அனைத்து விமான நிலையங்களும் மீளத் திறக்கப்பட்டன – கட்டாரில் இருந்து முதல் விமானம் இலங்கையை வந்தடைந்தது!

Tuesday, June 1st, 2021

இலங்கையில் உள்ள அனைத்து விமான நிலையங்களும் இன்று செவ்வாய்க்கிழமை காலைமுதல் மீளத் திறக்கப்பட்டுள்ளன.

பயணிகளின் வருகைக்காக விமான நிலையங்கள் மீண்டும் திறக்கப்பட்டதைத் தொடர்ந்து கட்டார் நாட்டைச் சேர்ந்த இரண்டு விமானங்கள் இன்று கட்டுநாயக்க விமானநிலையத்தில் தரையிறங்கியுள்ளன.

அதன்படி, அதிகாலை 2.15 மணிக்கு 53 பேருடன் முதல் பயணிகள் விமானம் டோஹாவில் இருந்து நாட்டை வந்தடைந்துள்ளது.

மே 21 ஆம் திகதிக்குப் பின்னர் நாட்டுக்கு வந்த முதல் பயணிகள் விமானத்தில் இருந்தவர்களில் பலர் வெளிநாட்டு பயணிகள் என்றும் விமான நிலைய தகவல்கள் தெரிவிக்கின்றன.

இதற்கிடையில், 116 பேருடன் ஸ்ரீலங்கன் ஏர்லைன்ஸ் யுஎல் 218 விமானம் அதிகாலை 4.05 மணிக்கு விமான நிலையத்தில் தரையிறங்கியுள்ளது.

விமான நிலையங்கள் திறக்கப்பட்டுள்ள போதிலும் ஒரு விமானத்தில், 75 பேர் வரையில் மாத்திரமே பயணிக்க முடியும் என விமான சேவைகள் இராஜாங்க அமைச்சர் டி.வி.சானக்க தெரிவித்துள்ளார்.

மேலும் இந்திய மற்றும் வியட்நாம் முதலான நாடுகளில் இருந்து வரும் பயணிகள், நாட்டுக்குள் பிரவேசிப்பது தற்காலிகமாக தடைசெய்யப்பட்டுள்ளது.

அந்த நாடுகளில் பரவும் கொரோனா வைரஸ் திரிபு நிலைமையைக் கருத்திற்கொண்டு இந்தத் தீர்மானம் மேற்கொள்ளப்பட்டுள்ளது.

கொரோனா பரவல் காரணமாக, கடந்த மாதம் 21ஆம் திகதி நள்ளிரவுமுதல் நேற்று நள்ளிரவு வரை வெளிநாட்டிலிருந்து பயணிகள் இலங்கைக்குள் பிரவேசிப்பதற்கு தற்காலிகமாக தடை விதிக்கப்பட்டமை குறிப்பிடத்தக்கது.

Related posts:

சங்கானை பட்டின சபையின் வளர்ச்சிக்கு அயாராது உழைத்தவர்களில் அமரர் சண்முகரத்தினம் - அனுதாப செய்தியில் ...
மாணவர்கள் தேசிய அடையாள அட்டைக்கு மார்ச் 31 ற்கு முன்னர் விண்ணப்பிக்கவும் - ஆட்பதிவு தகவல் ஆணையாளர்!
இலங்கை - பாகிஸ்தான் வர்த்தக உடன்படிக்கையை முழுமையாகப் பயன்படுத்திக்கொள்ள விசேட கலந்துரையாடல் - பாகிஸ...