வர்த்தகப் பேச்சுவார்த்தையை விரைந்து முடிக்க பிரதமர் மார்க் கார்னி முனைப்பு!

கனடா மற்றும் இந்தியாவுக்கு இடையிலான சுதந்திர வர்த்தகப் பேச்சுவார்த்தைகள் சிறந்த முன்னேற்றத்தை அடைந்துள்ளதாகவும், எதிர்வரும் டிசம்பர் மாத நடுப்பகுதியில் நடைபெறவுள்ள ஜி20 மாநாட்டிற்குள் இப்பேச்சுவார்த்தைகளை முழுமையாக நிறைவு செய்ய இரு நாடுகளும் இலக்கு நிர்ணயித்துள்ளதாகவும் கனடா பிரதமர் மார்க் கார்னி தெரிவித்துள்ளார்.

அதேநேரம், இந்தியப் பிரதமர் நரேந்திர மோடி குறித்த காலப்பகுதியில் கனடாவிற்கு உத்தியோகபூர்வ விஜயமொன்றை மேற்கொள்வார் என இந்தியா உறுதிப்படுத்தியுள்ளதாகத் தெரிவித்த அவர், விஜயத்திற்கான சரியான திகதி இதுவரை இறுதி செய்யப்படவில்லை எனவும் குறிப்பிட்டுள்ளார்.

ஐக்கிய நாடுகள் பொதுச் சபைக் கூட்டத்தொடரின் பக்கவாட்டில் செவ்வாய்க்கிழமை நடைபெற்ற ஊடகவியலாளர் மாநாட்டில் உரையாற்றிய கனடா பிரதமர், இந்திய பிரதமருடனான சந்திப்பை ஆவலுடன் எதிர்பார்ப்பதாகக் கூறினார்.

அமெரிக்காவின் மியாமியில் உள்ள ட்ரம்ப் நஷனல் டோராலில் டிசம்பர் 14 மற்றும் 15 ஆகிய திகதிகளில் நடைபெறவுள்ள ஜி20 உச்சி மாநாட்டிற்குள் இருதரப்பு விரிவான வர்த்தக உடன்படிக்கையை முடிவுக்குக் கொண்டுவர தாமும் இந்தியப் பிரதமர் மோடியும் அர்ப்பணிப்புடன் செயற்பட்டு வருவதாக அவர் சுட்டிக்காட்டினார்.