வேலணை மத்திய கல்லூரி அருகே விசமிகளால் தீ மூட்டல் – மைதானத்தின் பெருமளவு தாவரங்கள் எரிந்து நாசம்!

…..
வேலணை மத்திய கல்லூரி மைதானத்தின் கிழக்குப் பகுதியில் விசமிகளால் திட்டமிட்டு தீ மூட்டப்பட்டதில், அப்பகுதியில் காணப்பட்ட நிழல்தரும் மரங்கள், புற்றரைகள் உள்ளிட்ட தாவரங்கள் தீக்கிரையாகியுள்ளன.

வேலணைப் பிரதேசத்தில் கடந்த சில மாதங்களாக வயல்கள், புற்றரைகள், பனங்கூடல்கள் உள்ளிட்ட பல நூறு ஏக்கர் நிலப்பரப்புகள் விசமிகளால் தொடர்ச்சியாக தீ மூட்டப்பட்டு அழிக்கப்பட்டு வருகின்றன.

இதனால் அப்பகுதியின் சுற்றுச்சூழல் மட்டுமன்றி, பறவைகள், கால்நடைகள் உள்ளிட்ட பல்வேறு உயிரினங்களும் பாதிக்கப்பட்டு வருகின்றன.

விசமிகளால் திட்டமிட்டு மேற்கொள்ளப்படும் இந்த தீ மூட்டல் சம்பவங்களைத் தடுப்பதற்காக வேலணை பிரதேச சபையினால் பல்வேறு நடவடிக்கைகள் முன்னெடுக்கப்பட்டு வருகின்றன.

குறிப்பாக கடந்த மாதம் இடம்பெற்ற தீ மூட்டல் சம்பவம் தொடர்பில் ஒருவர் கைது செய்யப்பட்டு பொலிஸாரிடம் ஒப்படைக்கப்பட்டிருந்தார்.

இந்நிலையில், இன்று வேலணை மத்திய கல்லூரி மைதானத்திற்கு அருகில் மூட்டப்பட்ட தீ, காற்றின் காரணமாக வேகமாகப் பரவி, மைதானத்தின் கிழக்குப் பகுதியை பெருமளவில் பாதித்தது.

சம்பவம் தொடர்பில் பாடசாலை சமூகத்தால் வேலணை பிரதேச சபைக்கு அறிவிக்கப்பட்டதைத் தொடர்ந்து, சபையின் நீர் பவுசர் சம்பவ இடத்திற்கு அனுப்பி வைக்கப்பட்டது.

மேலும், தனியார் ஒருவரின் நீர் பவுசரும் வரவழைக்கப்பட்டு, இரண்டு பவுசர்கள் மூலம் நீர் பாய்ச்சி தீ கட்டுப்பாட்டுக்குள் கொண்டுவரப்பட்டது.

தொடர்ச்சியாக இடம்பெறும் இவ்வாறான திட்டமிட்ட தீ மூட்டல்களைத் தடுத்து, சுற்றுச்சூழலையும் அப்பகுதியில் வாழும் உயிரினங்களையும் பாதுகாக்க உரிய தரப்பினர் கடுமையான நடவடிக்கை எடுக்க வேண்டும் என பிரதேச மக்கள் கோரிக்கை விடுத்துள்ளனர்.

000