ஜுலைக்கு வெள்ளை அடிக்காது பாதிக்கப்பட்ட மக்களின் வாழ்க்கைக்கு வெள்ளை அடியுங்கள் – நாடாளுமன்றில் டக்ளஸ் எம்.பி வலியுறுத்து!

Tuesday, July 9th, 2019

எமது வாழ்க்கையில் மறக்க இயலாத கறுப்பு ஜூலை ஏற்பட்டு, 36 ஆண்டுகள் சென்றுவிட்டுள்ள நிலையில், அன்று எமது மக்களது மனங்களில் ஏற்பட்ட ரணங்கள் இன்னமும் ஆற்றப்படாமலும், பரிகாரங்கள் காணப்படாமலும், மேலும், மேலும் ரணங்களை ஏற்படுத்தியும், இனங்களுக்கிடையில், மதங்களுக்கிடையில் கசப்புணர்வுகளை ஏற்படுத்தியும் வருகின்ற தொடர் காலகட்டங்களில் 1983ஆம் ஆண்டு கறுப்பு ஜூலையின் புகை மண்டலம் இன்னமும் அகலாதிருக்கின்ற நிலையில், ஜூலைக்கு வெள்ளை அடித்துக் கொண்டிருக்கிறீர்கள்.

நீங்கள் வெள்ளை அடித்தாலும், சிகப்பினை அடித்தாலும் கறுப்பு ஜூலையை கழுவுவதற்கு உங்களது கரங்களில் சுத்தம் போதாது என்றே எமது மக்கள் கருதுகின்றனர்

நீங்கள் சாலைக்கு வெள்ளை அடிப்பது, ஜூலைக்கு வெள்ளை அடிப்பது என்றில்லாமல், எமது மக்களின் வாழ்க்கைக்கு எப்போது வெள்ளை அடிக்கப் போகின்றீர்கள்? என்ற கேள்வியே இன்று எமது மக்கள் முன்பாக இருக்கின்றது என ஈழ மக்கள் ஜனநாயகக் கட்சியின் செயலாளர் நாயகம் டக்ளஸ் தேவானந்தா தெரிவித்துள்ளார்.

நாடாளுமன்றில் நடைபெற்ற நெடுஞ்சாலைகள், வீதி அபிவிருத்தி மற்றும் பெற்றோலிய வளங்கள் அபிவிருத்தி அமைச்சின் குறைநிரப்பு மதிப்பீடு, தீவிர பொறுப்பு முகாமைத்துவ சட்டத்தின் கீழான பிரேரணை மற்றும் உற்பத்தி வரி விஷேட ஏற்பாடுகளின் கீழான கட்டளைகள் தொடர்பிலான விவாதத்தில் கலந்து கொண்டு உரையாற்றும் போதே அவர் இவ்வாறு தெரிவித்தார்.

மேலும் அவர் தெரிவிக்கையில் –

எமது மக்கள் இருளில் இருக்கின்றனர். அந்த இருள் எமது மக்கள் ஒவ்வொருவரதும் மனங்களில் குடிகொண்டிருக்கின்றது. இந்த இருளை அகற்ற எமது மக்கள் இரவு – பகலாக அல்லாடிக் கொண்டிருக்கிறார்கள். நிம்மதி தேடி கோவில்களுக்கு போக எண்ணினாலும், முதலில் அந்தக் கோவில்கள் பறிபோய்விட்டனவா? அல்லது இருக்கின்றனவா? என உறுதிப்படுத்திக் கொண்டு, அங்கே போக வேண்டிய நிலை இன்று எமது மக்களுக்கு உருவாகியிருக்கிறது.

இன்று இருக்கின்ற கோவில்கள்கூட நாளை அபகரிக்கப்பட்டு விடுமோ என்ற அச்சம் எமது மக்கள் மத்தியில் இப்போது ஏற்பட்டிருக்கின்றது. கறுப்பு ஜூலையில் தென் பகுதிகளிலிருந்து அடித்து விரட்டப்பட்ட எமது மக்கள் நீங்கள் சொல்கின்ற இந்த வெள்ளை ஜூலையாகின்ற நிலையில், இப்போது இருக்கின்ற அவர்களது சொந்தக் காணி, நிலங்களிலிருந்தும் துரத்தப்படுவார்களோ என்ற அச்ச நிலையில் வாழ்ந்து வருகின்றனர்.

எனவே, தேர்தல்கள் நடைபெற இருக்கின்ற காலங்களை அண்டியதாக எமது மக்களின் பிரச்சினைகளைத் தீர்ப்பதற்கு காலக் கெடுக்களை வழங்கிக் கொண்டிருப்பதற்கு நாங்கள் எமது மக்களை ஏமாற்றி அரசியல் பிழைப்பு நடத்திக் கொண்டிருப்பவர்கள் அல்லர் என்பதையும் தெரிவித்து, எமது மக்களின் அனைத்துப் பிரச்சினைகளும் தீர்க்கப்பட வேண்டும் என்பதை மீண்டும் வலியுறத்த விரும்புகின்றேன்.

அதேநேரம், ஏற்கனவே பல்வேறு பிரச்சினைகள் தீர்க்கப்படாதிருக்கின்ற நிலையில், எமது மக்களை மீண்டும், மீண்டும் பிரச்சினைகளுக்குள் தள்ளிவிடாதீர்கள் என்பதையும் கேட்டுக் கொள்கின்றேன்.

இன்று நெடுஞ்சாலைகள் மற்றும் வீதி அபிவிருத்தி தொடர்பிலான குறைநிரப்புப் பிரேரணை தொடர்பில் விவாதிக்கப்படுகின்றது. இந்த வீதி அபிவிருத்தி ஒன்றுதான் நாட்டின் அபிவிருத்தி எனக் கொள்ள முடியாது

ஆட்சியாளர்களும், இந்த ஆட்சியைக் கொண்டு வந்தவர்கள் தாங்களே என்று கூறுகின்ற தமிழ்த் தரப்பினரும் வீதி அபிவிருத்தி ஒன்றுதான் நாட்டின் – நாட்டு மக்களின் அடிப்படை அபிவிருத்தி என நினைத்துக் கொண்டிருக்கின்றார்களோ? என்ற சந்தேகம் எமது மக்கள் மத்தியில் இருக்கின்றது.

துரித கிராம அபிவிருத்தி வேலைத் திட்டத்தின் கீழ் யாழ் மாவட்ட நாடாளுமன்ற உறுப்பினர்களில் இந்த அரசாங்கத்தினைச் சேர்ந்த நாடாளுமன்ற உறுப்பினர்களுக்கு மூன்று கட்டங்களாக கோடிக் கணக்கான நிதி வழங்கப்பட்டுள்ளதாகவும், இந்த நிதியின் மூலமாக 13 வகையான வேலைத் திட்டங்கள் மேற்கொள்ளப்பட வேண்டும் என்றாலும், இந்த நிதியில் 90 வீதமான நிதி வீதி அபவிருத்திப் பணிகளை மாத்திரம் மேற்கொள்வதற்கே செலவிடப்பட்டு வருவதாக வலிகாமம் தென் மேற்கு பிரதேச மக்கள் தெரிவிக்கின்றனர்.

குறிப்பாக, அரசாங்கத்தைப் பிரதிநிதித்துவப்படுத்துகின்ற நான்கு நாடாளுமன்ற உறுப்பினர்களின் மேற்படி நிதி ஒதுக்கீடுகள் மூலமாக மேற்படி பகுதியில் 17 வட்டாரங்களை உள்ளடக்கிய 28 கிராம சேவையாளர்கள் பிரிவுகளிலும், அவசர, அவசரமாக மேற்படி வீதிகள் அபிவிருத்தி செய்யப்பட்டு வருவதாகவும், இப் பணிகளின்போது, பணிகளை மேற்பார்வை செய்வதற்கு எவருமில்லாத நிலையில் ஒப்பந்தக்காரர்கள் ஒப்பந்தத்தில் குறிப்பிட்டுள்ள மூலப் பொருட்களைப் பயன்படுத்தாமல், மிகவம் தரம் குன்றிய வகையில் மேற்படி வீதி அபிவிருத்திப் பணிகளில் ஈடுபட்டுள்ளனர் என்றும் மக்கள் முறைப்படுகின்றனர்.

எனவே, இந்தப் பணிகளின் பின்னால் ஊழல், மோசடிகள் இடம்பெற்றிருப்பதற்கு அதிக வாய்ப்பு இருப்பதாகவே எமது மக்கள் நம்புகின்றனர். இப்படியே போனால், இவர்கள் சொல்கின்ற ஏதோ வெடிக்கும் என்பது இந்த வீதிகள் மற்றும் ஊழல் மோசடிகள் தான் வெடிக்கும் என்றே எமது மக்கள் கருதுகின்றனர்.

அதி வேகப் பாதைகள் நாட்டில் அமைக்கப்பட்டதன் பின்னர், நாட்டில் வாகன நெரிசல்கள் குறைந்துள்ளனவா? என்ற கேள்வி எழுகின்றது

அமெரிக்காவின் நியூயோர்க் நகரிலிருந்து லோங் தீவுக்கு  1908ஆம் ஆண்டு ஆரம்பிக்கப்பட்டு, 1911ஆம் ஆண்டு நிறைவு செய்யப்பட்ட தனியாருக்குச் சொந்தமான 110  கிலோ மீற்றர் நீளமான அதிவேகப் பாதையே உலகின் முதலாவது அதி வேகப் பாதையாகக் கருதப்படுகின்றது.

அது முதற் கொண்டு உலக நாடுகள் பல அதிவேகப் பாதைகளை அமைத்துக் கொண்டுள்ள போதிலும்,  அதன் மூலமாக வாகன நெரிசல்களை கட்டுப்படுத்துவதற்கு இயலும் என்று கொள்ளப்பட்ட எதிர்ப்பார்ப்புகள் எதிர்மறையான விளைவுகளையே கொண்டு தந்து கொண்டிருப்பதால், மேம்பால நெடுஞ்சாலைகள் அமைக்கும் திட்டம் அமெரிக்காவில் ஆரம்பிக்கப்பட்டது. ஆயினும் இந்த முறைமையும் குறித்த வெற்றியை ஈட்டிக் கொள்வதற்கு இயலாது போயுள்ள நிலையில்,  இப்போது பல நாடுகள் நிலக்கீழ் பாதைகளை அமைப்பதற்கு நாட்டங் கொண்டு வருகின்றன காலகட்டத்தில் இங்கே கடுகதி நெடுஞ்சாலைகள் அமைக்கின்ற திட்டம் குறித்து விவாதித்துக் கொண்டிருக்கின்றோம்.

இத்தகைய கடுகதி நெடுஞ்சாலைகள் அபிவிருத்தி ஏற்பாடுகளின் போது, அந்தப் பகுதிகளிலே வாழ்கின்ற மக்கள் முகங்கொடுக்க நேரிடுகின்ற பிரச்சினைகளும், அந்தந்தப் பகுதிகள் சூழல் ரீதியிலாக முகங்கொடுக்கின்ற இடர்பாடுகளும் ஏராளமானவை என்பது பலரும் அறிந்த விடயமாகும்.

கடந்த, அண்மைய காலங்களில் ஏற்பட்ட வெள்ள அனர்த்தத்தின் போதுதான் தெற்கு கடுகதி நெடுஞ்சாலை மூலமான பாதிப்புகள் சுமார் 300க்கும் மேற்பட்ட மனித உயிர்கள் காவு கொள்ளப்பட்டதன் பின்னர் நாட்டு மக்களுக்குத் தெரிய வந்திருந்தது.

இன்றும்கூட உத்தேச கடவத்தை – கெரவலப்பிட்டிய வெளிச் சுற்று நெடுஞ்சாலைப் பணிகளுக்கென மழை நீர் கடலில் கலக்கக்கூடிய முத்துராஜவெல தரிசு நிலத்தில் ஆயிரக் கணக்கான ஏக்கர் நிலம் நிரப்பப்பட்டு வருவதாகக் கூறப்படும் நிலையில், இது கொழும்பு மாவட்டத்தைப் பொறுத்தவரையில் வெள்ள அனர்த்த அச்சுறுத்தலையே கொண்டிருப்பதாக சூழலியலாளர்கள் தெரிவித்து வருகின்றனர்.

அதேபோன்று மத்திய கடுகதி நெடுஞ்சாலை அமைப்பதற்கென 125 கிலோ மிற்றர் தூரத்திற்கு சுமார் 3 கோடி 45 இலட்சம் கன மீற்றர் மண் நிரப்பப்பட வேண்டியுள்ளதாக அறிய முடிகின்றது. இந்தப் பகுதிகள் நீர் ஆதாரங்களைக் கொண்ட பகுதிகள் பலவற்றினை உள்ளடக்குகின்றன. இதனால் ஏற்படக்கூடிய சூழல் பாதிப்புகள் கொஞ்ச நஞ்சமல்ல. வறட்சியும், அதே மடங்கு வெள்ள அனர்த்தங்களும், சூழல் சமநிலை இன்மையும் பாரியளவில் ஏற்படும் என்பதில் சந்தேகமில்லை.

மண் மேடுகள் அமைத்து இத்தகைய நெடுஞ்சாலைகள் அமைக்கின்ற முறைமையானது உலகில் எந்தவொரு நாட்டிலும் இல்லாத ஓர் ஏற்பாடகவே இருப்பதாக சூழலியலாளர்கள் கூறுகின்றனர்.

மேலும், இத்தகைய பாதிப்புகள் மட்டுமல்லாது, இத்தகைய நெடுஞ்சாலைகள் காரணமாக மக்கள் தங்களது வாழ்விடங்களை, வாழ்வாதார இடங்களை விட்டும் இடம்பெயர வேண்டிய நிலைமைகள் ஏராளமாகவே இடம்பெறுகின்றன. அதற்கான இழப்பீடுகள் அம்மக்களுக்கு வழங்கப்படுவதாகக் கூறப்பட்டாலும் அவை போதியளவில் இல்லாமையும், அவர்களது மீள் வாழ்க்கைக்கு அம்மக்கள் எதிர்நீச்சல் போட வேண்டிய நிலைமைகள் ஏற்படுவது தொடர்பில் அவதானங்கள் செலுத்தப்படுவதில்லை.

ஜப்பான் ஒசாகா நகரில் மேம்பால நெடுஞ்சாலை ஒன்று 16 மாடிகளைக் கொண்ட ஒரு கட்டிடத்தின் 5ஆம் மாடியால் செல்கின்றது. குறிப்பிட்ட இந்த நெடுஞ்சாலை அமைப்பதற்கு இந்த 16 மாடி கட்டிடம் தடையாக இருந்ததால் அதனை அகற்ற அரசாங்கம் மேற்கொண்ட முயற்சிகளுக்கு அக்கட்டிட உரிமையாளர் இடங்கொடுக்காத காரணத்தால், இறுதியில் இரு தரப்பினரும் ஓர் உடன்படிக்கைக்கு வந்து, அந்தக் கட்டிடத்தை அகற்றாமல் அதன் 5ஆம் மாடியின் ஊடாக அந்த நெடுஞ்சாலை செல்லக்கூடிய வகையில் அமைத்துள்ளனர் என்ற விடயத்தை இங்கே அபிவிருத்திகள் என வருகின்றபோது, ஒரு உதாரணம் என்ற வகையில் சுட்டிக்காட்ட விரும்புகின்றேன்.

எனவே, எமது நாட்டின் தன்மைக்கு பொருந்துகின்ற வகையில், எதிர்காலத்தில் அதிவேக ரயில் பாதைக் கட்டமைப்புகளை விரிவுபடுத்துவதற்கும், அதனுடன் இணைந்ததான மேம்பால இணைப்பு வீதிகளை அமைபதற்குமான நடவடிக்கைகளை மேற்கொள்வது தொடர்பில் உரிய அவதானங்கள் செலுத்தப்பட வேண்டும் என்ற விடயத்தை மேலும் இங்கே வலியுறுத்த விரும்புகின்றேன்.

பொதுப் போக்குவரத்துச் சேவை என்பது தொடர்பில் மேலும் முற்போக்கான ரீதியில் சிந்தித்து அதற்கான ஏற்பாடுகளை முன்னெடுப்பதற்கு நடவடிக்கைகள் தேவை என்பதையே தற்போதுள்ள இந்நாட்டு பொதுப் போக்குவரத்துச் சேவையினாலும், அதன் பணியாளர்களாலும் தொடர்ந்தும் வலியுறுத்தப்பட்டு வருகின்றது. பணியாளர்களது உரிமைகள் பாதுகாக்கப்படல் வேண்டும் என்பதுடன், பயணிகளின் உரிமைகளும் பாதுகாக்கப்பட வேண்டும். அதற்குரிய வகையிலான பொறிமுறையே பொதுப் போக்குவரத்துச் சேவை தொடர்பிலும் தேவை என்பதை அவதானத்தில் கொள்ள வேண்டும்

அதைவிடுத்து தங்கத்தால் தானா வீதி அமைத்தீர்கள்? என ஒரு காலத்தில் கேள்வி எழுப்பிக் கொண்டிருந்துவிட்டு, இன்று அதைவிட அதிக செலவில் அதே வீதிகளை அமைத்துக் கொண்டும், ‘தங்கப் பாதை’ என திட்டங்கள் கொண்டுவரப்பட்டாலும் பொது மக்களுக்கான பொதுப் போக்குவரத்துச் சேவையை ஒரு போதும் கட்டியெழுப்ப முடியாது என்பதை நினைவில் கொள்ள வேண்டும்

உற்பத்தி வரி தொடர்பில் கூறுகின்றபோது, சீனி உள்ளடக்கப்பட்ட குளிர்பானங்களின் வரி அதிகரிப்பு தொடர்பில் அண்மையில் கதைக்கப்பட்டது. இதற்கு முன்னரும் இத்தகைய வரி விதிப்புகள் மேற்கொள்ளப்பட்டன. இவ்வாறு வரிகளை அதிகரிப்பதால் குளிர்பானங்களில் சீனியின் அளவு குறைக்கப்படும் என எண்ணினால் அது தவறான எண்ணமாகும் என்பதையே நாம் கடந்த காலங்களில் கண்டிருந்தோம். சீனியின் அளவைக் குறைக்காமல், அந்த குளிர்பானத்தின் விலையே அதிகரிக்கப்படும் என்பதுதான் யதார்தமான நடைமுறையாக இருக்கின்றது.

இவ்வாறு ‘பிள்ளையார் பிடிக்கப் போய் குரங்கான’ கதைகள் பல இந்த நாட்டில் நடந்தேறி வருகின்றன. அவ்வாறின்றி, அனைத்து விடயங்களிலும் நிலைபேறு என்பது தவிர்க்கப்பட்டு வருவதானது, அனைத்து முயற்சிகளுக்குமான தோல்வியினையும், மக்களுக்கான பாதிப்புகளையுமே அதிகமாக இந்த நாட்டில் ஏற்படுத்திக் கொண்டிருக்கின்றது என்பதை சுட்டிக்காட்டுகிறேன்.


செயலாளர் நாயகம் டக்ளஸ் தேவானந்தா 20 மே 2012அன்று நாடாளுமன்றில் உரையாற்றிய உரையின் முழுவடிவம்
வன விலங்குகளைப் பாதுகாக்க செயற்றிறன்மிக்க நடவடிக்கை தேவை! -டக்ளஸ் தேவானந்தா வலியுறுத்து!
நாட்டு நலன்களுக்கு இழப்புகள் ஏற்படாத வகையில் தேசிய பொறிமுறை ஒன்று உருவாக்கப்படுவது அவசியமாகும் - கோப...
பாதசாரி கடவைகளில் இடம்பெறும் விபத்தக்களுக்கு கைத்தொலைப்பேசி பாவனையும் முக்கிய காரணமாகின்றது - டக்ளஸ்...
அரசியலமைப்புப் பேரவையின் அமைப்பை மீள் பரிசீலித்தல் வேண்டும் - நாடாளுமன்றில் டக்ளஸ் எம்பி சுட்டிக்காட...