தொழில்நுட்ப அத்துமீறல்!” – நடுவர் முடிவுகளுக்கு எதிராக ஃபிபாவிடம் புகார் அளித்தது குரோஷியா!
Wednesday, July 8th, 2026
2026 உலகக்கோப்பைத் தொடரின் ரவுண்ட் ஆஃப் 32 (Round of 32) நாக்-அவுட் சுற்றில் போர்ச்சுகல் அணியிடம் 2-1 என்ற கணக்கில் தோற்று வெளியேறிய குரோஷிய கால்பந்து கூட்டமைப்பு (HNS), இப்போட்டியில் எடுக்கப்பட்ட சர்ச்சைக்கிரிய நடுவர் முடிவுகளுக்கு எதிராக ஃபிபா (FIFA) தலைவர் ஜியானி இன்ஃபான்டினோவிடம் அதிகாரப்பூர்வமாகப் புகார் கடிதம் அளித்துள்ளது.
மைதானத்தில் நடுவர்கள் எடுத்த முடிவுகளை விட, அதற்குப் பயன்படுத்தப்பட்ட தொழில்நுட்ப முறை ஆட்டத்தின் ஆன்மாவைச் சிதைக்கும் வகையில் “அத்துமீறி” பயன்படுத்தப்பட்டுள்ளது என குரோஷியா குற்றம் சாட்டியுள்ளது.
போட்டியின் கூடுதல் நேரத்தில் (Stoppage Time) குரோஷியாவின் ஜோஷ்கோ கிவார்டியோல் அடித்த சமன் செய்யும் கோல் ஆரம்பத்தில் நடுவரால் ஏற்றுக்கொள்ளப்பட்டது.
ஆனால், நீண்ட ‘VAR’ ஆய்வுக்குப் பிறகு அது ஆஃப்சைடு (Offside) என மறுக்கப்பட்டது.
சாதாரண டிவியின் ரீப்ளேயில் அது சரியான கோல் போலத் தெரிந்தாலும், உலகக்கோப்பை கால்பந்தான ‘Trionda ball’-க்குள் இருக்கும் சென்சார் தொழில்நுட்பம், குரோஷிய வீரர் இகோர் மடானோவிச்சின் முடியில் பந்து மிக நுண்ணிய அளவில் உரசியதைக் காட்டியது. இதனால் ஆஃப்சைடு என அறிவிக்கப்பட்டது.
ரசிகர்களாலும் வீரர்களாலும் வெறும் கண்ணால் பார்க்க முடியாத இத்தகைய நுண்ணிய தரவுகளைப் பயன்படுத்தி கோலை மறுப்பது “தொழில்நுட்பத்தின் தவறான பயன்பாடு” என குரோஷியா கூறுகிறது.
போட்டியின் 68-வது நிமிடத்தில் கிறிஸ்டியானோ ரொனால்டோ பெனால்டி மூலம் கோலடிக்க ஏதுவாக போர்ச்சுகலுக்கு வழங்கப்பட்ட பெனால்டி வாய்ப்பின் போதும் ‘VAR’ விதிமுறைகள் தவறாகக் கையாளப்பட்டதாகக் குரோஷியா சாடியுள்ளது.
“கால்பந்தில் தொழில்நுட்பத்தை நாங்கள் வரவேற்கிறோம். ஆனால், இந்த ஆட்டத்தில் ‘VAR’ பயன்படுத்தப்பட்ட விதம் ஃபிபா, அணிகள் அல்லது ரசிகர்கள் என யாருக்குமே நல்லதல்ல.
ஆட்டத்தின் போக்கை மாற்றிய இந்த முடிவுகள் குறித்து ஃபிபாவிடம் இருந்து விரிவான விளக்கத்தைக் கோரியுள்ளோம்.” என டொமிஸ்லாவ் பாக் (குரோஷிய கால்பந்து கூட்டமைப்பின் செய்தித் தொடர்பாளர்) கூறியுள்ளார்.
இப்போட்டியின் கேப்டன் லூகா மோட்ரிச்சும், பெரிய அணிகளுக்குச் சாதகமாக தொழில்நுட்ப விதிகள் வளைக்கப்படுவதாகத் தனது கடுமையான அதிருப்தியை வெளிப்படுத்தியுள்ளார்.
000
Related posts:
|
|
|
