ஐ.பி.எல்.தொடர்: முதல் தகுதி சுற்றில் மோதும் பெங்களூரு-குஜராத்!
Tuesday, May 24th, 2016
ஐ.பி.எல்.கிரிக்கெட்டில் இறுதிப்போட்டிக்கான முதலாவது தகுதி சுற்றில் பெங்களூரு-குஜராத் அணிகள் இன்று பலப்பரீட்சை நடத்துகின்றன.
ஒன்பதாவது ஐ.பி.எல். தொடரில், லீக் சுற்று ஆட்டங்கள் நிறைவடைந்துள்ளன. இதன் முடிவில் முதல் 4 இடங்களை பிடித்த குஜராத் (18 புள்ளி), பெங்களூரு (16 புள்ளி), ஐதராபாத் (16 புள்ளி), கொல்கத்தா (16 புள்ளி) ஆகிய அணிகள் பிளே-ஆப் சுற்றுக்கு முன்னேறியுள்ளன.
நடப்பு சாம்பியன்மும்பை இந்தியன்ஸ் (14 புள்ளி), டெல்லி டேர்டெவில்ஸ் (14 புள்ளி), புனே சூப்பர் ஜெயன்ட்ஸ்(10 புள்ளி), கிங்ஸ் லெவன் பஞ்சாப் (8 புள்ளி) அணிகள் அடுத்த சுற்று வாய்ப்பை பறிகொடுத்து வெளியேறின.
இந்த நிலையில் பெங்களூருவில் இன்று நடக்கும் இறுதிப்போட்டிக்கான முதலாவது தகுதி சுற்றில், புள்ளி பட்டியலில் முதல் இரு இடங்களை பிடித்த குஜராத் லயன்சும், பெங்களூரு ராயல் சேலஞ்சர்சும் மோதுகின்றன.
தொடக்கத்தில் சறுக்கிய விராட் கோஹ்லி தலைமையிலான பெங்களூரு அணி முதல் 7 ஆட்டங்களில்2-ல் மட்டுமே வெற்றி பெற்றிருந்தது.
அதன் பிறகு விசுவரூபம் எடுத்த அந்த அணி அடுத்த 7 ஆட்டங்களில் 6-ல் வெற்றி கண்டதுடன், அடுத்த சுற்று வாய்ப்பையும்உறுதி செய்தது. இதுவரை 216 பவுண்டரிகளும், 122 சிக்சர்களும் அந்த அணி அடித்து நொறுக்கியுள்ளது.
அணித்தலைவர் விராட் கோஹ்லி, டிவில்லியர்ஸ், கிறிஸ் கெய்ல், லோகேஷ் ராகுல், ஷேன் வாட்சன் உள்ளிட்டோர் பெங்களூரு அணியின் முதுகெலும்பாக உள்ளனர்.
குறிப்பாக உச்சக்கட்டபார்மில் உள்ள விராட் கோஹ்லி 4 சதம், 6 அரைசதம் உள்பட 919 ஓட்டங்கள் குவித்து பிரமிக்க வைத்துள்ளார்.
இன்றைய ஆட்டத்தின் மூலம் அவர் ஆயிரம் ஓட்டங்களை கடந்து புதிய வரலாறு படைத்தாலும் ஆச்சரியப்படுவதற்கு இல்லை.
இதே போல் ஊதா நிற தொப்பியை தன்வசப்படுத்தியிருக்கும் சுழற்பந்து வீச்சாளர் யுஸ்வேந்திர சாஹலும் (19 விக்கெட்) பெங்களூரு அணியில் கவனிக்கத்தக்க வீரராக இருக்கிறார்.
இப்படி எல்லா வகையிலும் உயரிய நிலையை அடைந்திருக்கும் பெங்களூரு அணி, சொந்த ஊரில் அசத்தி 3-வது முறையாக இறுதிப்போட்டிக்கு முன்னேறுவதில் தீவிரமாக இருக்கிறது.
அதே சமயம் பெங்களூருக்கு நிகராக சரிசம பலத்துடன் திகழும் அணிகளில் குஜராத் லயன்சும் ஒன்று. கேப்டன் சுரேஷ் ரெய்னா (3 அரைசதத்துடன்397 ரன்), பிரன்டன் மெக்கல்லம்(321 ரன்), ஆரோன் பிஞ்ச் (339 ரன்), வெய்ன் சுமித் (250 ரன் மற்றும் 7 விக்கெட்), வெய்ன் பிராவோ, தினேஷ் கார்த்திக் என்று குஜராத் அணியிலும் அதிரடி ஆட்டக்காரர்களின் பட்டியல் நீளுகிறது.
இந்த ஐ.பி.எல். தொடரில் அறிமுக அணியாக நுழைந்த குஜராத் லயன்ஸ் பெரிய அளவில் இடையூறு இன்றி பிளே-ஆப் சுற்றுக்குள் நுழைந்துள்ளது. அதே உத்வேகத்தை இன்றைய ஆட்டத்திலும் தொடர அந்த அணி முயற்சிகள் மேற்கொள்ளும்.
மொத்தத்தில் இரு வலுவான அணிகள் கோதாவில் இறங்குவதால், ஆட்டத்தில் பரபரப்புக்கு பஞ்சமிருக்காது என எதிர்பார்க்கப்படுகிறது.
அதுவும் ஆட்டம் நடக்கும் பெங்களூரு சின்னசாமி மைதானம் முழுமையாக துடுப்பாட்டத்திற்கு சாதகமானது. ஏற்கனவே இந்த தொடரில் இவ்விரு அணிகளும் சந்தித்த 2 லீக் ஆட்டங்களில் தலா ஒன்று வீதம் வெற்றி பெற்றுள்ளன.
இந்த ஆட்டத்தில் வெற்றி பெறும் அணி நேரடியாக இறுதிப்போட்டிக்கு தகுதி பெறும். வெற்றி வாய்ப்பை இழக்கும் அணிக்கு இன்னொரு வாய்ப்பு வழங்கப்படும். அதாவது வெளியேற்றுதல் சுற்றில் வெற்றி காணும் அணியுடன் 2-வது தகுதி சுற்றில் விளையாடும்.
Related posts:
|
|
|
