மன்னாரில் மனித உரிமைகள் தொடர்பில் சிவில் சமூக கலந்துரையாடல்!

…….
மன்னார் மாவட்டத்தில் மனித உரிமைகள் தொடர்பாக நிலவும் பிரச்சினைகள், சவால்கள் மற்றும் முறைப்பாடுகளுக்குத் தீர்வு காண்பது தொடர்பில் சிவில் சமூக அமைப்புகளுக்கும் இலங்கை மனித உரிமைகள் ஆணைக்குழுவின் அதிகாரிகளுக்கும் இடையிலான முக்கிய கலந்துரையாடல் ஒன்று நடைபெற்றது.

மன்னார் மாவட்ட செயலகத்தில் இலங்கை மனித உரிமைகள் ஆணைக்குழுவின் தேசிய ஆணையாளர்கள், பிராந்திய அலுவலக அதிகாரிகள் மற்றும் மன்னார் மாவட்டத்திற்குப் பொறுப்பான அதிகாரிகளின் ஏற்பாட்டில் இந்தக் கலந்துரையாடல் இடம்பெற்றது.

இதில் சிவில் சமூக அமைப்புகள், பொது அமைப்புகள், மனித உரிமை செயற்பாட்டாளர்கள், கிராம மட்ட அமைப்புகள் மற்றும் பல்வேறு சமூக அமைப்புகளின் பிரதிநிதிகள் கலந்துகொண்டனர்.

கலந்துரையாடலின்போது, மன்னார் மாவட்டத்தில் கடந்த காலங்களில் மனித உரிமைகள் தொடர்பாக எதிர்கொள்ளப்பட்ட பிரச்சினைகள், குறைபாடுகள் மற்றும் அவற்றுக்குத் தீர்வு காண்பதில் ஏற்பட்டுள்ள நடைமுறைச் சிக்கல்கள் தொடர்பில் பல்வேறு விடயங்கள் ஆணைக்குழுவின் கவனத்திற்கு கொண்டு வரப்பட்டன.

குறிப்பாக, அடிப்படை மனித உரிமை மீறல்கள், காணி மற்றும் வாழ்வாதார உரிமைகள் தொடர்பான பிரச்சினைகள், பாதிக்கப்பட்ட மக்களுக்கு நீதி கிடைப்பதில் காணப்படும் தாமதங்கள், நீண்டகாலமாக நிலுவையில் உள்ள முறைப்பாடுகள் மற்றும் அவற்றின் விசாரணைகளில் ஏற்படும் காலதாமதங்கள் குறித்து சிவில் சமூக பிரதிநிதிகள் விரிவாக எடுத்துரைத்தனர்.

அத்துடன், மனித உரிமைகள் தொடர்பான முறைப்பாடுகளைத் தீர்ப்பதற்கான தற்போதைய நடைமுறைகள், நிலுவையில் உள்ள முறைப்பாடுகளின் நிலை, விசாரணைகளை விரைவுபடுத்துவதற்கான நடவடிக்கைகள் மற்றும் எதிர்காலத்தில் மன்னார் மாவட்டத்தில் மனித உரிமைகள் பாதுகாப்பை மேலும் வலுப்படுத்துவதற்கான திட்டங்கள் குறித்தும் அதிகாரிகளிடம் கேள்விகள் முன்வைக்கப்பட்டன.

மனித உரிமைகளைப் பாதுகாப்பதற்கும், பாதிக்கப்பட்ட மக்களுக்கு உரிய தீர்வுகளை பெற்றுக்கொடுப்பதற்கும் இலங்கை மனித உரிமைகள் ஆணைக்குழுவின் பிராந்திய மட்டச் செயற்பாடுகளை மேலும் வலுப்படுத்த வேண்டியதன் அவசியமும் வலியுறுத்தப்பட்டது.

மேலும், நீண்டகாலமாக நிலுவையில் உள்ள முறைப்பாடுகளுக்கு விரைவான நடவடிக்கை எடுப்பதுடன், பாதிக்கப்பட்ட மக்களின் உரிமைகளை உறுதி செய்வதற்கான பயனுள்ள நடவடிக்கைகள் முன்னெடுக்கப்பட வேண்டும் எனவும் சிவில் சமூக பிரதிநிதிகள் கோரிக்கை விடுத்தனர்.

மன்னார் மாவட்டத்தில் மனித உரிமைகள் தொடர்பான பிரச்சினைகளுக்கு நிலையான தீர்வுகளை ஏற்படுத்துவதற்கும், சிவில் சமூக அமைப்புகளுக்கும் இலங்கை மனித உரிமைகள் ஆணைக்குழுவுக்கும் இடையிலான தொடர்ச்சியான கலந்துரையாடல் மற்றும் ஒத்துழைப்பை வலுப்படுத்துவதற்கும் இந்தச் சந்திப்பு முக்கியத்துவம் வாய்ந்ததாக அமைந்தது.
000