Home English Tamil
     
   
 
 மாவட்ட விவசாயத்துறையை மேம்படுத்தும் பொருட்டு யாழிற்கு வருகை தந்த குழுவினருடன் அமைச்சர் மற்றும் ஆளுனர் சந்திப்பு
 17.04.2014 - வியாழக்கிழமை

யாழ் மாவட்டத்தில் நவீன தொழில் நுட்பத்துடன் கூடியதான வகையில் விவசாயத்தை மேம்படுத்தும் பொருட்டு யாழ்ப்பாணத்துக்கு வருகை தந்திருந்த குழுவினரை அமைச்சர் டக்ளஸ் தேவானந்தா மற்றும் வடமாகாண ஆளுனர் ஜீ.ஏ. சந்திரசிறி ஆகியோர் சந்தித்து கலந்துரையாடியுள்ளனர்.

திருநெல்வேலியில் அமைந்துள்ள விவசாய திணைக்களப் பணிமனையில் மேற்படி சந்திப்பு இன்றையதினம் (17) இடம்பெற்றுள்ளது.

பல்கலைக்கழக மானிய ஆணைக்குழுவும், யாழ்ப்பாண பல்கலைக்கழகத்தின் விவசாயபீடமும், வடமாகாண விவசாய அமைச்சும் இணைந்து யாழ் மாவட்டத்தில் நவீன தொழில் நுட்பத்துடன் கூடியதான வகையில் புதிய வகை இனங்களை அறிமுகப்படுத்தி விவசாய செய்கைகைய மேம்படுத்துவதும் விவசாயிகளுக்கு புதிய தொழில் நுட்பங்களை கையாளுவது தொடர்பிலான அறிவுரைகளையும் வழங்கும் பொருட்டு கொழும்பிலிருந்து குழுவொன்று வருகைதந்திருந்தது.

இன்றையதினம் விவசாயிகளுக்கு செயலமர்வுகளை நடாத்தியிருந்த குழுவினர் நாளையதினம் விவசாயிகளின் பயிர்செய் நிலங்களுக்கும் நேரடியாக விஜயம் மேற்கொண்டு ஆராயவுள்ளனர்.

பல்கலைக்கழக மானிய ஆணைக்குழுவின் தலைவர் பேராசிரியர் சனிகா ஹரிம்புரகம தலைமையிலான இக்குழுவில் தென்கிழக்கு பல்கலைக் கழகத்தைச் சேர்ந்த பலரும் பங்கெடுத்துள்ளனர்.

இதன்போது வடமாகாண பிரதம செயலாளர் திருமதி விஜயலட்சுமி ரமேஸ், வடமாகாண ஆளுனரின் செயலாளர் இளங்கோவன், யாழ் பல்கலைக்கழக துணைவேந்தர் பேராசிரியர் செல்வி வசந்தி அரசரட்ணம், யாழ் பல்கலைக்கழக விவசாய பீடாதிபதி திருமதி சிவச்சந்திரன், கலாநிதி மிகுந்தன், மாகாண விவசாய பணிப்பாளர் சிவகுமார் உள்ளிட்ட துறைசார்ந்தோர் கலந்து கொண்டார்.









 குருநகர் யுவதி மரணம் தொடர்பில் உரிய நடவடிக்கை உடனடியாக எடுக்க அமைச்சர் பொலிசாருக்கு பணிப்பு
 17.06.2014 - வியாழக்கிழமை

யாழ்ப்பாணம் குருநகரில் அண்மையில் கிணற்றில் வீழ்ந்து மரணமடைந்த யுவதியின் மரணம் தொடர்பில் உடனடியாக ஆராய்ந்து நடவடிக்கை எடுக்குமாறு பொலிஸாருக்கு அமைச்சர் டக்ளஸ் தேவானந்தா அவர்கள் விசேட பணிப்புரை விடுத்துள்ளார்.

யாழ்ப்பாண பிரதேச ஒருங்கிணைப்புக் குழுக்கூட்டம் பிரதேச செயலகக் கேட்போர் கூடத்தில் அமைச்சர் தலைமையில் இன்றைய தினம் (17) இடம்பெற்ற போதே இப்பணிப்புரை விடுக்கப்பட்டது.

இதன்போது மின்சாரம் தொடர்பில் கலந்துரையாடப்பட்டபோது குருநகர் ஐந்து மாடிக் கட்டிடத் தொகுதியில் வாழும் குடும்பங்களில் 62 குடும்பங்களுக்கு வடக்கின் வசந்தம் திட்டத்தினூடாக மின்னிணைப்பை வழங்குமாறு கேட்டுக்கொண்ட அமைச்சர் அவர்கள் முஸ்லிம் மையவாடியில் இரண்டு கற்தூண்களை நிறுவி மின்விளக்கினை இணைக்குமாறும் கேட்டுக்கொண்டார்.

அத்துடன் ஏனைய மின் தேவைகள் குறித்து மக்களால் முன்வைக்கப்பட்ட கோரிக்கைகள் தொடர்பிலும் கவனம் செலுத்தப்பட்டது.

அடுத்து பொதுமக்கள் பாதுகாப்பு சம்பந்தமாக ஆராயப்பட்டபோது யாழ். மாவட்டச் செயலகத்துக்கு அண்மையாக காட்டுக்கந்தோர் பகுதியில் உள்ள "அன்ட்ரோ லிகர் பார்" தொடர்பாக மக்களாலும் அரச உத்தியோகத்தர்களினாலும் பல்வேறு குற்றச்சாட்டுக்கள் முன்வைக்கப்பட்டதையடுத்து குறித்த விடயம் தொடர்பில் ஏற்கனவே தமது கவனத்திற்குக் கொண்டு வரப்பட்டதாகவும் அமைச்சர் அவர்கள் சுட்டிக்காட்டினார்.

இதனிடையே அண்மையில் குருநகர் பகுதியில் யுவதியொருவர் கிணற்றில் வீழ்ந்து மரணமடைந்தது தொடர்பில் தீவிர கவனம் செலுத்திய அமைச்சர் அவர்கள் மரணம் தொடர்பாக ஆராய்ந்து உரிய நடவடிக்கை எடுக்குமாறு பொலிசாருக்கு பணிப்புரை விடுத்தார்.

அத்துடன் குறித்த விடயம் தொடர்பாக கருத்துத் தெரிவித்த தாயொருவர் இனிவரும் காலங்களில் கிறிஸ்தவ தேவாலயங்களில் கோவில் பணிகளில் வயது முதிர்ந்தோர்களையும், பெண் துறவிகளையும் ஈடுபடுத்த வேண்டுமெனவும் இதைவிடுத்து இள வயதினரை ஈடுபடுத்துவதை தவிர்க்க வேண்டுமெனவும் அமைச்சர் அவர்களிடம் கோரிக்கை விடுத்திருந்தார்.

இதன்போது கருத்துத் தெரிவித்த அமைச்சர் அவர்கள் குறித்த விடயம் தொடர்பாக தாம் யாழ்.மறைமாவட்ட ஆயருக்கு கடிதம் மூலம் தெரியப்படுத்தவுள்ளதாகவும் தெரிவித்தார்.

அத்துடன், எமது இளைய சமூகத்தை நல்வழிப்படுத்தக் கூடிய வகையிலான விழிப்புணர்வுக் கருத்தரங்குகளை நடாத்துவதன் அவசியத்தையும் இதன்போது வலியுறுத்தினார்.

இதனிடையே பாடசாலை மாணவர்கள் மத்தியில் போதைப் பொருள் பாவனையால் எதிர்கொள்ளப்பட்டு வரும் அவலங்கள் குறித்து சுட்டிக்காட்டப்பட்ட போது, இவ்விடயம் தொடர்பில் துறைசார்ந்தோர் ஆராய்ந்து தமக்கு அறிக்கை சமர்ப்பிக்குமாறும் அமைச்சர் அவர்கள் கேட்டுக் கொண்டார்.

யாழ்.மாவட்டம் மட்டுமல்லாது வடமாகாணத்தின் கல்வித்துறை தற்போது முன்னேற்றம் கண்டு வருவதாகவும் அதற்கு பெற்றோர்கள் ஆசிரியர்கள் மற்றும் மாணவர்களது முயற்சி மட்டுமல்லாது பதற்றமில்லாத இன்றுள்ள அமைதியான சூழல் முக்கியமான காரணமாக அமைகின்றது.

எனவே, இவ்வாறான அமைதியான சூழலை பாதுகாத்து எமது மாணவர்கள் மட்டுமல்லாது மக்களும் மென்மேலும் முன்னேற்றம் காண வேண்டுமென்றும் அமைச்சர் அவர்கள் தெரிவித்தார்.

இதன்போது இம்மாவட்டத்தின் அபிவிருத்திக்காக 1000 மில்லியன் ரூபாவை விசேட திட்டத்தின் கீழ் பெற்றுக் கொண்டுள்ள அதேவேளை, இந்நிதியின் ஊடாக உடனடியானதும் நீண்டகாலதுமான சிறிய தேவைகளைப் பூர்த்தி செய்ய முடியுமென்றும் சுட்டிக்காட்டிய அமைச்சர் அவர்கள், எமது சமூகம் கையேந்தும் சமூகமாக வாழாது எதிர்காலத்தில் சொந்த கால்களில் நின்று வாழும் சமூகமாக மாற்றியமைக்கப்பட வேண்டுமென்பதே எமது விருப்பமென்றும் சுட்டிக்காட்டினார்.

இதில் காணி, சுகாதாரம், சமுர்த்தி, வாழ்வின் எழுச்சி, குடிநீர், கடற்றொழில் உள்ளிட்ட விடயங்கள் தொடர்பிலும் விரிவாக ஆராயப்பட்டதுடன் குறித்த விடயங்கள் தொடர்பில் அமைச்சர் அவர்கள் துறைசார்ந்தோருடன் கேட்டறிந்து கொண்டார்.

அத்துடன், யாழ்.மாநகரசபை, பிரதேச செயலகம் மற்றும் ஏனைய அரச திணைக்களங்களினது அனுமதிக்கப்பட்ட முன்மொழிவு திட்டங்கள் தொடர்பாகவும் விரிவாக ஆராயப்பட்டது.

இதன்போது, யாழ்ப்பாண பிரதேச செயலர் திருமதி சுகுணரதி தெய்வேந்திரம், யாழ்.மாநகர முதல்வர் திருமதி யோகேஸ்வரி பற்குணராசா, யாழ். பதில் பொலிஸ் பொறுப்பதிகாரி பாலசூரிய உள்ளிட்ட அரச திணைக்களங்களின் துறைசார்ந்த அதிகாரிகள் பலரும் உடனிருந்தனர்.











 கிராமங்களை நோக்கிய அபிவிருத்திக்கான நல்ல அரசியல் சூழல் தற்போது ஏற்பட்டுள்ளது - ஈ.பி.டி.பி பாராளுமன்ற உறுப்பினர் சந்திரகுமார்
 17.04.2014 - வியாழக்கிழமை
 
கிராமங்களை நோக்கி அபிவிருத்திப் பணிகளை முன்னெடுப்பதற்கான நல்ல அரசியல் சூழல் தற்போதே ஏற்பட்டுள்ளது. கடந்த காலங்களில் கிராமங்களில் அபிவிருத்திப் பணிகளை முன்னெடுப்பதற்கான அரசியல் நிர்வாக ரீதியான தடைகள் காணப்பட்ட போதிலும் தற்போது அந்த நிலைமையும் மாற்றப்பட்டுள்ளது என ஈ.பி.டி.பி பாராளுமன்ற உறுப்பினரும் பாராளுமன்றக் குழுக்களின் பிரதித் தலைவருமான முருகேசு சந்திரகுமார் அவர்கள் தெரிவித்துள்ளார்.

இன்றையதினம் (17) யாழ்ப்பாணம் சண்டிலிப்பாய் பிரதேச செயலகப் பிரிவிற்குட்பட்ட தெரிவுசெய்யப்பட்ட 11 கடற்றொழிலாளர்களுக்கு வலைகளும், 10 பெண்களுக்கு தையல் இயந்திரங்களும் வாழ்வின் எழுச்சித் திட்டத்தின் கீழ் வழங்கி வைத்து கருத்து தெரிவிக்கும் போதே அவர் இவ்வாறு தெரிவித்துள்ளார்.

அங்கு அவர் மேலும் தெரிவிக்கையில்,

தற்போது நாம் கிராமங்களின் மேம்பாட்டிற்கு அதிக முக்கியத்துவம் கொடுத்து செயற்பட்டு வருகின்றோம். இந்த ஆண்டும் அரசிடமிருந்து பல கோடிக்கணக்கான நிதி அபிவிருத்திப் பணிகளுக்காக பெறப்படவுள்ளது. அதிலும் நாம் கிராமங்களுக்கே அதிக முக்கியத்துவம் கொடுத்துள்ளோம். கிராம மக்களின் வாழ்க்கையில் மாற்றத்தை ஏற்படுத்த வேண்டும். அப்போதே நிலையான அபிவிருத்தியை நோக்கிச் செல்ல முடியும் எனத் தெரிவித்த பாராளுமன்ற உறுப்பினர் அவர்கள்,

யுத்தத்தின் அதிக பாதிப்புக்களைச் சுமந்த வன்னியில் குறிப்பாக கிளிநொச்சி, முல்லைத்தீவு மாவட்ட கிராமங்களில் ஏற்படுத்தப்பட்ட முன்னேற்றங்கள் யாழ்ப்பாணத்தின் கிராமங்களில் ஏற்படுத்தப்படவில்லை என்பது கவலைக்குரிய விடயமாகும். யாழ். மாவட்டத்தில் தற்போதும் கி;டத்தட்ட 54 000 குடும்பங்கள் சமுர்த்தி பயனாளிகளாக உள்ளனர். இதன் வெளிப்பாடு இன்னும் யாழ்.மாவட்டத்தில் அதிகளவான வறுமைக்கோட்டின் கீழ் வாழ்கின்ற மக்கள் உள்ளனர் என்பதே. எனவே இந்த நிலைமைகளை மாற்றியமைக்க வேண்டும். அதற்காக தற்போது அரசினால் நடைமுறைப்படுத்தப்பட்டு வருகின்ற சிறந்த வறுமை ஒழிப்புத் திட்டமான வாழ்வின் எழுச்சி திட்டத்தின் கீழ் வழங்கப்படுகின்ற உதவிகளை மக்கள் சிறந்த முறையில் பயன்படுத்தி அதன் முழுமையான பயனை பெற்றுக்கொள்ள வேண்டும்.

கிடைக்கின்ற வாழ்வாதார உதவிகளின் பின்னால் பயனாளிகளின் கடுமையான உழைப்பு இருக்க வேண்டும். அப்போதே வாழ்வாதார திட்டங்களும் வெற்றிபெற்றும் அதன் இலக்கை அடையும் எனவும் தெரிவித்தார்.

சண்டிலிப்பாய் பிரதேச செயலக உதவித் திட்டப்பணிப்பாளர் நிரஞ்சனா தலைமையில் இடம்பெற்ற நிகழ்வில் மானிப்பாய் பிரதேச சபை உறுப்பினர் ஜீவா, சமுர்த்தி உத்தியோகத்தர்கள், அபிவிருத்தி உத்தியோகத்தர்கள் எனப் பலர் கலந்து கொண்டனர்.













 புனித ஹஜ் யாத்திரைக்கு இம்முறையும் கட்டுப்பாடுகள் 2240 பேருக்கே அனுமதி
 17.04.2014 - வியாழக்கிழமை

புனித ஹஜ் கடமையை நிறைவேற்றுவதற்காக இம்முறை இலங்கையிலிருந்து 2240 பேருக்கே அனுமதி வழங்கப்பட்டுள்ளதாக முஸ்லிம் சமய கலாசார திணைக்களம் தெரிவித்தது.

ஆனால் ஹஜ் கடமையை நிறைவேற்றச் செல்வதற்காக 7500 க்கு மேற்பட்டவர்கள் விண்ணப்பித்திருப்பதாக தெரிவித்த திணைக்கள பணிப்பாளர் எம். எச். எம். ஸமீல் இதில் தகுதியானவர்களை தெரிவு செய்யும் பணிகள் ஆரம்பிக்கப்பட்டிருப்பதாக தெரிவித்தார்.

புனித மக்காவை அண்மித்த பிரதேசங்களில் விஸ்தரிப்பு பணிகள் இடம்பெற்று வருவதால் ஹஜ் யாத்திரிகர்களின் தொகை கடந்த சில வருடங்களாக மட்டுப்படுத்தப்பட்டு வருகிறது. கடந்த வருடமும் 2240 பேருக்கே கோட்டா வழங்கப்பட்டதாக குறிப்பிட்ட அவர், ஏற்கனவே 7500 பேர் விண்ணப்பித்துள்ளதால் அதில் முன்னுரிமை அடிப்படையில் தகுதியானவர்களை தெரிவு செய்வதாக கூறினார்.

முதற் தடவையாக ஹஜ் கடமைக்கு செல்பவர்களுக்கு முன்னுரிமை வழங்கப்படுவதாக கூறிய பணிப்பாளர், இது தொடர்பான கடிதங்களை தெரிவு செய்யப்பட்டவர்களுக்கு அனுப்பி வருவதாக குறிப்பிட்டார். இந்த பணிகள் பூர்த்தி செய்யப்பட்ட பின்னர் ஹஜ் யாத்திரிகர்களை அழைத்துச் செல்லும் ஹஜ் முகவர்களை தெரிவு செய்யும் பணிகள் ஆரம்பிக்கப்பட உள்ளன.


 விசேட ரயில் சேவை இன்று ஆரம்பம்.....
 17.04.2014 வியாழக்கிழமை

சித்திரைப்புத்தாண்டை முன்னிட்டு சொந்த இடங்களுக்குச் சென்ற மக்கள் மீண்டும் கொழும்பிற்கு  திரும்ப ஏதுவாக விசேட ரயில் சேவைகள் இன்றும் முன்னெடுக்கப்பட்டுள்ளன.

அதிக மக்கள் வருகை தரும் பட்சத்தில் மேலதிக ரயில்களை சேவையில் ஈடுபடுத்தவுள்ளதாக ரயில்வே அத்தியட்சகர் எல்.ஏ.ஆர். ரத்நாயக்க தெரிவிக்கின்றார்.

இதேவேளை, புத்தாண்டை முன்னிட்டு சொந்த இடங்களுக்குச் சென்ற மக்களின் வசதி கருதி இன்று முதல் விசேட பஸ் சேவை முன்னெடுக்கப்படவுள்ளதாக தேசிய போக்குவரத்து ஆணைக்குழு தெரிவிக்கின்றது.

நாட்டின் முக்கிய நகரங்களிலிருந்து எதிர்வரும் 22 ஆம் திகதி வரை இந்த பஸ் சேவைகள் முன்னெடுக்கப்படவுள்ளன.

வெள்ளிக்கிழமை,  சனிக்கிழமை மற்றும் ஞாயிற்றுக்கிழமை ஆகிய நாட்களில் கொழும்பிற்கு அதிகளவு மக்கள் வருகை தருவார்கள் என எதிர்ப்பார்க்கப்படுவதால், அது குறித்து ஆராய்வதற்காக அதிகாரிகளை  பல பகுதிகளுக்கும் அனுப்பி வைத்துள்ளதாக தேசிய போக்குவரத்து ஆணைக்குழு சுட்டிக்காட்டுகின்றது.


 கொழும்பு சிறைச்சாலை வைத்தியசாலையில் இருந்து கைதிகள் தப்பியோட்டம்
 17.04.2014 - வியாழக்கிழமை

கொழும்பு சிறைச்சாலை வைத்தியசாலையில் இருந்து கைதி ஒருவரும் சந்தேகநபர் ஒருவரும் இன்று அதிகாலை தப்பிச் சென்றுள்ளனர்.

மனநோயாளர் பிரிவில் இருந்த இருவரே இவ்வாறு தப்பிச் சென்றுள்ளதாக சிறைச்சாலைகள் ஊடகப் பேச்சாளர் ஜே.பீ.குலதுங்க தெரிவிக்கின்றார்.

தப்பிச் சென்றவர்களில் ஒருவர் கொலை சம்பவம் உள்ளிட்ட வழக்குகளில் குற்றம் சுமத்தப்பட்டிருந்தவர் என சிறைச்சாலைகள் திணைக்களம்  குறிப்பிட்டுள்ளது.

மற்றைய நபர் அபராதம் செலுத்தாமையினால் சிறையில் வைக்கப்பட்டிருந்தவர் எனவும் சிறைச்சாலைகள் ஊடகப் பேச்சாளர் ஜே.பீ.குலதுங்க தெரிவித்தார்.


 இந்திய கடல் எல்லைக்குள் சென்ற இரு இலங்கை மீனவர்கள் கைது
 17.04.2014 - வியாழக்கிழமை

தமிழ்நாடு - வேதாரண்யம் அருகே எல்லைத் தாண்டி மீன்பிடித்த இலங்கை மீனவர்கள் இருவர் இந்திய கடலோர காவல் படையினரால் கைது செய்யப்பட்டுள்ளனர்.

இலங்கை வல்வெட்டித்துறையைச் சேர்ந்த மீனவர் ரவீந்தர், சந்திரமோகன் ஆகிய இரு மீனவர்கள் கைது செய்யப்பட்டுள்ளனர்.

கைது செய்யப்பட்டவர்களிடம் மேலதிக விசாரணைகள் மேற்கொள்ளப்பட்டு வருவதாக இந்திய ஊடகங்கள் தெரிவித்துள்ளன.


 வடமராட்சியில் தாக்குதலுக்கு உள்ளான ஊடகவியலாளரை ஈழ மக்கள் ஜனநாயகக் கட்சியினர் நேரில் சென்று பார்வையிட்டனர்..!
 17.04.2014 - வியாழக்கிழமை

தமிழ் சிங்கள புத்தாண்டு தினத்தன்று தாக்குதலுக்கு உள்ளான ஊடகவியலாளரை ஈழமக்கள் ஜனநாயகக் கட்சியின் அமைப்பாளர்கள் நேரில் சென்று பார்வையிட்டனர்.

தாக்குதலுக்கு உள்ளான ஊடகவியலாளர் சிவஞானம் செல்வதீபன் புத்தாண்டு தினத்தன்று இரவு 7.00 மணியளவில் தனது சொந்த ஊரிலிருந்து தனது சிறுப்பிட்டியிலுள்ள வீட்டிற்குச் சென்று கொண்டிருந்தவேளை புறாப்பொறுகிக்கும் வல்லைவெளிக்கும் இடையில் வைத்து முகந்தெரியாதவர்களின் தாக்குதலுக்கு உள்ளானார். இவர் தற்போது பருத்தித்துறை ஆதார வைத்தியசாலையில் சிகிச்சை பெற்று வருகிறார். ஈ.பி.டி.பியின் வடமராட்சி அமைப்பாளரும் பருத்தித்துறை பிரதேசசபையின் எதிர்க்கட்சித் தலைவருமான ஐயாத்துரை ஸ்ரீரங்கேஸ்வரன் மற்றும் வடமராட்சி கரையோரப் பிரதேச இணைப்பாளர் அ.இரட்ணகுமார் ஆகியோர் உடல்நலம் குறித்து கேட்டறிந்தனர்.

ஊடகவியலாளர் சிவஞானம் செல்வதீபன், தினக்குரல், வலம்புரி உட்பட பல ஊடகங்களின் செய்தியாளர் என்பது குறிப்பிடத்தக்கது.



 பல்கலைகழகத்திற்கு மாணவர்களை இணைத்துக் கொள்வதற்கான விண்ணப்பங்கள்
 17.04.2014 - வியாழக்கிழமை

பல்கலைகழகத்திற்கு புதிய மாணவர்களை இணைத்துக் கொள்வதற்கான விண்ணப்பங்கள் அடுத்த வாரம் வெளியிடப்படும் என பல்கலைகழக மானியங்கள் ஆணைக்குழு தெரிவித்துள்ளது.

இந்நிலையில், பல்கலைகழக கல்வி பாடத்திட்டம் தொடர்பான தகவல் அடங்கிய கையேடு வெளியிடப்பட்டுள்ளதாகவும் தெரிவிக்கப்பட்டுள்ளது.

2013 ஆம் ஆண்டு உயர்தர பரீட்சையில் சித்தியடைந்து, பல்கலைகழகத்திற்கு தெரிவான மாணவர்கள் குறித்த விண்ணப்பங்களை பெற்றுக் கொள்ள முடியும் என அறிவிக்கப்பட்டுள்ளது.


 இந்தியாவின் ஐந்தாம் கட்ட தேர்தல் இன்று
 17.04.2014 - வியாழக்கிழமை

121 நாடாளுமன்ற உறுப்பினர்களை தெரிவு செய்வதற்கான வாக்களிப்புகள் இன்று (17) இந்தியாவில் நடைபெறவுள்ளன.

9 கட்டங்களாக அங்கு நடைபெறும் தேர்தலில் இன்றைய வாக்களிப்பு ஐந்தாவது கட்டமாகும்.

இன்றைய தினம் கர்நாடகா, ராஜஸ்தான், உத்தர்பிரதேஸ், பீஹார், மஹாராஸ்ட்டிரா மற்றும் மேற்கு வங்காளம் உள்ளிட்ட 12 மாநிலங்களில் வாக்குப் பதிவுகள் இடம்பெறவுள்ளன.

இந்தியாவின் தேர்தல்கள் கடந்த 7ஆம் திகதி ஆரம்பிமாகியது.

எதிர்வரும் மே மாதம் 12ஆம் திகதி வரையில் கட்டம் கட்டமாக நடைபெறும் இந்த தேர்தலின் வாக்குகள் எதிர்வரும் மே மாதம் 16ஆம் திகதி எண்ணப்படவுள்ளன.

தமிழகம் மற்றும் புதுச்சேரி மாநிலங்களின் தேர்தல்கள் எதிர்வரும் 24ஆம் திகதி நடைபெறவுள்ளமை குறிப்பிடத்தக்கது.


 மலேசியா பிரதமர்  அப்துல் ரஸாக்குடன் பாதுகாப்பு செயலாளர் கோட்டாபய ராஜபக்ஷ சந்திப்பு
 17.04.2014 - வியாழக்கிழமை

இலங்கை மலேசியாவில் நடைபெறும் பாதுகாப்பு சேவைகள் தொடர்பான ஆசிய கண்காட்சி மற்றும் மாநாட்டில் கலந்து கொண்டுள்ள பாதுகாப்பு மற்றும் நகர அபிவிருத்தி அமைச்சின் செயலாளர் கோட்டாபய ராஜபக்ஷ அந்நாட்டு பிரதமர் டத்தோ நஜீப் அப்துல் ரஸாக்கை சந்தித்து பேச்சுவார்த்தை நடத்தியுள்ளார்.

மலேசியா, புத்ரஜயாவிலுள்ள பிரதமரின் உத்தியோகபூர்வ வாசஸ்தலத்தில் நேற்று முன்தினம் இந்த சந்திப்பு இடம்பெற்றுள்ளது. பிராந்திய பாதுகாப்பு மற்றும் இராணுவ ஒத்துழைப்பு உட்பட இரு தரப்பு பல்வேறு முக்கிய விடயங்கள் தொடர்பாக இதன் போது விரிவாக ஆராயப்பட்டுள்ளது.

பாதுகாப்புச் செயலாளருடனான இந்த உத்தியோகபூர்வ சந்திப்பின் போது மலேசியாவுக்கான இலங்கை உயர் ஸ்தானிகர் இப்ராஹிம் அன்ஸார், பாதுகாப்பு படைகளின் பிரதம அதிகாரி ஜெனரல் ஜகத் ஜயசூரிய மலேசியா வுக்கான பிரதி உயர்ஸ்தானிகர் மேஜர் ஜெனரல் சுமித் மானவடு மற்றும் மேஜர் ஜெனரல் கபில ஹெந்தவித்தாரன ஆகியோர் கலந்து கொண்டனர்.

பிராந்திய ஸ்திரத்தன்மை மற்றும் பாதுகாப்பை வலுப்படுத்தல் என்ற தொனிப் பொருளில் மலேசியாவில் நான்கு நாட்கள் நடைபெறும் பாதுகாப்பு சேவைகள் தொடர்பான ஆசிய கண்காட்சி மற்றும் மாநாட்டில் அந்நாட்டு அரசாங்கத்தின் அழைப்பின் பேரில் கலந்து கொண்டுள்ள பாதுகாப்புச் செயலாளர் கோட்டாபய ராஜபக்ஷ, அரசு சாராத செல்வாக்கு; உலக பாதுகாப்புத் தாக்கம் என்ற தொனிப் பொருளில் விசேட உரை நிகழ்த்தியுள்ளார்.


 தென்கொரிய கப்பலிலிருந்து 180 பேர் மீட்பு : இருவர் பலி
 17.04.2014 - வியாழக்கிழமை

நேற்றையதினம் (16) விபத்துக்குள்ளான தென் கொரிய கப்பலிலிருந்து 180 பயணிகள் மீட்கப்பட்டுள்ளனர். இருவர் உயிரிழந்துள்ளனர்.
 
476 பயணிகளில் 325 பேர் உயர்தர பாடசாலையின் மாணவர்கள் என்றும் 32 பணியாளர்கள் இருந்ததாகவும் தென்கொரிய செய்திகள் தெரிவிக்கின்றன.

தற்போது 180 பேர் பாதுகாப்பாக மீட்கப்பட்டுள்ளதாகவும் இருவர் உயிரிழந்துள்ளதாகவும் தெரிவிக்கப்படுகிறது.

இதேவேளை காணாமற்போன 290 பயணிகளை தேடும் பணிகள் தொடர்ந்தும் முன்னெடுக்கப்பட்டு வருகிறது. கப்பலில் இருப்பவர்களை மீட்பதற்கான நடவடிக்கையில் 18 ஹெலிகொப்டர்களும் 34 படகுகளும் ஈடுபடுத்தப்பட்டுள்ளன.

இன்ஞ்சொன்சில் இருந்து ஜேஜூ தீவு நோக்கிப் பயணித்த இந்தப் படகில் பாடசாலை மாணவர்களே அதிகளவில் பயணித்துள்ளனர்.

மீட்புப் பணிகளை துரிதப்படுத்துமாறும் பயணிகள் பாதுகாப்புடன் மீட்கப்பட வேண்டுமெனவும் தென் கொரிய ஜனாதிபதி பார்க் கியொன் ஹை பணிப்புரை விடுத்துள்ளார்.


 ஐ.பி.எல் முதல் போட்டியில் மும்பையை வீழ்த்தியது கொல்கத்தா
 17.04.2014 - வியாழக்கிழமை

அபுதாபியில் இடம்பெற்ற 7வது ஐ.பி.எல் தொடரின் முதலாவது போட்டியில் நடப்பு சம்பியன் மும்பை இந்தியன்ஸ் அணியும், கொல்கட்டா நைட்ரைடர்ஸ் அணியும் பங்கேற்றன.
 
நடப்பு சம்பியன் மும்பை இந்தியன்ஸ் - கொல்கத்தா நைட்ரைடர்ஸ் அணிகளுக்கிடையிலான முதலாவது போட்டியில் நாணய சுழற்சியில் வெற்றி பெற்ற கொல்கத்தா நைட்ரைடர்ஸ் முதலில் துடுப்பெடுத்தாட தீர்மானித்தது.
 
முதலில் துடுப்பெடுத்தாடிய கொல்கத்தா நைட்ரைடர்ஸ் அணி நிர்ணயிக்கப்பட்ட 20 ஓவர்கள் நிறைவில் 163 ஓட்டங்களுக்கு 5 விக்கெட்டினை இழந்தது.
 
பதிலுக்கு துடுப்பெடுத்தாடிய மும்பை இந்தியன்ஸ் அணி நிர்ணயிக்கப்பட்ட 20 ஓவர்கள் நிறைவில் 122 ஓட்டங்களுக்கு 7 விக்கெட்டினை இழந்து 41 ஓட்டங்களால் தோல்வியடைந்தது.
 
இந்த போட்டி இந்தியன் பிரிமியர் லீக் தொடரின் 400வது போட்டியாக் அமைந்திருந்தமை குறிப்பிடத்தக்கது.


 அரியாலை மேற்கு மக்களின் மேம்பாட்டுக்காக அமைச்சர் நிதியுதவி
 16.04.2014 - புதன்கிழமை

அரியாலை மக்களின் மேம்பாட்டுக்காகவும் இப்பகுதியின் அபிவிருத்திக்காகவும் காந்தி சனசமூக நிலையத்திற்கு ஊடாக ஒரு மில்லியன் ரூபாவை வழங்கவுள்ளதாக ஈழ மக்கள் ஜனநாயகக் கட்சியின் செயலாளர் நாயகமும், அமைச்சருமான டக்ளஸ் தேவானந்தா அவர்கள் தெரிவித்துள்ளார்.

யாழ்ப்பாணம் அரியாலை மேற்கில் அமைந்துள்ள காந்தி சனசமூக நிலையத்தினது 65 வது ஆண்டு நிறைவின் மூன்றாம் நாளான இன்றைய நிகழ்வில் (16) பிரதம விருந்தினராகக் கலந்து கொண்டு உரையாற்றும் போதே அவர் இவ்வாறு தெரிவித்துள்ளார்.

அவர் மேலும் தெரிவிக்கையில், காந்தி சனசமூக நிலையத்தினது 65 வது ஆண்டு நிறைவில் கலந்து கொள்வதில் மகிழ்ச்சியடைகின்றேன்.

ஏற்கனவே இப்பகுதிக்கும் மக்களுக்கும் எமது கட்சியின் ஊடாக பல்வேறுபட்ட உதவிகளை உறவுகளின் நிமித்தம் வழங்கியுள்ளோம்.

இவ்வாறான உதவிகள் பெயருக்காக அல்ல மக்களின் மேம்பாட்டுக்காகவும் இப்பகுதியின் அபிவிருத்திக்காகவுமே வழங்கப்படுகின்றது என்று தெரிவித்தார்.

அத்துடன் சனசமூக நிலைய சமூகம் விடுத்த கோரிக்கைக்கு அமைவாக ஒரு மில்லியன் ரூபாவை வழங்கவுள்ளதாக தெரிவித்த அமைச்சர் அவர்கள் எதிர்காலங்களில் மக்களின் வாழ்வாதாரத்தையும் வாழ்க்கையை முன்னேற்றுவதற்கு தொடர்ச்சியான தமது பங்களிப்பு வழங்கப்படுமென்றும் சுட்டிக்காட்டினார்.

காந்தி சனசமூக நிலையத்தினது 65 வது ஆண்டு விழாவையொட்டிய நிகழ்வுகள் கடந்த 14 ம் திகதி முதல் ஆரம்பமாகி நான்கு நாட்கள் நடைபெற்று நாளைய தினம் இறுதிநாள் நிகழ்வுகள் நடைபெறவுள்ளன.

இன்றைய மூன்றாம் நாள் நிகழ்வில் கல்வித்துறையில் சாதித்த மாணவர்களுக்கான பணப்பரிசில்களை அமைச்சர் டக்ளஸ் தேவானந்தா அவர்கள் வழங்கி வைத்திருந்தமை குறிப்பிடத்தக்கது.

இதன்போது யாழ்.மாநகர முதல்வர் திருமதி யோகேஸ்வரி பற்குணராசா, யாழ்.மாநகர சபையின் உறுப்பினரும், சுகாதாரக் குழுவின் தலைவருமான மங்களநேசன், மாநகர சபை உறுப்பினர் தில்லையம்பலம் ஆகியோர் உடனிருந்தனர்.















 அத்தியடி பிள்ளையார் கோவிலின் பூங்காவனத் திருவிழாவில் அமைச்சர் பங்கேற்பு
 16.04.2014 - புதன்கிழமை

யாழ்ப்பாணம் அத்தியடி சிறி சிதம்பர நடராசா வீரகத்திப் பிள்ளையார் கோவிலின் பூங்காவனத் திருவிழாவில் அமைச்சர் டக்ளஸ் தேவானந்தா அவர்கள் பங்கேற்று சிறப்பித்துள்ளார்.

பூங்காவனத் திருவிழாவில் கலந்து கொள்ளும் பொருட்டு அமைச்சர் அவர்கள் இன்றைய தினம் (16) குறித்த கோவிலுக்கு விஜயம் மேற்கொண்டார்.

சித்திரைப் புத்தாண்டு தினமான கடந்த 14 ம் திகதி தேர் உற்சவம் இடம்பெற்றிருந்த நிலையில் இன்றைய தினம் பூங்காவனத் திருவிழா சிறப்புடன் நடைபெற்றது.

இன்றைய சிறப்புப் பூசை வழிபாடுகளில் அமைச்சர் அவர்கள் கலந்து கொண்டு சிறப்பித்திருந்தமை குறிப்பிடத்தக்கது















 தென்மராட்சி சமுர்த்தி வங்கிக்கான புதிய கட்டிடத்தை நிர்மாணிப்பதில் எதிர்நோக்கி வரும் இடர்பாடுகள் தொடர்பில் அமைச்சர் தலைமையில் ஆராய்வு
 16.04.2014 - புதன்கிழமை

தென்மராட்சி பிரதேச செயலர் பிரிவில் சமுர்த்தி வங்கிக்கான புதிய கட்டிடத்தை நிர்மாணிப்பதில் எதிர்நோக்கி வரும் இடர்பாடுகள் தொடர்பில் அமைச்சர் டக்ளஸ் தேவானந்தா அவர்கள் தலைமையில் விசேட கலந்துரையாடலொன்று இடம்பெற்றுள்ளது.

தென்மராட்சி பிரதேச செயலக கேட்போர் கூடத்தில் மேற்படி விடயம் தொடர்பிலான கலந்துரையாடல் இன்றைய தினம் (16) இடம்பெற்றுள்ளது.

இதன்போது தென்மராட்சிப் பகுதியில் சமுர்த்தி வங்கிக்காக நகரசபைக்கு அண்மையாகவுள்ள காணியில் புதிய கட்டிடமொன்றை அமைப்பதற்கு நகரசபை தொடர்ச்சியாக மறுத்து வருகின்றது.

பிரதேச மற்றும் மாவட்ட ஒருங்கிணைப்புக் குழுவின் தீர்மானத்திற்கு அமைவாக குறித்த காணியில் வங்கியை நிர்மாணிப்பதற்கான அனுமதி வழங்கப்பட்ட போதிலும் அது தொடர்பில் தொடர்ந்தும் இழுபறி நிலையே காணப்படுகின்றது.

இந்நிலையில் வங்கிக்கான கட்டுமானப் பணிகளை முன்னெடுக்க முடியாதவாறு ஏற்பட்டுள்ள நிலவரம்  தொடர்பான வழக்கு நீதிமன்றில் இருக்கின்ற காரணத்தினால் நீதிமன்ற முடிவுகள் எட்டப்படும் வரையில் குறித்த காணி பிரதேச செயலகத்திற்கு உரித்தானது என அமைச்சர் அவர்கள் இதன்போது தெரிவித்தார்.

குறித்த காணியின் உரிமம் தொடர்பில் பிரதேச சபை தவிசாளர் தேவசகாயம்பிள்ளை, மாகாண காணி ஆணையாளர் தயானந்தன் உள்ளிட்டோருடன் அமைச்சர் அவர்கள் கேட்டறிந்து கொண்டார்.

இதன்போது, மாவட்ட மேலதிக அரசாங்க அதிபர் திருமதி ரூபினி வரதலிங்கம், தென்மராட்சி பிரதேச செயலர் திருமதி அஞ்சலிதேவி சாந்தசீலன் மாவட்ட சமுர்த்தி ஆணையாளர் மகேஸ்வரன், மாகாண உள்ளுராட்சி ஆணையாளர் ஜெகூ, உதவி ஆணையாளர் வத்சலன், ஈ.பி.டி.பியின் தென்மராட்சி இணைப்பாளர் அலெக்ஸான்டர் சாள்ஸ் உள்ளிட்ட துறைசார்ந்த பலரும் உடனிருந்தனர்.









 இ.போ.சபையின் யாழ்.சாலைக்கு புதிய பேரூந்துகளை பெற்றுக் கொடுக்க - அமைச்சர் டக்ளஸ் தேவானந்தா நடவடிக்கை
 16.04.2014 - புதன்கிழமை

மக்கள் எதிர்நோக்கிவரும் பிரச்சினைகளுக்கு நேர்மையான உண்மையான நடைமுறைச்சாத்தியமான வழியில் தீர்வினை காண்பதையே எமது; அரசியல் நோக்காக கொண்டுள்ளோம் என அமைச்சர் டக்ளஸ் தேவானந்தா அவர்கள் தெரிவித்துள்ளார்.

கோண்டாவிலில் அமைந்துள்ள இலங்கை போக்குவரத்து சபையின் வடபிராந்திய தலைமைக் காரியாலயத்தில் இன்றைய தினம் (16) இடம்பெற்ற யாழ்.சாலை ஊழியர்களுடனான கலந்துரையாடலின் போதே அவர் இவ்வாறு தெரிவித்துள்ளார்.

அவர் மேலும் தெரிவிக்கையில், யாழ்.சாலையின் வருவாயை அதிகரிக்கும் முகமாகவும் அதனூடாக உங்களது வாழ்வாதாரத்தை மேம்படுத்துவதற்குமான செயற்திட்டங்களை தொடர்ச்சியாக முன்னெடுக்க நாம் பல்வேறு திட்டங்களை முன்வைத்துள்ளோம்.

அந்தவகையில் அனைவரும் ஐக்கியத்துடனும், புரிந்துணர்வுடனும் விட்டுக் கொடுப்புடனும் கடமைகளை சிறப்பாக செய்ய வேண்டும்.

போக்குவரத்து சேவையானது மக்களுக்கான அத்தியாவசிய தேவையாக உள்ளபடியால் இச்சேவையை நீங்கள் யாவரும் உணர்ந்து கொண்டவர்களாக செயற்படும் போதே அதனூடாக மக்கள் முழுமையான பலனை பெற்றுக் கொள்ள முடியும்.

இந்நிலையில் மக்களுக்கான போக்குவரத்து சேவைகளை இலகுபடுத்தும் வகையில் யாழ்ப்பாணம், காரைநகர், பருத்தித்துறை ஆகிய சாலைகளுக்கு புதிய பேரூந்துகளை பெற்றுக் கொள்வதற்கான நடவடிக்கைகள் முன்னெடுக்கப்படும் அதேவேளை, இங்குள்ள சாரதிகள் மற்றும் நடத்துனர்கள் உள்ளிட்ட அனைவருக்கும் விசேட செயலமர்வுகள் மற்றும் பயிற்சி வகுப்புக்களை நடாத்துவதற்கான திட்டங்களையும் முன்னெடுக்கவுள்ளோம்.

யாழ்.சாலையின் தொழிற்துறைசார்ந்த நடவடிக்கைகள் ஏனைய சாலைகளுக்கு மட்டுமன்றி ஏனைய மாவட்டங்களின் சாலைகளுக்கும் முன்மாதிரியாக அமையப் பெறுதல் வேண்டும் என்பதுடன், சேவையில் ஈடுபடும் பேரூந்துகள் அனைத்தும் சிறந்த முறையில் பராமரிக்கப்படுதல் வேண்டுமென்றும் கேட்டுக் கொண்டார்.

இதனிடையே உத்தியோகத்தர்களது தேவைகள் கோரிக்கைகள் தொடர்பிலும் அமைச்சர் அவர்கள் துறைசார்ந்தோருடன் கலந்துரையாடி கேட்டறிந்து கொண்டார்.

அமைச்சர் டக்ளஸ் தேவானந்தா அவர்களுக்கு யாழ்.சாலை ஊழியர் சங்கத்தினர் நினைவுச் சின்னம் வழங்கிக் கௌரவித்தனர்.

இதன்போது பிரதான பிராந்திய முகாமையாளர் அஸ்ஹர், ஈ.பி.டி.பியின் முன்னாள் பாராளுமன்ற உறுப்பினர் தவராசா, வடமாகாண ஜனநாயக போக்குவரத்து ஊழியர் சங்க தலைவர் புவி, அமைச்சரின் யாழ்.மாவட்ட ஒருங்கிணைப்பாளர் கே.வி குகேந்திரன் ஆகியோர் உடனிருந்தனர்.















 வடமாகாண ஆளுநரின் செயலகத்தில் நடைபெற்ற சித்திரைப் புத்தாண்டு விழாவில் அமைச்சர் பங்கேற்பு
 16.04.2014 - புதன்கிழமை

யாழ்ப்பாணத்தில் அமைந்துள்ள வடமாகாண ஆளுநரின் செயலகத்தில் நடைபெற்ற சித்திரைப் புத்தாண்டு விழாவில் அமைச்சர் டக்ளஸ் தேவானந்தா அவர்கள் பிரதம விருந்தினராகக் கலந்து சிறப்பித்தார்.

மாவட்ட செயலகத்திற்கு முன்பாக அமைந்துள்ள வடமாகாண ஆளுநரின் செயலகத்தில் மேற்படி விழா இன்றைய தினம் (16) இடம்பெற்றுள்ளது.

முன்பதாக இந்து கிறிஸ்தவ பௌத்த மற்றும் இஸ்லாமிய மதகுருமார்களின் ஆசியுரைகளுடன் வாழ்த்துரைகளும் இடம்பெற்றன.

தொடர்ந்து வடமாகாண ஆளுநர் ஜீ.ஏ சந்திரசிறி அவர்கள் தலைமையுரையாற்றும் போது இன, மத, மொழி பேதங்களுக்கு அப்பால் வடமாகாணத்தின் அபிவிருத்தியையும், மேம்பாட்டையும் கருத்தில் கொண்டு அனைவரும் ஒன்றிணைந்து உழைக்க வேண்டுமென கேட்டுக் கொண்டதுடன் இவ்வாண்டு சந்தோசத்தையும் அமைதியையும் தரும் ஆண்டாக அமைய வேண்டுமென்றும் தெரிவித்தார்.

இந்நிகழ்வில் மன்னார் மாவட்டத்தைச் சேர்ந்த 5 வயதுடைய மரியதாஸ் அனஸ்ரா இவானி என்ற சிறுமியின் சிகிச்சைக்காக ஆளுநர் நிதியத்திலிருந்து மூன்று இலட்சம் ரூபாவை பெற்றோரிடம் அமைச்சர் மற்றும் ஆளுநர் ஆகியோர் வழங்கி வைத்தனர்.

ஏற்கனவே மூன்று இலட்சம் ரூபா வழங்கப்பட்டுள்ள நிலையில் இன்றைய தினம் மூன்று இலட்சம் ரூபா வழங்கப்பட்டுள்ளமை குறிப்பிடத்தக்கது.

இதன்போது வடமாகாண ஆளுநரின் செயலாளர் இளங்கோவன், பிரதம செயலாளர் விஜயலட்சுமி ரமேஸ், ஈ.பி.டி.பியின் முன்னாள் பாராளுமன்ற உறுப்பினர் தவராசா, யாழ்.மாநகர முதல்வர் திருமதி யோகேஸ்வரி பற்குணராசா, அமைச்சரின் யாழ்.மாவட்ட ஒருங்கிணைப்பாளர் கே.வி குகேந்திரன் உள்ளிட்ட மாகாண அரச திணைக்களங்களின் செயலாளர்கள், உத்தியோகத்தர்கள் கலந்து கொண்டனர்.

















 அச்சுவேலி கைத்தொழிற்பேட்டை வளாகத்தில் மூன்று தனியார் தொழிற்சாலைகளுக்கான அடிக்கற்கள் நாட்டப்பட்டது
 16.04.2014 - புதன்கிழமை

அமைச்சர் டக்ளஸ் தேவானந்தா அவர்களது ஆலோசனை மற்றும் வழிகாட்டலுக்கு அமைவாக நிர்மாணிக்கப்பட்டு வரும் அச்சுவேலி கைத்தொழிற்பேட்டை வளாகத்தில் மூன்று தனியார் தொழிற்சாலைகளுக்கான அடிக்கற்கள் நாட்டி வைக்கப்பட்டன.

அச்சுவேலி கைத்தொழிற்பேட்டை வளாகத்தில் அடிக்கல் நாட்டும் நிகழ்வுகள் இன்றைய தினம் (16) இடம்பெற்றுள்ளன.

இதன்பிரகாரம் விவசாய நடவடிக்கைகளுக்கான யூனியன் என்ரபிறைஸ் பிளாஸ்ரிக் குழாய் தொழிற்சாலைக்கானதும், மீன்பிடி வலை மற்றும் அதுசார்ந்த தொழிற்சாலையான மல்வா தொழிற்சாலைக்கானதும், இவற்றுடன் ஜாம், நெல்லிகுறஸ் மற்றும் பப்படம் ஆகியவற்றின் உற்பத்திகளை முன்னெடுக்கும் வகையில் ஹேமா இன்டஸ்றீஸ் தொழிற்சாலைக்கானதுமான அடிக்கற்கள் நாட்டி வைக்கப்பட்டன.

இந்நிகழ்வுகளில் அடிக்கற்களை அமைச்சர் டக்ளஸ் தேவானந்தா அவர்களுடன் வடமாகாண ஆளுநர் ஜீ.ஏ சந்திரசிறி, இந்திய துணைத் தூதுவர் மகாலிங்கம் உள்ளிட்டோர் நாட்டி வைத்தனர்.

அமைச்சர் டக்ளஸ் தேவானந்தா அவர்களது ஆலோசனை மற்றும் வழிகாட்டலுக்கு அமைவாக அச்சுவேலி கைத்தொழிற்பேட்டையானது இந்திய அரசின் 225 மில்லியன் ரூபா நிதி உதவியுடனும், இலங்கை அரசின் 50 மில்லியன் ரூபா நிதி உதவியுடனும் உட்கட்டுமானப் பணிகள் முன்னெடுக்கப்பட்டு வரும் நிலையில்,  இன்றைய தினம் மூன்று தனியார் தொழிற்சாலைகளுக்கான அடிக்கற்கள் நாட்டி வைக்கப்பட்டன.

கைத்தொழிற்பேட்டை வளாகத்தில் குறித்த மூன்று தொழிற்சாலைகளுக்குமான அடிக்கற்கள் முதற்கட்டமாக நாட்டி வைக்கப்பட்டுள்ள நிலையில் ஏனைய தொழிற்சாலைகளுக்கான அடிக்கற்கள் விரைவில் நாட்டி வைக்கப்படவுள்ளமை குறிப்பிடத்தக்கது.

இதனிடையே தொழிற்துறை முதலீட்டாளர்களுடன் அமைச்சர், ஆளுநர் மற்றும் இந்திய துணைத்தூதுவர் உள்ளிட்டோர் கலந்துரையாடி அவர்களது தேவைகள் மற்றும் பிரச்சினைகள் தொடர்பிலும் கேட்டறிந்து கொண்டனர்.

இதன்போது, வலி.கிழக்கு பிரதேச செயலர் பிரதீபன், கைத்தொழிற் அபிவிருத்தி சபையின் பிரதிப் பணிப்பாளர் சிவகெங்காதரன், சம்பத் வங்கியின் பிராந்திய முகாமையாளர் சங்கர், ஈ.பி.டி.பியின் முன்னாள் பாராளுமன்ற உறுப்பினர் தவராசா, அமைச்சரின் யாழ்.மாவட்ட ஒருங்கிணைப்பாளர் கே.வி குகேந்திரன், ஈ.பி.டி.பியின் கோப்பாய் பிரதேச இணைப்பாளர் ஐங்கரன் ஆகியோருடன் குறித்த தொழிற்சாலைகளின் முதலீட்டாளர்களான பரராஜசிங்கம், காண்டீபன், சுரேஸ் உள்ளிட்டோர் உடனிருந்தனர்.

























 தேசிய மருந்துக் கொள்கை சட்டமூலம் அடுத்த மாதம் பாராளுமன்றத்தில்
 16.04.2014 - புதன்கிழமை

அரசாங்கத்தின் தேசிய மருந்துக் கொள்கை தொடர்பான சட்டத்திற்கு அமைய சகல மருந்து உற்பத்தியாளர்களும் மருந்து இறக்குமதியாளர்களும், மருந்து விற்பனையாளர்களும் தங்கள் பெயர் விபரங்களை பதிவு செய்வதற்காக புதிய அதிகார சபையொன்று அமைக்கப்பட்டிருப்பதுடன் அதன் கண்டிப்பான நடைமுறைகளுக்கு அமைய மேற்கண்ட தரப்பினர் செயற்பட வேண்டுமென்றும் அறிவிக்கப்படுகிறது.

தரம் குறைந்த மற்றும் காலாவதியான மருந்துகளை அப்பாவி பொதுமக்களுக்கு விற்பனை செய்து கொள்ளை இலாபம் அடிப்பதை தவிர்ப்பதற்கு புதிய அதிகார சபை வகை செய்யும். இதன் மூலம் மருந்துகளை வாங்குவதற்காக தங்கள் பணத்தை வீணாக்கும் பல்லாயிரக்கணக்கான நம்நாட்டு நோயாளிகளுக்கு அபயமளிக்கக்கூடியதாக இருக்கும்.

மருந்து வகைகள் தொடர்புடைய பொருட்கள் மற்றும் ஒப்பனைப் பொருட்கள் அதிகார சபை என்ற அமைப்பு மருந்து விற்பனையில் ஈடுபடும் சகலருக்கும் அனுமதிப்பத்திரங்களை வழங்கும் அதிகாரத்தைப் பெற்றுள்ளது. மருந்துகளை பழுதடையாமல் வைத்து நல்ல தரமான நிலையில் அவற்றை பொதுமக்களுக்கு விற்பனை செய்வதற்கும் இவ்வதிகாரசபை வகை செய்யும்.

தேசிய மருந்துகள் கொள்கை எதிர்வரும் மே மாதத்தில் பாராளுமன்றத்தில் சமர்ப்பிக்கப்படவுள்ளதாக அமைச்சர் மைத்திரிபால சிறிசேன தெரிவித்தார்.


 
     
 
15A, Layards Road, Colombo - 05, Sri Lanka.
Tel: 94 11 2503467 Fax: 94 11 2585255
E-Mail: epdp@sltnet.lk 
© 2008 www. epdpnews.com, All Rights Reserved.