seksseksseksadult
Home English Tamil
     
   
 
 வாழ்வாதாரத்தை பலப்படுத்தும் வகையில் தொழிற்துறைகள் மேம்படுத்தப்பட வேண்டும் - அமைச்சர் டக்ளஸ் தேவானந்தா
 26.11.2014 - புதன்கிழமை

யாழ்ப்பாணம் மின்சார நிலைய வீதியில் தற்காலிக வர்த்தக நிலையங்களை அமைத்து வர்த்தகர்கள் அமைச்சர் டக்ளஸ் தேவானந்தா அவர்களை சந்தித்து கலந்துரையாடியுள்ளனர்.

யாழ்ப்பாணத்தில் அமைந்துள்ள அமைச்சரின் செயலகத்தில் மேற்படி சந்திப்பு இன்றைய தினம் (26) இடம்பெற்றது.

இதன்போது வர்த்தகர்கள் தாம் எதிர்நோக்கும் பிரச்சினைகள் தொடர்பில் அமைச்சர் அவர்களிடம் தெளிவுபடுத்தினார்.

இதில் கருத்துத் தெரிவித்த அமைச்சர் அவர்கள் உங்களது வாழ்வாதாரத்தை பலப்படுத்தும் வகையில் தொழிற்துறைகள் முன்னெடுக்கப்பட வேண்டுமென்பதுடன் நகரின் சுத்தத்தை பாதுகாக்கும் வகையிலும் நீங்கள் நடந்து கொள்ள வேண்டுமென்றும் கேட்டுக் கொண்டார்.

இதனிடையே யாழ்ப்பாணம் குருநகர் கடற்றொழிலாளர் சங்கப் பிரதிநிதிகள் தமது தொழிற்துறை நடவடிக்கைகளில் தாம் எதிர்நோக்கும் இடர்பாடுகள் பிரச்சினைகள் தொடர்பிலும் அமைச்சர் அவர்களுடன் கலந்துரையாடியிருந்தனர்.

இதன்போது யாழ்.மாநகர முன்னாள் முதல்வர் திருமதி யோகேஸ்வரி பற்குணராசா உடனிருந்தார்.







 ஜனாதிபதி தேர்தல்  பணிகள் தொடர்பில் கட்சி ஆதரவாளர்கள், செயற்பாட்டாளர்களுடன் ஈ.பி.டி.பி பாராளுமன்ற உறுப்பினர் சந்திரகுமார் சந்தித்து கலந்துரையாடியுள்ளார்.
 26.11.2014 - புதன்கிழமை

எதிர்வரும் ஜனவரி மாதம் இடம்பெறவுள்ள ஜனாதிபதி தேர்தல் பணிகள் தொடர்பில் ஈழ மக்கள் ஜனநாயக கட்சியின் கிளிநொச்சி மாவட்ட உறுப்பினர்கள், அமைப்பாளர்கள், செயற்பாட்டாளர்களுடன் ஈ.பி.டி.பி பாராளுமன்ற உறுப்பினரும், பாராளுமன்றக் குழுக்களின் பிரதித் தலைவருமான முருகேசு சந்திரகுமார் அவர்கள் கலந்துரையாடியுள்ளார்.

தமிழ் மக்கள் கடந்த காலங்களில் உணர்ச்சிவசப்பட்டு மேற்கொள்ளப்பட்ட தீர்மானங்கள் போன்று அன்றி புத்தி பூர்வமாக நிதானமாக சிந்தித்து செயற்படுவதற்கு மக்களுக்கு தெளிவுப்படுத்த வேண்டும் எனவும், ஜனாதிபதி தேர்தலின் போது மக்களை கடந்த கால நடவடிக்கைகளை சீர்தூக்கி பார்த்து சாதக பாதக நிலைமைகளை ஆராய்ந்து முடிவுகளை எடுக்கும் வகையில் தமிழ் மக்களுக்கு உண்மை நிலைமைகளை தெரியப்படுத்த வேண்டும் எனவும்,  அந்த வகையில் யுத்தம் முடிவுக்கு கொண்டுவரப்பட்ட பின்னர் தற்போதைய ஜனாதிபதி மகிந்த ராஜபக்ஸ அவர்கள் மேற்கொண்ட நடவடிக்கைகள், அவரினால் முன்னெடுக்கப்பட்ட அபிவிருத்திப்பணிகள், உள்ளிட்ட பல்வேறு விடயங்களை மக்கள் கவனத்திற்குச் கொண்டு சென்று ஜனாதிபதி மகிந்த ராஜபக்ஸ அவர்களுக்கு பூரண ஆதரவினை வழங்கும் வகையில் செயற்பாடுகளை முன்னெடுக்க வேண்டும் எனவும் கேட்டுகொண்டார்.

இதன்போது ஈ.பி.டி.பி வடக்கு மாகாண சபை உறுப்பினர் வை.தவநாதன், பிரதேச சபைகளின் உறுப்பினர்கள் அமைப்பாளர்கள், செயற்பாட்டாளர்கள் ஆகியோர் கலந்துகொண்டனர்.






 நாங்களே தூங்கிக்கொண்டிருந்த மாகாணசபையை தட்டியெழுப்பினோம் - ஈ.பி.டி.பி பாராளுமன்ற உறுப்பினர்  முருகேசு சந்திரகுமார்
 26.11.2014 - புதன்கிழமை

கடந்த ஒரு வருடமாக ஒதுக்கப்பட்ட நிதியை மக்களின் நலன்களுக்காக செலவு செய்யாது தூங்கிக்கொண்டிருந்த வடக்கு மாகாண சபையை நாங்களே தட்டியெழுப்பியுள்ளோம். அதன் பின்னரே விழித்துக்கொண்டவர்கள் 70 வீதமான நிதியை ஒரு மாதத்திற்குள் செலவு செய்யப்போவதாக யாதார்த்திற்கு புறம்பாக கூறி வருகின்றனர் என ஈ.பி.டி.பி பாராளுமன்ற உறுப்பினரும் பாராளுமன்றக் குழுக்களின் பிரதித் தலைவருமான முருகேசு சந்திரகுமார் அவர்கள் தெரிவித்துள்ளார்.

இன்றையதினம் (26) யாழ்ப்பாண மாவட்டச் செயலகத்தில் பொருளாதார அபிவிருத்தி அமைச்சின் நிதி ஒதுக்கீட்டில் மேற்கொள்ளப்பட்ட பணிகளின் முன்னேற்ற மீளாய்வு கூட்டத்தில் கருத்து தெரிவிக்கும் போதே அவர் இவ்வாறு தெரிவித்துள்ளார்.

அங்கு அவர் மேலும் தெரிவிக்கையில்,

மாகாண சபைக்கு மத்திய அரசினால் பல்வேறு திட்டங்களுக்கு பல மில்லியன் ரூபாக்கள் ஒதுக்கப்பட்டுள்ளன. அந்த திட்டங்களை உரிய காலத்தில் மாகாண சபைக்கு கீழ் இயங்குகின்ற திணைகளங்களுக்கு ஆலோசனைகள் வழங்கி நடைமுறைப்படுத்த வேண்டிய பொறுப்பு மாகாண சபைக்கே உண்டு. அதற்கான அதிகாரங்களும் மாகாண சபையிடம் உள்ளது. ஆனால் அதனை அவர்கள் செய்வதாக இல்லை. நாங்கள் புள்ளிவிபர ரீதியாக ஆதாரத்துடன் வடக்கு மாகாண சபைக்கு ஒதுக்கப்பட்ட நிதி தொடர்பான விபரங்களை வெளிப்படுத்திய பின்னர் இப்பொழுது ஒரு மாத்திற்குள் செலவு செய்யப்பபோவதாக கதைவிடுகின்றனர். இதுவரைகாலமும் அரசினால் வடக்கு மாகாண அபிவிருத்திக்கு நிதி ஒதுக்கப்படவில்லை என மக்கள் மத்தியில் கூறி வந்தவர்களுக்கு ஒரு மாத்திற்குள் செலவு செய்வதற்கு எங்கிருந்து நிதி கிடைத்தது? எனவும் கேள்வி எழுப்பிய பாராளுமன்ற உறுப்பினர் அவர்கள்

அரசினால் எங்களுக்கு ஒதுக்கப்பட்ட நிதியை எவ்வாறு மக்களின் நலன்களுக்கு செலவு செய்வது என்பது தொடர்பில் முன்மொழிவுகளை மேற்கொள்ள வேண்டியது நாங்கள்தான். அதற்காக நாங்கள் எவரிடமும் அனுமதியோ ஆலோசனையோ பெறவேண்டிய தேவையில்லை. மக்களால் தெரிவு செய்யப்பட்ட பிரதிநிதிகள் என்றவகையில் முன்மொழிவுகளை அந்தந்த பாராளுமன்ற உறுப்பினரே தீர்மானிப்பர். அதேபோல் ஏனைய பாராளுமன்ற உறுப்பினர்களுக்கு ஒதுக்கப்படுகின்ற நிதியினை அவர்கள் செலவு செய்வது தொடர்பிலும் எம்மால் கேள்வி எழுப்ப முடியாது. அது அவர்களின் முன்மொழிவுகள் எனவும் குறிப்பிட்டார்.

அமைச்சர் டக்ளஸ் தேவானந்தா அவர்களின் தலைமையில் இடம்பெற்ற இக்  கூட்டத்தில் பாராளுமன்ற உறுப்பினர் சில்வேஸ்;திரி அலென்ரின் (உதயன்), யாழ். மாவட்ட அரச அதிபர் சுந்தரம் அருமைநாயகம், பொருளாதார அபிவிருத்தி அமைச்சின் வடக்கு பணிப்பாளர் வகாப்தீன், மற்றும் மாகாணசபை உறுப்ப்பினர்கள், பிரதேச சபைகளின் தவிசாளர்கள் திணைக்களங்களின் உயரதிகாரிகள் பிரதேச செயலாளர்கள் என  துறைசார்ந்த பலரும் கலந்தும் கொண்டனர்.









 நாவாந்துறை விளையாட்டுக் கழகத்திற்கு புதிய மைதானம். அமைச்சர் நேரில் ஆராய்வு.
 26.11.2014 - புதன்கிழமை

யாழ்ப்பாணம் நாவாந்துறை பகுதியில் புதிதாக மைதானம் அமைக்கப்படும் பொருட்டு உத்தேசிக்கப்பட்டுள்ள பகுதியை அமைச்சர் டக்ளஸ் தேவானந்தா அவர்கள் நேரில் பார்வையிட்டு அதன் நிர்மாணிப்பு குறித்து கலந்துரையாடியுள்ளார்.

நாவாந்துறைக்கு இன்றைய தினம் (26) விஜயம் மேற்கொண்ட அமைச்சர் அவர்கள் மேற்படி விடயம் தொடர்பில் கவனம் செலுத்தினார்.

இதன்போது நாவாந்துறை கடற்கரைப் பக்கமாக புதிதாக மைதானமொன்றை அமைப்பதற்கு ஏற்கனவே உத்தேசிக்கப்பட்டுள்ள நிலையில் அதனை நவீனமுறையில் புனரமைப்பதற்கு கவனம் செலுத்தப்பட்டது.

அதன்பிரகாரம் குறித்த மைதானத்தை செம்மைப்படுத்தும் பொருட்டு எடுக்கப்பட வேண்டிய நடவடிக்கைகள் தொடர்பில் அமைச்சர் அவர்கள் துறைசார்ந்தோருடன் கலந்துரையாடினார்.

இவ்வாறு அமைச்சர் டக்ளஸ் தேவானந்தா அவர்களது வழிகாட்டலுக்கு அமைவாக திருத்தப் பணிகள் முன்னெடுக்கப்படும் பட்சத்தில் அடுத்த வருடம் நாவாந்துறை விளையாட்டு கழகத்திற்கு புதிய மைதானமொன்று அமையப்பெறவுள்ளமை குறிப்பிடத்தக்கது.  

இதனிடையே ஏற்கனவே அங்கு நிலவிய முரண்பாடுகளை சுமூகமாக தீர்த்து வைத்த அமைச்சர் அவர்கள் மனக்கசப்புகளையும், குரோதங்களையும் மறந்து இருதரப்பும் ஒற்றுமையுடன் வாழ வேண்டுமென்பதே தமது விருப்பமென்றும் இன்றைய தினம் இருதரப்பு பிரதிநிதிகளையும் சந்தித்து கேட்டுக் கொண்டார்.  

இதன்போது ஈ.பி.டி.பியின் யாழ்.நகர இணைப்பாளர் துரைராசா இளங்கோ (றீகன்) உடனிருந்தார்.





 அழைப்பு விடுத்திருந்த போதும் வடக்கு மாகாண முதலமைச்சர் மீளாய்வுக் கூட்டத்தில் பங்கெடுக்கவில்லை - யாழ்.அரச அதிபர் சுட்டிக்காட்டு
 26.11.2014 - புதன்கிழமை

மத்திய மாகாண அரசுகள் இணைந்து மக்களின் வாழ்வாதாரத்தை மேம்படுத்தும் செயற்திட்டங்களை முன்னெடுக்க வேண்டுமென யாழ்.மாவட்ட அரசாங்க அதிபர் சுந்தரம் அருமைநாயகம் தெரிவித்துள்ளார்.

யாழ்.மாவட்ட செயலக கேட்போர்கூடத்தில் இன்றைய தினம் (26) பொருளாதார அபிவிருத்தி அமைச்சின் மூலம் முன்மொழியப்பட்ட அபிவிருத்தி மீளாய்வு கூட்டத்தில் கருத்துத் தெரிவிக்கும் போதே அவர் இவ்வாறு தெரிவித்துள்ளார்.

மத்திய அரசுடன் இணைந்து மாகாண அரசு மக்களின் வாழ்வாதாரத்தையும் அபிவிருத்தியையும் மேம்படுத்தும் பொருட்டு திட்டங்களை வகுத்து முன்னெடுக்க வேண்டும்.

இதனூடாகவே மக்களுக்கான முன்னேற்றங்களையும் அபிவிருத்திகளையும் உரிய காலத்தில் முன்னெடுக்க முடியுமென்றும் தெரிவித்தார்.
இதனிடையே வடக்கு மாகாண முதலமைச்சருக்கு இன்றைய மீளாய்வு கூட்டம் தொடர்பாக ஏற்கனவே அழைப்பு விடுக்கப்பட்ட போதிலும் குறித்த இக் கூட்டத்தைப் பற்றி தமக்கு எதுவும் தெரியாது என தமது முகவரியிட்டு கடிதமொன்றை எழுதியுள்ளதாக தெரிவித்த மாவட்ட அரசாங்க அதிபர் கடிதத்தையும் சபையில் சமர்ப்பித்ததுடன் இதுவிடயம் தொடர்பில் கவலையையும் விசனத்தையும் தெரிவித்தார்.

அத்துடன் இந்திய வீட்டுத்திட்;டத்தில் ஊழல் முறைகேடுகள் இருப்பதாக இந்தியாவில் கருத்துத் தெரிவித்ததை அமைச்சர் டக்ளஸ் தேவானந்தா அவர்கள் சுட்டிக்காட்டி இதுவிடயம் தொடர்பில் பிரதேச செயலர்களின் கருத்துக்களை கேட்டறிந்து கொண்டார்

இதன்போது பிரதேச செயலர்கள் தெரிவிக்கும் போது இந்திய வீட்டுத் திட்டத்தின் பயனாளிகள் தெரிவு வெளிப்படைத்தன்மையுடன் ஒளிவுமறைவின்றி இடம்பெறுவதாக சுட்டிக்காட்டிய அதேவேளை, முதலமைச்சரின் இக்கூற்றானது தமக்கு வேதனையளிப்பதாகவும் தெரிவித்துள்ளனர்.

இன்றைய இம் மீளாய்வுக் கூட்டத்தில் வடக்கு மாகாண சபை ஆளுங்கட்சி உறுப்பினர்கள் மாறுபட்ட முரண்பாடான கருத்துக்களை கூறியிருந்தனர்.
அத்துடன், மத்தியரசின் நிதியுதவியுடன் முன்னெடுக்கப்பட்டு வரும் அபிவிருத்தி செயற்திட்டங்களை மாகாணசபையூடாக முன்னெடுக்கப்பட்டு வருவதாக கூறியிருந்தனர்.

இதனால் மீளாய்வு கூட்டத்தின் போது வாதப் பிரதி வாதங்களும் இடம்பெற்றன.

இந்நிலையில் தமிழ்த் தேசியக் கூட்டமைப்பின் மாகாண சபை உறுப்பினர்களின் அறிவிலித்தனம் நகைப்பிடமாக இருந்ததாக எமது செய்தியாளர் தெரிவித்துள்ளார்.



 வடபகுதியின் காலநிலைக்கு ஏற்ற வகையில்; விவசாய உள்ளீடுகளை உற்பத்தி செய்ய அமைச்சர் பணிப்பு
 26.11.2014 - புதன்கிழமை

வடபகுதியின் காலநிலைக்கு ஏற்ற வகையில் எதிர்காலத்தில் விவசாய உள்ளீடுகளை உள்ளூரில் உற்பத்தி செய்து பொதுமக்களுக்கு வழங்கப்படுவதற்கு நடவடிக்கை முன்னெடுக்கப்பட வேண்டுமென யாழ்.மாவட்ட கமநல சேவைகள் திணைக்களத்திற்கு அமைச்சர் டக்ளஸ் தேவானந்தா அவர்கள் பணிப்புரை விடுத்துள்ளார்.

யாழ்.மாவட்ட செயலக கேட்போர்கூடத்தில் இன்றைய தினம் (26) பொருளாதார அபிவிருத்தி அமைச்சின் மூலம் முன்மொழியப்பட்ட அபிவிருத்தி மீளாய்வு கூட்டத்திலேயே அவர் இந்த வேண்டுகோளை விடுத்துள்ளார்.

இதன்போது தெற்கிலிருந்து கொண்டு வரப்படும் விதை தானியங்கள் உள்ளிட்ட விவசாய உள்ளீடுகள் வடக்கில் பயிரிடப்படும் போது முழுமையான பயன்களை பெறமுடியாதுள்ளதாக மக்கள் பிரதிநிதிகளால் சுட்டிக்காட்டப்பட்டது.

இதனடிப்படையில் ஆராய்ந்த அமைச்சர் அவர்கள், மக்களும், விவசாயிகளும் முழுமையான பயன்களைப் பெற்றுக் கொள்ளும் வகையில் விவசாய உள்ளீடுகளை உள்ளூரில் உற்பத்தி செய்து விநியோகிப்பதற்கு எதிர்காலத்தில் உரிய நடவடிக்கைகள் முன்னெடுக்கப்பட வேண்டும்.
அத்துடன், எமது சூழலுக்கு ஏற்ற வகையில் நல்லின கால்நடைகளை உற்பத்தி செய்வதன் ஊடாக துறைசார்ந்தவர்களது வாழ்வாதாரத்தையும் பொருளாதாரத்தையும் மேம்படுத்தக் கூடிய வகையில் மாவட்ட கமநல சேவைகள் திணைக்களமும், கால்நடை அபிவிருத்தி திணைக்களம் என்பன நடவடிக்கைகளை முன்னெடுக்க வேண்டுமெனவும் அமைச்சர் அவர்கள் பணிப்புரை விடுத்தார்.

அத்துடன் மக்களுக்கு உண்மையான செய்திகளை வழங்கும் வகையில் பத்திரிகைகள் உண்மைத்தன்மையான செய்திகளை வெளியிட வேண்டுமென்பதுடன் அரசின் கொள்கைத் திட்டங்களுக்கு அமையவே திட்டங்கள் வகுக்கப்பட்டு நடைமுறைப்படுத்தப்படல் வேண்டுமென்றும் தெரிவித்தார்.

இதனிடையே இவ்வாண்டுக்குரிய செயற்திட்டங்கள் இதுவரை நிறைவு செய்யப்படாத விடத்து அவற்றை  இவ்வாண்டு இறுதிக்குள் நடைமுறைப்படுத்துமாறும் அமைச்சர் அவர்கள் துறைசார்ந்தோரிடம் கேட்டுக் கொண்டார்.

இக்கலந்;துரையாடலில் வாழ்வின் எழுச்சி தேசிய நிகழ்ச்சித் திட்டத்தின் ஆறாம் கட்டத்திற்காக மாவட்ட மட்டத்தில் இதுவரையில் முன்னெடுக்கப்பட்ட செயற்திட்டங்கள் தொடர்பில் விரிவாக ஆராயப்பட்டது.
இதேபோன்று, ஏற்கனவே பயனாளிகளுக்கு வழங்கப்பட்ட விவசாய உள்ளீடுகளின் முன்னேற்றங்கள் குறித்தும் ஆராயப்பட்டது.

இதேபோன்று, நடப்பாண்டில் யாழ்.மாவட்ட பாராளுமன்ற உறுப்பினர்களின் பன்முகப்படுத்தப்பட்ட வரவு செலவுத் திட்டத்தில் பிரதேச சபை ரீதியாகவும்,  பிரதேச செயலாளர் பிரிவு ரீதியாகவும், வலயக் கல்வி அலுவலகங்கள், கூட்டுறவு அபிவிருத்தி திணைக்களம், மீன்பிடி நீரியல் வளத்திணைக்களம், சுகாதார திணைக்களம் உள்ளிட்ட நிறுவனங்களினால் 21.11.2014 வரை செயற்படுத்தப்பட்ட திட்டங்கள் தொடர்பில் விரிவாக கலந்துரையாடப்பட்டது.

இதனிடையே ஈழ மக்கள் ஜனநாயகக் கட்சியின் பாராளுமன்ற உறுப்பினர்களான அமைச்சர் டக்ளஸ் தேவானந்தா மற்றும் சில்வேஸ்திரி அலென்ரின் (உதயன்) ஆகியோரின் விசேட நிதியொதுக்கீடாக கிடைக்கப் பெற்ற தலா 25 மில்லியன் வீதம் 50 மில்லியன் ரூபா நிதியொதுக்கீட்டுடனும் இதைவிட அமைச்சர் டக்ளஸ் தேவானந்தா அவர்களினால் மேலதிகமாக கிடைக்கப் பெற்ற 25 மில்லியன் ரூபா நிதியொதுக்கீட்டுடனும் யாழ்.மாவட்டத்தில் மக்கள் பிரதிநிதிகளால் முன்மொழியப்பட்ட விசேட திட்டங்கள் 2014 இன் பிரகாரம் பிரதேச செயலர் பிரிவு ரீதியாக நடைமுறைப்படுத்தப்படும் செயற்திட்டங்கள் தொடர்பிலும் கலந்துரையாடப்பட்டது.

அத்துடன் மக்கள் பிரதிநிதிகளால் நடப்பாண்டில் முன்மொழியப்பட்ட விசேட திட்டங்கள் தொடர்பிலும் ஆராயப்பட்டது.

இதன்போது மாவட்டத்தில் முன்னெடுக்கப்பட்டு வரும் ஏனைய பல்வேறு அபிவிருத்தி செயற்திட்டங்கள் தொடர்பிலும் கவனம் செலுத்தப்பட்டு விரிவாக ஆராயப்பட்டமை குறிப்பிடத்தக்கது.

இதனிடையே யாழ்.மாவட்டத்தில் குளிர்பான உற்பத்தியாளர்கள் எதிர்நோக்கும் இடர்பாடுகள் பிரச்சினைகள் குறித்தும் அவதானம் செலுத்தப்பட்டிருந்தது.

இதில் ஈ.பி.டி.பி பாராளுமன்ற உறுப்பினரும், பாராளுமன்றக் குழுக்களின் பிரதித் தலைவருமான முருகேசு சந்திரகுமார், ஈ.பி.டி.பி பாராளுமன்ற உறுப்பினர் சில்வேஸ்திரி அலென்ரின் (உதயன்) மாவட்ட அரசாங்க அதிபர் சுந்தரம் அருமைநாயகம், பொருளாதார அபிவிருத்தி அமைச்சின் பணிப்பாளர் வஹாப்தீன் மற்றும் வடக்கு மாகாண சபை எதிர்க்கட்சித் தலைவர் தவராசா உள்ளிட்ட மாகாண சபை உறுப்பினர்கள், பிரதேச செயலர்கள், அமைச்சரின் இணைப்பாளர்கள் உள்ளிட்டோர் உடனிருந்தனர். 
















 நாவாந்துறைப் பகுதியின் தற்போதைய நிலவரம் தொடர்பில் அமைச்சர் நேரில் ஆராய்வு!
 26.11.2014 - புதன்கிழமை

யாழ்ப்பாணம் நாவாந்துறைப் பகுதியின் தற்போதைய நிலவரம் தொடர்பில் அமைச்சர் டக்ளஸ் தேவானந்தா அவர்கள் நேரில் ஆராய்ந்தறிந்து கொண்டார்.

நாவாந்துறைப் பகுதிக்கு இன்றைய தினம்(26) விஜயம் மேற்கொண்ட அமைச்சர் அவர்கள் அங்குள்ள தற்போதைய நிலவரம் தொடர்பில் நேரில் சென்று மக்களுடன் கலந்துரையாடி கேட்டறிந்தார்.

இதன்பிரகாரம் நாவாந்துறை சந்தைக்கு விஜயம் மேற்கொண்ட அமைச்சர் அவர்கள், அங்கு கூடியிருந்த மக்களுடனும் வியாபாரிகளுடனும் கலந்துரையாடினார்.

அத்துடன், மண்பிட்டி பகுதிக்கும் சென்ற அமைச்சர் அவர்கள் மக்களுடன் கலந்துரையாடியதை அடுத்து நாவாந்துறை இறங்குதுறையையும் பார்வையிட்டார்.

இதேவேளை, அண்மையில் இடம்பெற்ற இருகுழுக்களுக்கு இடையிலான முரண்பாடுகளால் ஏற்பட்ட சேதவிபரங்கள் தொடர்பிலும், பாதிக்கப்பட்ட மக்களுடனும் அமைச்சர் அவர்கள் கலந்துரையாடியதுடன் அதுதொடர்பில் கேட்டறிந்து கொண்டார்.

இதனிடையே முரண்பாடுகளை மேலும் தொடராத வகையில் அமைதியும், பொறுமையும் காக்குமாறு அமைச்சர் அவர்கள் வேண்டுகோள் விடுத்தார்.
அத்துடன் யாழ்.பொலிஸ் நிலையத்திற்கு சென்ற அமைச்சர் அவர்கள் குறித்த சம்பவம் தொடர்பில் கைது செய்யப்பட்டு தடுத்து வைக்கப்பட்டுள்ளவர்களை விடுவிப்பது தொடர்பிலும் யாழ்.பொலிஸ் நிலைய பொறுப்பதிகாரி பாலசிறியுடன் கலந்துரையாடியதை அடுத்து கைதிகளை விடுவிப்பதற்கும் நடவடிக்கை முன்னெடுக்கப்படுமென்றும் உறவினர்களுக்கு தெரிவித்தார்.











 வருடத்தின் நிறைவடைந்த காலப்பகுதியினுள் 38 ஆயிரத்து 751 டெங்கு தொற்றாளர்கள்
 26.11.2014 - புதன்கிழமை

வருடத்தின் நிறைவடைந்த காலப்பகுதியினுள் 38 ஆயிரத்து 751 டெங்கு நோயாளர்கள் இனங்காணப்பட்டுள்ளதாக சுகாதார அமைச்சின் தொற்று நோய் பிரிவு தெரிவித்துள்ளது.

டெங்கு நோய் தொற்று காரணமாக கடந்த வருடம் 32 ஆயிரத்து 63 பேரே பாதிக்கப்பட்டிருந்தனர்.

இதற்கமைய கடந்த வருடத்துடன் ஒப்பிடுகையில் இந்த வருடம் அதிகளவிலான டெங்கு நோயாளர்கள் இனங்காணப்பட்டுள்ளனர். டெங்கு நோய் தொற்று காரணமாக மேல் மாகாணத்தை சேர்ந்தவர்களே அதிகளவில் பாதிக்கப்பட்டுள்ளனர்.

இந்தநிலையில் 56 சதவீதமான டெங்கு நோயினால் பாதிக்கப்பட்டுள்ளதாக சுகாதார அமைச்சின் தொற்று நோய் பிரிவு குறிப்பிட்டுள்ளது. நிலவும் சீரற்ற காலநிலை காரணமாக நுளம்பு குடம்பிகளின் எண்ணிக்கை அதிகரித்துள்ளதாகவும் தெரிவிக்கப்பட்டுள்ளது.


 18 ஆவது சார்க் அரச தலைவர்கள் மாநாடு காத்மண்டுவில் இன்று ஆரம்பம்!
 26.11.2014 -புதன்கிழமை

18 ஆவது  சார்க்  அரச தலைவர்களின் மாநாடு நேபாளத்தின் காத்மண்டுவில் இன்று ஆரம்பமாக உள்ளது.

இந்த மாநாட்டில் ஜனாதிபதி மஹிந்த ராஜபக்ஸ உள்ளிட்ட சார்க்  நாடுகளின் தலைவர்கள் கலந்து கொண்டுள்ளமை குறிப்பிடத்தக்கது.

சமாதானம் மற்றும் சுபீட்சத்திற்காக மேலும் ஒன்றிணைவோம் என்ற தலைப்பில் இம்முறை சார்க் அரச தலைவர்களின் மாநாடு இடம்பெறவுள்ளது.
இந்த மாநாட்டில் ஜனாதிபதி உரைநிகழ்த்தவுள்ளதாக  ஜனாதிபதியின் பேச்சாளர் மொஹான் சமரநாயக்க தெரிவித்தார்.

மாநாட்டின் பின்னர் சார்க் வலய நாடுகளின் அரச தலைவர்களுடன் ஜனாதிபதி விஷேட கலந்துரையாடல்களையும் முன்னெடுக்கவுள்ளார்.

மாநாட்டில் கலந்து கொள்வதற்காக நேபாளத்தை சென்றடைந்த ஜனாதிபதி புத்தர் பிறந்த இடமான லும்பினியவிற்கு சென்று வழிபாடுகளில் ஈடுப்பட்டதாக ஜனாதிபதி ஊடக பிரிவு தெரிவித்துள்ளது.


 இலங்கைக்கும் இங்கிலாந்துக்கும் இடையிலான ஒருநாள் சர்வதேச போட்டி இன்று!
 26.11.2014 புதன்கிழமை  

விளையாட்டுச் சுற்றுலாவை மேற்கொண்டு இலங்கைக்கு வந்துள்ள இங்கிலாந்து அணியினருக்கும் இலங்கை அணியினருக்கும் இடையிலான ஏழு ஒருநாள் சர்வதேச போட்டிகளில் முதலாவது ஒருநாள் சர்வதேச போட்டி இன்று (26) கொழும்பு ஆர். பிரேமதாஸ விளையாட்டரங்கில் இடம்பெறவுள்ளது

50 ஓவர்களைக் கொண்ட இச்சுற்றுத் தொடரில் இலங்கை நேரப்படி பிற்பகல் 02.30 க்கு ஆரம்பமாகவுள்ள இச்சுற்றுத்தொடரில் அஞ்சலோ மத்யூஸ் தலைமையிலான இலங்கையணியும், ஏ.என் குக் தலைமையிலான இங்கிலாந்து அணியினரும் பங்குகொள்ளவுள்ளனர்.


 காரைநகரில் புதிய பொலிஸ் நிலைய அங்குராப்பணம்!
 26.11.2014 புதன்கிழமை  
 
காரைநகர் பிரதான வீதியில் அமைந்துள்ள பொலிஸ் நிலையத்தினை பிரதேச செயலர் திருமதி பாபு அவர்கள் நாடாவெட்டி திறந்து வைத்தார்.

இந் நிகழ்வில் ஊர்காவற்துறை பொலிஸ் அத்தியட்சகர் மற்றும் பொலிஸ் உயர் அதிகாரிகள், காரைநகர் பிரதேசசபை எதிர்க்கட்சி தலைவரும் ஈழமக்கள் ஜனநாயகக் கட்சியின் காரைநகர் பிரதேச இணைப்பாளருமான வீ.கண்ணன், பிரதேச சபை எதிர்க்கட்சி உறுப்பினர் பாலச்சந்திரன், கிராம சேவையாளர்கள் கிராம பொது அமைப்புக்களின் தலைவர்கள், பாடசாலை அதிபர்கள், மாணவர்கள், பொதுமக்கள், சமய குருமார்கள் கலந்து சிறப்பித்து வாழ்த்து தெரிவித்தனர்.







 இயக்கச்சியில் நிலமற்ற மக்களுக்கு 15 ஏக்கர் காணியை கொடையாக வழங்கிய புலம் பெயர் தமிழர் - ஈ.பி.டி.பி பாராளுமன்ற உறுப்பினர் சந்திரகுமார் பாராட்டு
 26.11.2014 - புதன்கிழமை

இயக்கச்சி பனிக்கையடியில் வாழ்விடமற்று தவித்த மக்களுக்கு தனது காணியில்  15 ஏக்கரை நன்கொடையாக வழங்கிய சுரேஸ்மேத்தர் அவர்களின் மன உணர்வை பாராளுமன்ற உறுப்பினரும் பாராளுமன்றக்குழுக்களின் பிரதித்தலைவருமான முருகேசு சந்திரகுமார் அவர்கள் பாராட்டியுள்ளார்.

நேற்று பனிக்கையடியில் காணிகள் வழங்கப்பட்ட 57 குடும்பங்களுக்கு காணி உறுதிப்பத்திரங்களை வழங்கி வைத்து உரையாற்றும்போதே அவர் தனது வாழ்த்துக்களை தெரிவித்தார்.

மிகப் பெரும் நிலப்பரப்பை உடைமையாகக் கொண்டுள்ள போதும் இருப்பிடமற்று தவிக்கும் மக்களுக்கு ஒரு அடி நிலத்தைக்கூட வழங்க மறுக்கின்ற பெரும் நில உடைமையாளர்கள் வாழ்கின்ற சூழலில் சுமார் 15 ஏக்கர் காணியை மக்களுக்கு வழங்கிய சுரேஸ் மேத்தர் அவர்களின் கொடை வரவேற்புக்குரியது அவரின் இந்தச் செயற்பாடு ஏனையோருக்கும் முன்மாதிரியாக அமைய வேண்டும் எனவும் அவர் தெரிவித்துள்ளார்.

அங்கு அவர் மேலும் உரையாற்றுகையில்  கடந்த மூன்று வருடங்களுக்கு முன்னர் இயக்கச்சி பனிக்கையடியில மக்கள் மீள்குடியேற்றப்பட்டபோது  சொந்தமாக நிலம் கூட இல்லாத நிலையில் எதிர்காலம் பற்றிய ஏக்கத்தோடும் கேள்விக்குறியோடுமே குடியேறினார்கள் எனவே  இந்த மக்கள் மீது கரிசனை கொண்டு நாம் அவர்களின் தேவைகளை நிவர்த்தி செய்வது தொடர்பாக மக்களுடன் கலந்துரையாடினோம்.

அப்போது அவர்கள் தமக்கு  நிரந்தர இருப்பிடமொன்றை அமைப்பதற்கான காணி தேவை என கோரிக்கைவிடுத்தார்கள். தொடர்ந்து இங்கு மக்கள் தற்காலிகமாக குடியிருக்கும் காணியின் உரிமையாளரான சுரேஸ்மேத்தர் அவர்களுடன் பேசினோம்  அவரும் சுமார் 15 ஏக்கர் காணியை மக்களுக்கு வழங்குவதற்கு சம்மதித்தார் அதற்கமைவாக குடும்பம் ஒன்றுக்கு நான்கு பரப்பு என்ற அடிப்படையில் காணிகள் அளவீடு செய்து வழங்கப்பட்டு இன்று மக்களுக்கான நிரந்தர வீடுகளும் அமைத்துக்கொடுக்கப்பட்டுள்ள நிலையில் மக்கள் நிரந்தரமான வாழ்க்கை சூழலுக்கு கொண்டு வரப்பட்டுள்ளனர். இந்நிலையில் இன்று அவர்களுக்கான காணி உறுதிப்பத்திரங்களை வழங்குவதில் நாம் மகிழ்வடைகின்றோம் எனக் குறிப்பிட்ட பாராளுமன்ற உறுப்பினர் அவர்கள்

எனது அரசியல் அனுபவத்தில் இவ்விடயத்தினை ஒரு முன்மாதிரியான விடயமாகவே கருதுகின்றேன் ஏனெனில் இம் மக்களுக்கான இருப்பிடத்தை வழங்குவதற்கு நாம் முயற்சிகளை முன்னெடுத்த போது அவர்களின் உண்மைநிலையினை உணரந்து அவர்களுக்கு உதவ முன்வந்தவர் சுரேஸ் மேத்தர் அவர்கள்.  நாளந்தம் காணிகளின் விலை பன்மடங்கு அதிகரித்து வரும் இந்த காலச்சூழலில்;; பல நூற்றுக்கணக்கான ஏக்கர் காணியை உடைமையாகக் கொண்டுள்ளவர்கள் ஒரு அடி நிலத்திற்காகவே சண்டையிட்டு வருகின்ற இன்றைய காலத்தில் 15 ஏக்கர் நிலத்தை மக்களுக்காக மனமுவர்ந்து கொடையாக வழங்கியமை வரவேற்புக்குரியது.

பளைப்பிரதேசத்திலேயே பெரும் நிலப்பரப்பை உடைமையாகக் கொண்ட முன்னால் அரசியல்வாதிகள் உள்ளனர். அவர்களின் வாரிசுகள் இன்றும் அரசியலில் இருக்கின்றார்கள் ஆனால் அவர்களுக்கெல்லாம் வராத உணர்வு திரு சுரேஸ் மேத்தர் அவர்களுக்கு வந்துள்ளது. இது அவரின் மனிதத் தன்மையை வெளிப்படுத்தி நிற்கின்றது எனவும் தெரிவித்தார்.
மேலும், ஆரம்பத்தில் நில உரிமையைக்கோரியே போராட்டங்கள் தொடங்கின அதனால் மக்கள் பாரிய இழப்புக்களையும் அவலங்களையும் சந்தித்த நிலையில் இன்று அவை அனைத்தும் முடிவுக்கு வந்துள்ளபோது. இருப்பினும் எமது மக்கள் இன்றும் இருப்பிடங்களுக்காக பெரும் நில உடைமையாளர்களுடன் போராட வேண்டிய நிலையில் உள்ளனர் இவ்வாறு வன்னி மாவட்டங்களில் வாழ்கின்ற சுமார் 7500 வரையான குடும்பங்ளின் வாழ்க்கை கேள்விக்குறியான நிலைக்கு தள்ளப்பட்டுள்ளது. அதாவது 1970 ஆம் ஆண்டுகளில் நாட்டின் உணவு உற்பத்தியை மேம்படுத்தும் நோக்குடன் அரசாங்கத்தால் பல திட்டங்களுக்கூடாக வழங்கப்பட்ட பல ஏக்கர் காணிகள் அன்று காணிகளைப் பெற்றுக் கொண்டவர்கள் அவற்றைக் கைவிட்டு  சென்ற நிலையில் அவற்றில் அன்று  இருப்பிடமற்று தவித்துக்கொண்டிருந்த ஏழை மக்கள் குடியமர்ந்து  வாழ்ந்தனர்.

கடந்த முப்பது வருடங்களுக்கு மேலாக அவர்கள் குடியிருக்கின்;ற நிலையில் அன்று காணிகளைப் பெற்றவர்கள் மீளவும் அக்காணிகளுக்கு உரிமை கோருகின்றனர். இதனால் வறுமை கோட்டுக்குட்பட்ட அந்த மக்கள் வீட்டுத்திட்டம் உட்பட எவ்வித உதவிகளையும் பெறமுடியாத நிலையில் வாழ்ந்துகொண்டிருக்கின்றார்கள் இவர்களுக்கு ஒரு நீதியான தீர்வு கிட்ட வேண்டும் என்பதற்காக நாம் தொடர்ந்தும் குரல் கொடுத்து வருகின்றோம் இதேவேளை வலிவடக்கு போன்ற பகுதிகளில் இராணுவத்தினரின் ஆளுகைக்குள் இருக்கின்ற மக்களின் நிலங்கள்; மீட்கப்பட்டு அங்கும் மக்கள் குடியமர்த்தப்பட வேண்டும். இவ்வாறான பல சவால்களை நாம் இன்று எதிர்கொண்டு வருகின்றோம்.

இதேவேளை பெரும் நில உடைமையாளர்களின் காணிகள் பராமரிப்பற்ற நிலையில் இருக்கின்றன அவை இங்கு வாழ்ந்துகொண்டிருக்கும் மக்களின் வாழ்வியலுக்கு இடையூறாகவும்  அமைந்துள்ளன. எனவே அக்காணிகள் அபிவிருத்தி செய்யப்பட்டு இங்கு வாழ்கின்ற மக்களுக்கு தொழில்வாய்ப்புக்களை வழங்கும் வகைளில் தொழில் மையங்கள் உருவாக்கப்பட வேண்டும். அல்லது இருப்பிடமற்று தவித்துக்கொண்டிருக்கும் மக்களுக்கு பிரித்து வழங்கப்பட வேண்டும் எனக் குறிப்பிட்ட அவர் பளைப்பிரதேசத்தில் வனவளத்திணைக்களத்திற்குரிய காணிகளை நாம் மக்களுக்கு வழங்கியிருக்கின்றோம் ஆனால் தனியாருக்கு சொந்தமான காணிகள் இன்றும் பராமரிப்பற்று கிடக்கின்றது  எனவே சுரேஸ் மேத்தர் போன்றோரின் செயற்பாடுகளை ஏனையோர் முன்மாதிரியாகக் கொள்ள வேண்டும்  என அவர் மேலும் குறிப்பிட்டார்.

இதேவேளை  குறித்த காணியை கொடையாக வழங்கிய சுரேஸ் மேத்தர் அவர்களின் தந்தையார் வில்லியம் மேத்தர் அவர்களின் பெயரை இக்குடியிருப்பிற்கு சூட்டுவது பொருத்தமானது எனவும் பாராளுமன்ற உறுப்பினர் மு.சந்திரகுமார் அவர்கள் மேலும் தெரிவித்தார்.
இந்நிகழ்வில் சுரேஸ்மேத்தர் அவர்கள் தனது காணியை வழங்கிய 57 குடும்பங்களுக்குமான காணி உறுதிப்பத்திரங்களிலும்  கையொப்பமிட்டார். தொடர்ந்து காணி உறுதிப்பத்தரங்களை பாராளுமன்ற உறுப்பினர் மு.சந்திரகுமார் அவர்கள் வழங்கினார்.

இந்நிகழ்வில் பச்சிலைப்பள்ளி பிரதேசசபை உறுப்பினர் அன்ரன் அன்பழகன் பச்சிலைப்பள்ளி பிரதேச செயலர் திருமதி ஜெயராணி காணி உரிமையாளர் சுரேஸ்மேத்தர் மற்றும் காணி பச்சிலைப்பள்ளி காணி உத்தியோகத்தர் கிராமசேவையாளர் சமுர்த்தி அபிவிருத்தி உத்தியோகத்தர் கிராம அபிவிருத்திச்சங்கத்தினர் பொதுமக்கள் எனப்பலர் கலந்து கொண்டனர்.








 எதிர்காலத்தில் தவறான வழிநடத்தல்களுக்கு எமது சமூகம் ஒருபோதும் எடுபடக் கூடாது - அமைச்சர் டக்ளஸ் தேவானந்தா
 25.11.2014 - செவ்வாய்க்கிழமை  

எதிர்காலத்தில் தவறான வழிநடத்தல்களுக்கு எமது சமூகம் ஒருபோதும் எடுபடக் கூடாது எனவும் அதன்மூலம் பிரச்சினைகளுக்கு தீர்வு காணமுடியாது எனவும் அமைச்சர் டக்ளஸ் தேவானந்தா அவர்கள் தெரிவித்துள்ளார்.

யாழ்ப்பாணத்தில் அமைந்துள்ள அமைச்சரின் செயலகத்தில் இன்றைய தினம் (25) இடம்பெற்ற இலங்கை மின்சார சபையின் மனிதவள உத்தியோகத்தர்களுடனான கலந்துரையாடலின் போதே அவர் இவ்வாறு தெரிவித்துள்ளார்.

அவர் மேலும் தெரிவிக்கையில், கடந்த காலங்களில் தவறான வழிநடத்தல்களால் எமது மக்கள் பட்ட துன்ப துயரங்களை கருத்தில் கொண்டு எதிர்காலங்களில் தவறான வழிநடத்தல்களுக்கு ஒருபோதும் இடமளிக்க வேண்டாம்.

எமது மக்களின் பிரச்சினைகளுக்கு அரசுடன் பேசியே தீர்வுகாண முடியுமென்பதுடன் கோரிக்கைகளுக்கும் உரிய தீர்வுகளைப் பெற்றுக் கொள்ள முடியும்.

எனவே, எதிர்காலங்களில் கிடைக்கின்ற வாய்ப்புக்களை எமது மக்கள் சரியாக பயன்படுத்தும் பட்சத்தில் அவர்களது வாழ்வாதாரமும் பொருளாதாரமும் முன்னேற்றம் காண முடியுமென்றும் சுட்டிக்காட்டினார்.

இதனடிப்படையில்தான் ஒளிமயமான வாழ்க்கையையும் நம்பிக்கையான எதிர்காலத்தையும் பெற்றுக் கொடுக்கும் எமது முயற்சிக்கு எல்லோரும் ஒன்றிணைந்த பங்களிப்பை வழங்க வேண்டுமென்றும் கேட்டுக் கொண்டார்.

இதில் யாழ்ப்பாணம் கிளிநொச்சி மாவட்டங்களைச் சேர்ந்த இலங்கை மின்சார சபையின் மனிதவள உத்தியோகத்தர்கள் பங்கு பற்றியிருந்தனர்.  
இதனிடையே அகில இலங்கை அரசாங்க பொது ஊழியர் சங்க பிரதிநிதிகள், வடபிராந்திய ஐக்கிய தொழிலாளர் சங்கப் பிரதிநிதிகளும் அமைச்சர் அவர்களுடன் கலந்துரையாடி அவர்களது பிரச்சினைகள் தேவைப்பாடுகள் தொடர்பிலும் கேட்டறிந்து கொண்டார்.

இதன்போது வடக்கு மாகாண ஆளுநர் சந்திரசிறி, யாழ்.நகர மின்அத்தியட்சகர் அருள்நாதன், அமைச்சரின் யாழ்.மாவட்ட ஒருங்கிணைப்பாளர் குகேந்திரன், அமைச்சரின் ஆலோசகர் சுந்தரம் டிவகலால, யாழ்.மாநகர முன்னாள் முதல்வர் திருமதி யோகேஸ்வரி பற்குணராசா ஆகியோர் உடனிருந்தனர்.











 யாழ்.கொட்டடி மீனாட்சியம்மன் மீனாட்சிபுரம் மக்கள் குடியிருப்பு பகுதிகளில் தேங்கியுள்ள மழைநீரை உடனடியாக அகற்ற அமைச்சர் அவசர பணிப்புரை!
 25.11.2014 - செவ்வாய்க்கிழமை  

யாழ்ப்பாணம் கொட்டடி மீனாட்சியம்மன் மற்றும் மீனாட்சிபுரம் மக்கள் குடியிருப்பு பகுதிகளில் தேங்கியுள்ள மழைநீரை அகற்றி மக்களின் இயல்பு வாழ்க்கைக்கு உதவுமாறு யாழ்.மாநகர ஆணையாளர் பிரணவநாதனுக்கு அமைச்சர் டக்ளஸ் தேவானந்தா அவர்கள் அவசர பணிப்புரை விடுத்துள்ளார்.

கொட்டடி பகுதியிலுள்ள மீனாட்சியம்மன் மற்றும் மீனாட்சிபுரம் கிராமத்திற்கு அமைச்சர் அவர்கள் இன்றைய தினம் (25) நேரடியாக விஜயம் மேற்கொண்டு மக்களின் அவலநிலை தொடர்பில் நேரில் ஆராய்ந்தறிந்து கொண்டதையடுத்தே இப்பணிப்புரை விடுக்கப்பட்டுள்ளது.

பருவமழை தொடங்கியுள்ள நிலையில் குறித்த கிராமத்திலுள்ள மக்கள் குடியிருப்புகளில் மழைநீர் தேங்கியுள்ளது.

இவ்வாறு தேங்கியுள்ள மழைநீரை வடிகான்கள் ஊடாக உடனடியாக கடலுக்கு கொண்டு செல்வதற்கும் மக்களின் இயல்பு வாழ்விற்கு உதவும் வகையில் எடுக்கப்படவேண்டிய நடவடிக்கைகள் தொடர்பில் அமைச்சர் அவர்கள் துறைசார்ந்தோருடன் கலந்துரையாடி கேட்டறிந்து கொண்டார்.

இதன்பிரகாரம் யாழ்.மாநகர சபையூடாக நாளையதினமே மழைநீரை வெளியேற்றுமாறு மாநகர ஆணையாளர் பிரணவநாதனிடம் பணிப்புரை விடுத்த அமைச்சர் அவர்கள், அப்பகுதியில் புதிதாக நிர்மாணிக்கப்பட்டு வரும் சிறைச்சாலை வளாகத்திலுள்ள மண்ணை மக்களின் குடியிருப்புப் பகுதியில் பொதுஅமைப்புக்களின் உதவியுடன் பரவுவதற்கு துரித நடவடிக்கை எடுக்குமாறும் கேட்டுக் கொண்டார்.

மழைகாலங்களில் தாம் எதிர்நோக்கி வரும் இடர்பாடுகள் தொடர்பில் பொதுமக்கள் அமைச்சர் அவர்களின் கவனத்திற்கு தெரியப்படுத்தியதுடன் காணிப்பிரச்சினை, நிரந்தரவீடு, மலசலகூடங்கள் உள்ளிட்ட ஏனைய தேவைப்பாடுகள் தொடர்பிலும் மக்கள் தெரியப்படுத்தியிருந்தனர்.  
இதனிடையே வெள்ளத்தால் பாதிக்கப்பட்ட கொட்டடி மீனாட்சியம்மன் மற்றும் மீனாட்சிபுரம் பகுதி மக்களுக்கு வெள்ள நிவாரணமாக உலருணவுப் பொருட்களை உடனடியாக வழங்குமாறு அமைச்சர் டக்ளஸ் தேவானந்தா அவர்கள் மாவட்ட அரசாங்க அதிபர் சுந்தரம் அருமைநாயகத்திடம் பணிப்புரை விடுத்தார்.

அத்துடன் புதிதாக நிர்மாணிக்கப்பட்டு வரும் யாழ்ப்பாணம் சிறைச்சாலையால் அப்பகுதியில் பொதுமக்கள் எதிர்நோக்கி வரும் இடர்பாடுகள் தொடர்பிலும் அமைச்சர் அவர்கள் அவதானம் செலுத்தியதுடன் அங்கிருந்து மக்கள் குடியிருப்புக்கு கழிவுநீர் செல்லாது நடவடிக்கைகளை முன்னெடுக்குமாறும் துறைசார்ந்தோருக்கும் பணிப்புரை விடுக்கப்பட்டது.
இவ்வாறு குடியிருப்பு பகுதிகளில் மழைநீர் தேங்கியுள்ளதன் காரணத்தால் குழந்தைகள் சிறுவர்கள் உள்ளிட்ட அனைவரும் தொற்று நோய் ஆபத்தை எதிர்நோக்கியுள்ள நிலையில் அமைச்சர் இவ் விசேட பணிப்புரைகளை விடுத்துள்ளமை சுட்டிக்காட்டத்தக்கது.

இதனிடையே வெள்ளத்தால் பாதிக்கப்பட்ட முதலாம் வீதி, இரண்டாம் வீதி, மூன்றாம், ஏழு, எட்டாம் ஒழுங்கை, ஆகிய பகுதிகளுக்கு நேரில் விஜயம் மேற்கொண்ட அமைச்சர் அவர்கள் மக்களுடன் கலந்துரையாடி அவர்களது தேவைப்பாடுகள் பிரச்சினைகள் தொடர்பிலும் ஆராய்ந்தறிந்து கொண்டார்.  
இதன்போது யாழ்.மாவட்ட அரசாங்க அதிபர் சுந்தரம் அருமைநாயகம், வடக்கு மாகாண சபை எதிர்க்கட்சித் தலைவர் தவராசா, யாழ்ப்பாண பிரதேச செயலர் திருமதி சுகுணரதி தெய்வேந்திரம், யாழ்.மாநகர முன்னாள் முதல்வர் திருமதி யோகேஸ்வரி பற்குணராசா, யாழ்.போதனா வைத்தியசாலையின் அபிவிருத்தி குழு செயலாளர் செல்வவடிவேல் உள்ளிட்ட துறைசார்ந்தோர் உடனிருந்தனர்.















 நாவாந்துறை முரண்பாடுகளுக்கு அமைச்சர் தீர்வு! மக்கள் நன்றி தெரிவிப்பு
 25.11.2014 - செவ்வாய்க்கிழமை  

யாழ்ப்பாணம் நாவாந்துறைப் பகுதியில் இரு குழுக்களுக்கு இடையே நிலவிவந்த முரண்பாடுகளுக்கு அமைச்சர் டக்ளஸ் தேவானந்தா அவர்கள் சுமூகமாக தீர்வு கண்டுள்ளார்.

நாவாந்துறைப் பகுதியில் இரு குழுக்களுக்கு இடையே எற்பட்ட முரண்பாடுகள் காரணமாக அங்கு ஏற்பட்ட பதற்றத்தை கருத்தில் கொண்டு அமைச்சர் அவர்கள் இன்றைய தினம் அப்பகுதிக்கு நேரில் விஜயம் மேற்கொண்டார்.

முன்பதாக நாவாந்துறை புனித நீக்கிலஸ் சனசமூக நிலையத்தில் அப்பகுதி மக்களுடன் கலந்துரையாடிய அமைச்சர் அவர்கள் பிரச்சினைகள் தொடர்பில் கேட்டறிந்து கொண்டார்.

இதேபோன்று சென்.மேரீஸ் சனசமூக நிலையத்தில் மக்கள் பிரதிநிதிகளுடன் கலந்துரையாடி பிரச்சினைகளை கேட்டறிந்தார்.
இதனடிப்படையில் இருதரப்புக்கு இடையே ஒர் இணக்கப்பாட்டை ஏற்படுத்தி உரிய தீர்வினை பெற்றுக் கொடுக்கும் முகமாக புனித நீக்கிலஸ் தேவாலயத்தில் இருதரப்பு பிரதிநிதிகளுடனும் அமைச்சர் அவர்கள் கலந்துரையாடி ஒரு சுமூகமான தீர்விற்கு வழிவகுத்தார்.

இதன்போது கருத்துத் தெரிவித்த அமைச்சர் அவர்கள் பொலிசாரும், இராணுவத்தினரும் அமைதியை பேணும் வகையில் நடந்து கொள்ள வேண்டுமெனவும் இதற்கு மக்கள் பூரண ஒத்துழைப்பையும் ஒத்தாசையையும் வழங்க வேண்டுமெனவும் கேட்டுக் கொண்டதுடன், முரண்பாடுகளை களைந்து எதிர்காலத்தில் ஐக்கியத்துடன் எல்லோரும் ஒன்றுபட்டு வாழ வேண்டுமென்பதே தமது விருப்பமெனவும் சுட்டிக்காட்டினார். 

முரண்பாடுகளுக்கு தீர்வு கண்ட அமைச்சர் டக்ளஸ் தேவானந்தா அவர்களுக்கு இருதரப்பு பிரதிநிதிகளும் தமது நன்றிகளையும் மகிழ்ச்சியையும் தெரிவித்துக் கொண்டனர்.

இதில் இருதரப்பு பிரதிநிதிகளும் அமைச்சர் முன்னிலையில் தமது முரண்பாடுகளுக்கு தீர்வு காணும் வகையில் ஒருவருக்கு ஒருவர் கைலாகு கொடுத்து அமைச்சர் அவர்களின் சமரச முயற்சியை வரவேற்றிருந்தமை சிறப்பம்சமாகும்.

இதன்போது வடக்கு மாகாண சபை எதிர்க்கட்சித் தலைவர் தவராசா,  யாழ்ப்பாண பிரதேச செயலர் திருமதி சுகுணரதி தெய்வேந்திரம். யாழ்.மாநகர முன்னாள் முதல்வர் திருமதி யோகேஸ்வரி பற்குணராசா உள்ளிட்டோர் உடனிருந்தனர்.















 வடமாகாணத்தில் கடற்றொழிலாளர்களது வாழ்வாதாரத்தை மேம்படுத்த பாரிய அபிவிருத்தி செயற்திட்டங்கள் -  அமைச்சர் டக்ளஸ் தேவானந்தா நடவடிக்கை
 25.11.2014 - செவ்வாய்க்கிழமை

வடமாகாணத்தில் கடற்றொழிலை வாழ்வாதாரமாகக் கொண்ட மக்களுக்கான பாரிய அபிவிருத்தி செயற்திட்டங்களை விரைவில் முன்னெடுக்கவுள்ளதாக அமைச்சர் டக்ளஸ் தேவானந்தா அவர்கள் தெரிவித்துள்ளார்.

அமைச்சர் டக்ளஸ் தேவானந்தா அவர்களுடன் இடம்பெற்ற விசேட சந்திப்பொன்றிலேயே அவர் இவ்வாறு தெரிவித்துள்ளார்.

அவர் மேலும் தெரிவிக்கையில், வடமாகாண மாவட்டங்களின் கடற் கரையோரப்பகுதிகளை அபிவிருத்தி செய்து அதனூடாக துறைசார்ந்த மக்களது வாழ்வாதாரத்தையும் பொருளாதாரத்தையும் மேம்படுத்தும் பொருட்டு திட்டங்கள் வகுக்கப்பட்டு செயற்திட்டங்கள் முன்னெடுக்கப்படவுள்ளன.

இப்பாரிய செயற்திட்டங்கள் பொருளாதார அபிவிருத்தி அமைச்சின் ஊடாக ஆசிய அபிவிருத்தி வங்கியின் 260 கோடி ரூபா செலவில் முன்னெடுக்கப்படவுள்ளதாக தெரிவித்துள்ள அமைச்சர் அவர்கள் இவற்றினூடாக கடற்றொழிலை தமது வாழ்வாதாரமாகக் கொண்ட மக்கள் பல்வேறுபட்ட நன்மைகளை பெற்றுக் கொள்ளவுள்ளதாகவும்; சுட்டிக்காட்டினார்.

குறிப்பாக, வடமாகாணத்திலுள்ள 255 கடற் கரையோரங்களைச் சேர்ந்த கிராம சேவையாளர் பிரிவுகளில்; வீதிகள், சனசமூக நிலையங்கள், முன்பள்ளிகள், குடிநீர் விநியோகம், கடற்றொழிலாளர்கள் இளைப்பாற்று மண்டபம், பல்சேவை மையங்கள், உள்ளிட்ட பௌதீக வளங்கள்  இத் திட்டத்தின் அடிப்படையில் நிறைவு செய்யப்படவுள்ளன.

அத்துடன், 2000 இளைஞர், யுவதிகளுக்கு வாழ்வாதாரம் மற்றும் தொழிற்பயிற்சி திட்டங்கள் வழங்கப்படும் அதேவேளை, பெண்களை தலைமைத்துவமாகக் கொண்ட 5 ஆயிரம் குடும்பங்களது வாழ்வாதாரத்தை உயர்த்துவதற்கும் நடவடிக்கை முன்னெடுக்கப்படவுள்ளது.

இக்கிராமசேவையாளர் பிரிவுகளில் வாழும் மக்களின் வாழ்வாதாரத்தையும், பொருளாதாரத்தையும் மேம்படுத்த முடியுமென்பதுடன், சூரியமின்கலம் ஊடாக பத்து குளிரூட்டல் தொழிற்சாலைகள் மற்றும் இருபது இடங்களில் ஏலவிற்பனை செய்யும் நிலையங்களும் அமைக்கப்படவுள்ளன.
இருபது கரையோரப் பகுதிகளில் இறங்குதுறைகள் அமைக்கப்படவுள்ள அதேவேளை, மூன்று இடங்களில் படகு கட்டுமான நிலையங்களும் அமைக்கப்படவுள்ளன.

அத்துடன், நெற்செய்கைக்கான மற்றும் விவசாய செய்கைகளுக்கான நிலங்களை பாதுகாக்கும் பொருட்டு இருபது உவர்நீர் தடுப்பு அணைகள் அமைக்கப்படவுள்ளன.

பாரியளவில் கடல் மற்றும் நன்னீர் மீன்வளர்ப்புத்திட்டம் நடைமுறைப்படுத்தப்படும் அதேவேளை, பாரியளவில் யாழ்ப்பாணம் மன்னார் பகுதிகளில் கடலட்டைகளை வளர்த்தல், விருத்தி செய்தல் மற்றும் கிளிநொச்சி இரணைமடுவில் விலங்கு உற்பத்தி நிலையத்தை செயற்படுத்தவும் திட்டமிடப்பட்டுள்ளது.

இயற்கை சூழலுக்கு தீங்கு ஏற்படாமலும், பாதிப்பு ஏற்படாமலும் இருபது கிராமங்களில் சமூக அடிப்படையில் இலாபத்தை ஈட்டி அதனூடாக அப்பகுதி மக்களின் வாழ்வாதாரத்தை மேம்படுத்தும் பொருட்டு உல்லாசப் பயணிகளின் வருகையை அதிகரிக்கச் செய்வதற்கும் நடவடிக்கை எடுக்கப்படவுள்ளது.

இதேபோன்று, எட்டு இடங்களில் வான்அகழ்வுப் பணிகளை முன்னெடுப்பதற்கும் திட்டமிடப்பட்டுள்ளது.

இதனிடையே முல்லைத்தீவு மாவட்டத்தின் நந்திக்கடலை முதற்கட்டமாக புனரமைப்பு செய்வதன் ஊடாக அங்குள்ள 2,500 ற்கும் அதிகமான குடும்பங்களுக்கு வாழ்வாதாரத்தை பெற்றுக் கொடுக்க முடியுமென்று தெரிவித்த அமைச்சர் அவர்கள்,

இவ்வாறான செயற்திட்டங்கள் முன்னெடுக்கப்படும் பட்சத்தில் அந்தந்தப் பகுதிகளில் வாழும் மக்களது வாழ்வாதாரமும் பொருளாதாரமும் மேம்படுத்தப்படுமென்பதுடன், இதற்கு மக்களது ஆதரவும் ஒத்துழைப்பும் அவசியமானது என்றும் சுட்டிக்காட்டினார்.


 எமது அரசியல் அணுகுமுறையே தமிழ் மக்களின் தேவைகளை நிறைவேற்றியது - ஈ.பி.டி.பி பாராளுமன்ற உறுப்பினர் சந்திரகுமார்.
 25.11.2014 - செவ்வாய்க்கிழமை

எமது அரசியல் அணுகுமுறையே தமிழ் மக்களின் தேவைகளையும், பிரச்சினைகளையும் நிறைவேற்றியும், தீர்த்தும் வைத்துள்ளது. கடந்த காலத்தில் இந்த அரசியல் அணுகுமுறையை விமர்சித்த தமிழ்த்தேசியக் கூட்டமைப்பினரும் அதனை உணர்ந்துள்ளனர் என ஈ.பி.டி.பி பாராளுமன்ற உறுப்பினரும் பாராளுமன்றக் குழுக்களின் பிரதித் தலைவருமான முருகேசு சந்திரகுமார் அவர்கள் தெரிவித்துள்ளார்.

பாராளுமன்ற உறுப்பினரின் அலுவலகத்தில் கிளிநொச்சி மாவட்டத்தைச் சேர்ந்த 22 இளைஞர்களுக்கு இலங்கை புகையிரத திணைக்களத்தில் வேலைவாய்ப்பினை பெற்றுக்கொடுத்து அவர்களுக்கான நியமன கடிதங்களை வழங்கி வைத்து கருத்துத் தெரிவிக்கும் போதே அவர் இவ்வாறு தெரிவித்துள்ளார்.

அங்கு அவர் மேலும் தெரிவிக்கையில் எமது மாவட்டத்தை பொறுத்தவரை இளைஞர் யுவதிகளுக்கு முன் காணப்படுகின்ற மிகப்பிரதான பிரச்சினையே வேலைவாய்ப்பின்மையே. படித்து விட்டு பெருமளவான இளைஞர் யுவதிகள் நிரந்தர தொழில் இன்றி சமூகத்தில் பலவேறு பிரச்சினைகளுக்கு எதிர்கொண்டு வருகின்றனர். இவர்களை பல்வேறு எதிர்பார்ப்புகளுடன் செலவு செய்து படிப்பித்த  அந்தக்குடும்பங்களும் வறுமையிலும், விரக்தியிலும் காணப்படுகின்றனர். உண்மையான மக்கள் பிரதிநிதி என்ற வகையில் இதனை எம்மால் பார்த்துக்கொண்டும் அதனை விமர்சித்து அரசியலாக்கி இலாபம் தேடவும் முடியாது.

அதுவல்ல ஒரு மக்கள் பிரதிநிதியின் பணி. எனவேதான் நாம் எம்மை நம்பி வாக்களித்து மக்களின் நம்பிக்கைகள் வீண் போகாத வகையில் எமது அரசியல் அணுகுமுறைக்கு ஊடாக தமிழ் மக்கள் எதிர்கொள்ளும் பிரச்சினைகளையும்,தேவைகளையும் நிறைவேற்றி வருகின்றோம். அந்த வரிசையில்தான் 22 இளைஞர்களுக்கு அரச துறையில் வேலைவாய்ப்பினை பெற்றுக்கொடுக்க முடிந்தது.

மீள்குடியேற்றத்திற்கு பின்னர் எம் மக்கள் எதிர்கொண்ட பல பிரச்சினைகளை தீர்த்துவைத்தமை தொடர்பில் நாம் பெருமையும் திருப்தியும் அடைகின்றோம். மேலும் இந்த மாவட்டத்தில் பல நூற்றுக்கணக்கான இளம் சமூகம் எதிர்ப்பார்ப்புகளுடன் காத்திருக்கின்றன அவர்களின் எதிர்ப்பார்ப்புக்களையும் நிறைவேற்ற வேண்டும். அது எங்களின் கைகளில் இல்லை மக்களின் கைகளிலேயே உண்டு எமது அரசியல் பலம் அதிகரிக்கப்படும் போதுதான் இது போன்ற பல்வேறு தேவைகளை பல மடங்காக செய்ய முடியும் எனக்குறிப்பிட்ட பாராளுமன்ற உறுப்பினர் அவர்கள். வேலைவாய்ப்புக்களை பெற்றவர்கள் இத்தோடு உங்களின் தேவைகள் நிறைவேறிவிட்டது என்று இருந்துவிடக் கூடாது. உங்களின் சகோதரர்கள், உறவினர்கள் நண்பர்கள் என பலரின் தேவைகளும் ப+ர்த்திச் செய்யப்படவேண்டும் அதற்காக உழைக்கவும் வேண்டும் எனவும் கேட்டுக்கொண்டார்.

இந்த நிகழ்வில் ஈ.பி.டி.பியின் வடக்கு மாகாண சபை உறுப்பினர் வை.தவநாதன், பாராளுமன்ற உறுப்பினரின் இணைப்புச் செயலாளர் அன்ரன் அன்பழகன் மற்றும் வேலைவாய்ப்பினை பெற்றவர்களின் பெற்றோர் ஆகியோர் கலந்துகொண்டனர்.











 டிசம்பர் 23,24 ஆம் திகதிகளில் தபால் மூல வாக்களிப்பு!
 25.11.2014 - செவ்வாய்க்கிழமை

நடைபெறவுள்ள ஜனாதிபதி தேர்தலில்  தபால் மூல வாக்களிப்பு எதிர்வரும் டிசம்பர் மாதம் 23,24 ஆம் திகதிகளில் இடம்பெறும் என தேர்தல்கள் ஆணையாளர் மஹிந்த தேசப்பிரிய தெரிவித்தார்.

எதிர்வரும் ஜனாதிபதி தேர்தல் தொடர்பாக விளக்கமளிக்கும் ஊடகவியலாளர் மாநாடு ராஜகிரியவிலுள்ள தேர்தல்கள் செயலக கேட்போர் கூடத்தில் நடைபெற்றுவரும் நிலையிலேயே தேர்தல்கள் ஆணையாளர் மஹிந்த தேசப்பிரிய  இதனைத் தெரிவித்தார்.

தபால் மூல வாக்களிப்புக்கான வாக்கு சீட்டுக்கள் எதிர்வரும் டிசம்பர் மாதம் 15 ஆம் திகதி விநியோகிக்கப்படும் எனவும் தபால் மூல வாக்களிப்புக்கான விண்ணப்பங்கள் அனைத்தும் அடுத்த மாதம் 4 ஆம் திகதிக்கு முன்னர் அனுப்பி வைக்கப்பட வேண்டும் எனவும் தெரிவித்தார்.


 வீட்டிலிருந்தே பொதிகளை அனுப்பலாம் வடக்கில் விரிவாகியது அஞ்சல் சேவை !
 25.11.2014 - செவ்வாய்க்கிழமை

வடக்கில் அஞ்சல் திணைக்களம் தனது சேவையை விரிவுபடுத்தியுள்ளது. அத்துடன் பொதிபரிமாற்ற சேவையையும் தொடங்கியுள்ளது. இதனைப் பயன்படுத்த விரும்புவோர் வீட்டிலிருந்தவாறே தபால் ஊழியர்கள் ஊடாக பொதிகளை அனுப்பி வைக்க முடியும்.

இதற்காக பொதிப் பரிமாற்றக் கட்டணம் மட்டுமே அறவிடப்படுமென வடமாகாண பிரதி அஞ்சல் மா அதிபர் ந.இரட்ணசிங்கம் தெரிவித்தார்.

இதன்படி கட்டணமாக 250 கிராமிலிருந்து 500 கிராம் வரை 165 ரூபாவும், 500 கிராமிலிருந்து 1 கிலோ கிராமிற்கு 195 ரூபாவும், 9 கிலோ கிராம் 10 கிலோகிராம் 1425 ரூபாவும், 19 - 20 கிலோவிற்கு 2925 ரூபாவும், அறவிடப்படும்.

மேலும் பொருட்களின் நிறைக்கு ஏற்ப, கட்டணங்கள் மாறுபடும் எனவும் அவர் தெரிவித்தார். அத்துடன் பரீட்சார்த்திகளின் நன்மை கருதி அஞ்சல் திணைக்கள தகவல் தொழில்நுட்ப பிரிவு கட்டணங்களை இணையத்தளம் ஊடாக அனுப்பி வைப்பதற்கான வலையமைப்பை அனைத்து தபால் காரியாலயங்களிலும் அடுத்த வருடம் ஒக்ரோபர் மாதத்தில் இருந்து ஆரம்பிக்கவுள்ளது.

யாழ் - கொழும்பு புகையிரத சேவை ஆரம்பிக்கப்பட்ட பின்னர், யாழ்ப்பாணத்துக்கு வெகு விரைவில் தபால்கள், பொதிகளை விநியோகிக்கக்கூடிய சூழல் ஏற்பட்டுள்ளது என்றும் அவர் கூறினார்.


 கொழும்புத்துறையில் புதிய மீன்சந்தைக்கு அடிக்கல் நாட்டப்பட்டது!
 25.11.2014 - செவ்வாய்க்கிழமை

கொழும்புத்துறைப்பகுதிக்கான மீன் சந்தைக்கான அடிக்கல் நேற்று நாட்டப்பட்டுள்ளது.

கொழும்புத்துறை சந்திப்பகுதியில் நேற்று நடைபெற்ற இந்நிகழ்வில் யாழ்.மாநகரசபையின் முன்னாள் துணை முதல்வரும், ஈ.பி.டி.பியின் யாழ்.நகர இணைப்பாளருமான துரைராசா இளங்கோ (றீகன்) கொழும்புத்துறை கடற்றொழிலாளர் கூட்டுறவுச் சங்கத்தைச் சேர்ந்த பா.கு.சேனாதிராஜா ஆகியோர் இணைந்து இதற்கான அடிக்கல்லை நாட்டிவைத்தனர்.

இந்த மீன் சந்தைக்கு முதற்கட்டமாக அமைச்சர் டக்ளஸ் தேவானந்தாவின் பன்முகப்படுத்தப்பட்ட வரவு செலவு திட்ட நிதியிலிருந்து ஒரு இலட்சம் ரூபா ஒதுக்கப்பட்டுள்ளது.

இந்த மீன்சந்தை விரிவாக்கத்திற்கு ஈழமக்கள் ஜனநாயகக் கட்சியினால் அமைச்சர் டக்ளஸ் தேவானந்தா அவர்களின் பன்முகப்படுத்தப்பட்ட வரவு செலவுத் திட்ட நிதியிலிருந்து நிதி ஒதுக்கீடு செய்ய முயற்சிகள் மேற்கொள்ளப்பட்டுள்ளதாக முன்னாள் யாழ்.மாநகரசபை துணை முதல்வர் றீகன் தெரிவித்துள்ளார்.

ஏற்கனவே கொழும்புத்துறை மீன்சந்தை தற்காலிக கட்டடம் ஒன்றிலேயே இயங்கிவருகின்றமை குறிப்பிடத்தக்கது.


 
     
 
15A, Layards Road, Colombo - 05, Sri Lanka.
Tel: 94 11 2503467 Fax: 94 11 2585255
E-Mail: epdp@sltnet.lk 
© 2008 www. epdpnews.com, All Rights Reserved.