வாக்காளர் அட்டை இல்லாவிட்டாலும் வாக்களிக்க முடியும் – தேர்தல்கள் ஆணைக்குழு அறிவிப்பு!

வாக்காளர் அட்டை இல்லாவிட்டாலும் தேர்தல் ஆணைக்குழுவால் அறிவிக்கப்பட்டுள்ள உறுதிப்படுத்தும் ஆவணங்களின் ஊடாக வாக்காளர்கள் வாக்களிக்க முடியும் என தேர்தல்கள் ஆணைக்குழுவின் தலைவர் ஆர்.எம்.ஏ.எல்.ரத்நாயக்க தெரிவித்தார்.

பொதுத் தேர்தல் தொடர்பில் விளக்கமளிக்கும் விசேட காணொளியொன்றை வெள்ளிக்கிழமை வெளியிட்டே அவர் இவ்வாறு கூறினார். இந்த காணொளியில் அவர் மேலும் வலியுறுத்தியதாவது,

”தபால் மூல வாக்களிப்பும், வாக்கு சீட்டு விநியோகமும் நிறைவடைந்துள்ளன. வாக்கு சீட்டுக்கள் கிடைக்கப் பெறாதவர்கள் அருகிலுள்ள தபால் நிலையங்களுக்குச் சென்று அவற்றை பெற்றுக்கொள்ள முடியும்.

பிரசார நடவடிக்கைகள் நாளை 11ஆம் திகதி நள்ளிரவுடன் நிறைவடையவுள்ளன. 12, 13ஆம் திகதிகள் அமைதி காலமாகும். இக்காலப்பகுதியில் பிரசாரங்களை முன்னெடுக்க தடைவிதிக்கப்பட்டுள்ளது.

பொதுத் தேர்தலில் இருவகையான வாக்குசீட்டுக்கள் வழங்கப்படவுள்ளன. பொலன்னறுவை, மொனராகலை, கேகாலை மாவட்டங்களுக்கு ஒரே நிரலிலான வாக்கு சீட்டுக்களும், ஏனைய 19 தேர்தல் மாவட்டங்களுக்கும் இரு நிரல்களைக் கொண்ட வாக்கு சீட்டுக்களும் வழங்கப்படும்.

வாக்காளர் ஒருவர் வாக்களிக்கும் போது தாம் தெரிவு செய்யும் கட்சி சின்னத்துக்கு அல்லது சுயாதீன குழுவுக்கு அருகில் புள்ளடியிட வேண்டும். புள்ளடியிடப்படாத வாக்குசீட்டுக்கள் நிராகரிக்கப்படும்.

அதன் பின்னர் தமது விருப்பத் தெரிவான வேட்பாளரது இலக்கத்துக்கு புள்ளடியிட வேண்டும். ஒரு வாக்களருக்கு மூன்று விருப்பத் தெரிவுகள் உள்ளன. தெரிவுசெய்யும் மூன்று வேட்பாளர்களது எண்களுக்கும் மேலாக புள்ளடியை பதிவிட வேண்டும். இதற்கு அப்பால் தவறான முறையில் வாக்களிப்பவர்களது வாக்குகள் நிராகரிக்கப்படும்.

வாக்காளர் அட்டைகள் கிடைக்கப் பெறாதவர்கள் தமது தேசிய அடையாள அட்டையை பயன்படுத்தி வாக்களிக்க முடியும். தேசிய அடையாள அட்டை, செல்லுப்படியாகும் கடவுச்சீட்டு, செல்லுப்படியாகும் சாரதி அனுமதி பத்திரம், அரச சேவையில் ஓய்வுபெற்றவர்களுக்கான அடையாள அட்டை, முதியோர் அடையாள அட்டை, பதிவாளர் திணைக்களத்தால் வழங்கப்பட்டுள்ள மத குருமார்களுக்கான அடையாள அட்டை, பதிவாளர் திணைக்களத்தால் வழங்கப்பட்டுள்ள புகைப்படத்துடான கடிதம், விசேட தேவையுடையோருக்காக தேர்தல்கள் ஆணைக்குழுவால் வழங்கப்பட்டுள்ள அடையாள அட்டை ஆகியவற்றை பயன்படுத்தி வாக்களிக்க முடியும்.

இந்த அடையாள அட்டைகள் அல்லது உறுதிப்படுத்தும் ஆவணங்கள் இல்லாதவர்கள் தேர்தல் அலுவலகத்தால் வழங்கப்பட்டுள்ள தற்காலிக அடையாள அட்டையை பயன்படுத்தி வாக்களிக்க முடியும். அடையாளத்தை உறுதிப்படுத்த முடியாத எந்தவொரு ஆவணத்தை செல்லுப்படியாகும் ஆவணமாக பயன்படுத்த முடியாது.

தேர்தல் நடவடிக்கைகளுக்காக அமைக்கப்பட்டுள்ள அனைத்து தற்காலிக தேர்தல் அலுவலகங்களும் அகற்றப்பட வேண்டும்.” என்றார்.

000