எரிபொருள் விற்பனையால்  கிடைக்கும் இலாபம் மிகக் குறைவு –   பெட்ரோலிய விநியோகஸ்தர்கள் சங்கம்!

இலங்கை பெட்ரோலியக் கூட்டுத்தாபனத்தின் (CPC) எரிபொருள் நிரப்பும் நிலையங்களில் ஒக்டேன் 95 பெட்ரோல் மற்றும் சுப்பர் டீசல் ஆகியவற்றை விற்பனை செய்வதன் மூலம் கிடைக்கும் இலாபம் மிகக் குறைவாகவே உள்ளதாக பெட்ரோலிய விநியோகஸ்தர்கள் சங்கம் தெரிவித்துள்ளது.

இந்த இரண்டு வகை எரிபொருள்களினதும் தினசரி விற்பனை 500 லீற்றருக்கும் குறைவாக இருப்பதால், ஒரு கையிருப்பை விற்று முடிக்க இரண்டு வாரங்களுக்கு மேல் ஆகிறது என்றும், இதனால் கிடைக்கும் சுமார் 45,000 ரூபா இலாபத் தொகை ஊழியர்களின் சம்பளத்தைக் கொடுக்கக் கூடப் போதுமானதாக இல்லை என்றும் அந்தச் சங்கம் சுட்டிக்காட்டுகிறது.

இருப்பினும், வெளிநாட்டு எரிபொருள் நிறுவனங்கள் (LIOC, Sinopec) அதிகபட்ச சில்லறை விலையில் 3 சதவீத தள்ளுபடியை விநியோகஸ்தர்களுக்கு வழங்கி வருவதாகவும், இது கூட்டுத்தாபனம் வழங்கும் சதவீதத்தை விட இரண்டு மடங்குக்கும் அதிகம் என்றும் சங்கம் குறிப்பிடுகிறது.

இதன் காரணமாக, கொழும்புக்கு வெளியே உள்ள பல கூட்டுத்தாபன எரிபொருள் நிலையங்களில் இந்த இரண்டு வகை எரிபொருள்களும் தற்காப்புக்காகக் கொள்வனவு செய்யப்படுவதில்லை எனவும், இதனால் நவீன வாகனங்களைப் பயன்படுத்தும் நுகர்வோர் பெரும் சிரமங்களை எதிர்கொண்டுள்ளதாகவும் சங்கம் வலியுறுத்தியுள்ளது.
000