04.02.2012 – சனிக்கிழமை

சிங்களம் மட்டும் என்ற சட்டத்தின் மூலமே இத்தேசத்தில் இன முரண்பாடுகள் கூர்மையடைந்தன. ஆனால் இன்று மும்மொழிக் கொள்கையை அமுலாக்கும் நடவடிக்கையை அரசு முன்னெடுத்து வருகின்றது என ஈ.பி.டி.பி. பாராளுமன்ற உறுப்பினரும் பாராளுமன்றக் குழுக்களின் பிரதித் தலைவருமான முருகேசு சந்திரகுமார் அவர்கள் தெரிவித்துள்ளார்.

நேற்று (3) பளையில் உதயம் ஆங்கிலமொழி சிறுவர் பாடசாலையினை திறந்து வைத்து உரையாற்றும்போதே அவர் இவ்வாறு தெரிவித்தார்.

அங்கு அவர் மேலும் தெரிவிக்கையில் சிங்களம் மட்டும் என்ற சட்டத்தின் மூலமே இத்தேசத்தில் இன முரண்பாடுகள் கூர்மையடைந்தன. ஆனால் இன்று மும் மொழிக் கொள்கையை அமுலாக்கும் நடவடிக்கையை அரசு முன்னெடுத்து வருகின்றது. இதன் மூலம் எதிர்காலத் தலைமுறையினர் மூன்று மொழிகளையும் அறிந்தவர்களாகவும் ஆங்கிலத்தை தொடர்பாடல் மொழியாகவும் மாற்றக்கூடிய ஒரு புதிய சூழல் உருவாகியுள்ளது. இந்த அடிப்படையில் ஆங்கில மொழியறிவை பெற்றுக் கொள்வதற்கான வாய்ப்பு மீள்குடியேறிய மிகவும் பின்தங்கிய  பளை போன்ற பிரதேசங்களில் ஏற்படுத்தப்படுவது மகிழ்ச்சிக்குரிய விடயமே. இதேபோன்று ஏனைய பகுதிகளிலும் ஆங்கில மொழியறிவை வளர்க்கக்கூடிய செயற்பாடுகள் முன்னெடுக்கப்பட வேண்டும். 

அத்தோடு நாம் தமிழ் மொழியை பேசுகின்றோம் அதைபாதுகாக்க வேண்டிய பொறுப்பு எம்மிடமுண்டு. ஆனால் இன்று உலகம் ஆங்கில மொழியில் முக்கியத்துவம் பெற்று வருகின்றது. எனவே எமது தாய் மொழியை பாதுகாத்துக் கொள்ளும்  அதேவேளை சர்வதேசத்தோடு இணைந்து பயணிக்கக் கூடிய ஆங்கில அறிவையும் மேம்படுத்திக் கொள்ள வேண்டியதன் அவசியத்தையும் நாம் உணர்ந்து கொள்ளவேண்டும் என பாராளுமன்ற உறுப்பினர் சந்திரகுமார் அவர்கள் மேலும் தெரிவித்தார.;

புலோப்பளையில் உதயம் ஆங்கிலமொழி சிறுவர் பாடசாலையினை பாராளுமன்ற உறுப்பினர் மு.சந்திரகுமார் அவர்கள் திறந்து வைத்தார். பளைப் பிரதேசத்தில் முதன் முறையாக ஆரம்பமாகியுள்ள இவ் ஆங்கிலமொழி சிறுவர் பாடசாலையானது முதற்கட்டமாக 25வரையான மாணவர்களை உள்வாங்கவுள்ளதுடன் தொடர்ந்து படிப்படியாக மேலும் பல மாணவர்களை உள்வாங்கக் கூடிய வகையில் விரிவாக்கப்படவுள்ளதாக அப்பாடசாலையின் பொறுப்பதிகாரி தெரிவித்துள்ளார்.

இந்நிகழ்வில் பச்சிலைப்பள்ளி பிரதேச சபை உறுப்பினர் அன்ரன் அன்பழகன் பச்சிலைப்பள்ளி ப.நோ.கூ சங்க பொது முகாமையாளர் பச்சிலைப்பள்ளி பிரதேச செயலக நிர்வாக உத்தியோகஸ்தர் மற்றும் கிராம அபிவிருத்திச் சங்கத்தினர் முன்பள்ளிகளின் ஆசிரியர்கள் முன்பள்ளி சிறார்கள் பெற்றோர்கள் எனப் பலரும் கலந்து கொண்டனர்.