்.

மறுபுறம் யாழ்ப்பாண நகரம் அதிக நெருக்கடியான பகுதியாகக் காணப்படுவதால், பகல் வேளையில் எதிர்பாராத விபத்துகள் அல்லது பேரிடர்கள் ஏற்படும்போது அவற்றைச் சமாளிப்பதற்கான ஏற்பாடுகள் குறித்து கவனம் செலுத்த வேண்டியுள்ளது.

குறிப்பாக, தீயணைப்புப் பிரிவு உள்ளிட்ட அவசரகாலக் கட்டமைப்புகள் போதுமான வசதிகளுடன் தயார்நிலையில் உள்ளனவா என்பதை ஆராய்ந்து, அவற்றை மேம்படுத்த நடவடிக்கை எடுக்க வேண்டும் எனப் பேராசிரியர் வலியுறுத்தினார்.

மேலும், நகரின் கால்வாய்கள் மற்றும் வடிகான்களை முறையாகப் பராமரிப்பதன் மூலம் டெங்கு, சிக்குன்குனியா போன்ற நோய்களின் பரவலைக் கட்டுப்படுத்த முடியும் என்றும் அவர் தெரிவித்தார்.

ஆரோக்கிய நகரத் திட்டத்தை ஒருங்கிணைப்பதற்காக யாழ்ப்பாணப் பல்கலைக்கழக மருத்துவப் பீடத்தில் பிரத்யேக அலுவலகம் அமைக்கப்பட்டுள்ளதாகவும், நவீன தொழில்நுட்ப அறிவைப் பயன்படுத்தி நகரை மேம்படுத்துவதற்கான முயற்சிகள் முன்னெடுக்கப்படுவதாகவும் அவர் தெரிவித்தார்.

தமிழர்களின் நீண்டகால இருப்பின் அடையாளமாக விளங்கும் யாழ்ப்பாண நகரத்தை ஆரோக்கியமானதும், முறையான உட்கட்டமைப்பு வசதிகளைக் கொண்டதுமான நகரமாக மாற்றுவதற்குப் பொதுமக்கள், அரச நிறுவனங்கள் மற்றும் அனைத்துத் துறையினரும் ஒன்றிணைந்து செயற்பட வேண்டும் எனப் பேராசிரியர் சுரேந்திரகுமாரன் வலியுறுத்தினார்.

0000

000



Fatal error: Uncaught Error: Call to undefined function get_related_posts_thumbnails() in /home/dayadiya/public_html/epdpnews.com/wp-content/themes/epdp 2020/content.php:106 Stack trace: #0 /home/dayadiya/public_html/epdpnews.com/wp-includes/template.php(878): require() #1 /home/dayadiya/public_html/epdpnews.com/wp-includes/template.php(811): load_template('/home/dayadiya/...', false, Array) #2 /home/dayadiya/public_html/epdpnews.com/wp-includes/general-template.php(206): locate_template(Array, true, false, Array) #3 /home/dayadiya/public_html/epdpnews.com/wp-content/themes/epdp 2020/single.php(20): get_template_part('content', '') #4 /home/dayadiya/public_html/epdpnews.com/wp-includes/template-loader.php(113): include('/home/dayadiya/...') #5 /home/dayadiya/public_html/epdpnews.com/wp-blog-header.php(19): require_once('/home/dayadiya/...') #6 /home/dayadiya/public_html/epdpnews.com/index.php(17): require('/home/dayadiya/...') #7 {main} thrown in /home/dayadiya/public_html/epdpnews.com/wp-content/themes/epdp 2020/content.php on line 106