நிவாரணங்கள், நட்டஈடுகள் என்பன உரிய காலகட்டத்திற்குள் வழங்கப்பட வேண்டும்!

Friday, September 15th, 2017
இயற்கை அனர்த்தங்கள் காரணமாக ஏற்படுகின்ற பாதிப்புகளுக்கான நிவாரண உதவிகள் மற்றும் நட்டஈடுகள் என்பன பாதிப்புற்ற மக்களுக்கு உரிய காலகட்டத்திற்குள் வழங்கப்படாதவிடத்து, அம் மக்கள் மீண்டுமொரு இயற்கை அனர்த்தத்திற்கு உட்படுகின்ற நிலையில் பாரிய பாதிப்புகளுக்கு உட்பட்டு வருகின்ற நிலை எமது நாட்டில் தொடர்வதாக நாடாளுமன்ற உறுப்பினர் டக்ளஸ் தேவானந்தா அவர்கள் தெரிவித்துள்ளார்.
இவ்விடயம் தொடர்பில் மேலும் தெரிவித்துள்ள அவர், அண்மைக் காலமாக எமது நாட்டில் மழை, வெள்ளம், கடும் வரட்சி, மீண்டும் மழை, வெள்ளமென தொடர் கால நிலை மாற்றங்களால் வாழ்வாதாரங்கள் இழக்கப்படுகின்ற நிலையில் எமது மக்கள் தொடர்ந்தும் பாதிக்கப்பட்டு வருகின்றனர். இவ்வாறு பாதிக்கப்படுகின்ற மக்களுக்கு நிவாரணங்கள் வழங்கப்படுவதாக அரச தரப்பில் கூறப்படுகின்ற போதிலும், அந்த நிவாரண உதவிகள் பாதிக்கப்பட்ட அனைத்து மக்களுக்கும் சென்றடையாத நிலைமைகளையும், அவை போதியளவுகளில் இல்லாத நிலைமைகளையும், காலம் தாழ்த்தி கிடைக்கின்ற நிலைமைகளையும் காணக்கூடியதாகவுள்ளது.
நட்ட ஈடுகள் வழங்கப்படுவதாக புள்ளிவிபரங்கள் மற்றும் தொகை மதிப்பீடுகள் முன்வைக்கப்படுகின்ற போதிலும், அவை உரிய காலத்திற்குள் வழங்கப்டாத நிலைமைகளையும் காணக்கூடியதாகவுள்ளது. அந்த வகையில், கடந்த வரட்சி காலத்தின்போது பயிர்ச் செய்கைகள் அழிவடைந்துள்ள காரணத்தினால் பாதிக்கப்பட்டுள்ள விவசாய மக்களுக்கு இதுவரையில் குறிப்பிட்ட நட்டஈடுகள் வழங்கப்படவில்லை எனத் தெரிய வருகின்றது.
வெள்ளம் மற்றும் மண்சரிவுகள் காரணமாக வீடுகளை இழந்துள்ள  பல குடும்பங்கள் பல வருடங்களாகியும் வீடுகளுக்காகப் போராடி வருகின்றனர். சாலாவ இராணுவக் களஞ்சிய வெடிப்பு காரணமாகப் பாதிக்கப்பட்ட மக்கள் தங்களுக்கான நட்டஈடுகளைக் கோரி இன்னமும் போராட்டங்களில் ஈடுபட்டு வருகின்றனர்.
எனவே, இத்தகைய அனர்த்தங்கள் காரணமாகப் பாதிக்கப்பட்டுள்ள மக்களுக்கு உரிய தீர்வுகள் விரைந்து எட்டப்பட வேண்டியது அவசியமாகும் என்பதுடன், எதிர்காலத்தில் இத்தகைய அனர்த்தங்க்ள காரணமாகப் பாதிக்கப்படுகின்ற மக்களுக்கு உரிய காலகட்டத்திற்குள் நிவாரணங்கள் மற்றும் இழப்பீடுகளை வழங்குவதற்கு ஒரு நெறிமுறை உருவாக்கப்படுவது அவசியமாகும் என நாடாளுமன்ற உறுப்பினர் டக்ளஸ் தேவானந்தா அவர்கள் தெரிவித்துள்ளமை குறிப்பிடத்தக்கது.

Related posts:

தொழில்வாய்ப்பு கேட்பதால் இன உரிமையை அடகு வைக்க வேண்டி வரும் என சுயலாப தமிழ் அரசியல் தலைமைகள் போல் கூ...
மாணவக் கண்மணிகளின் எதிர்காலம் சிறப்புற அமைய வாழ்த்துகின்றேன் - சித்தியெய்திய மாணவர்களுக்கான  வாழ்த்த...
தமிழ் மக்கள் தவறாக வழிநடத்தப்படுவதை நான் ஒருபோதும் விரும்பியது கிடையாது - அமைச்சர் டக்ளஸ் தேவானந்தா...

டக்ளஸ் தேவானந்தா தலைமையிலான குழுவினால் பாடசாலை இந்து சமய பாடநூல்களில் நிலவும் குறைபாடுகள் எடுத்துரைப...
சந்தர்ப்பங்களை ஆக்கபூர்வமானதாக உருவாக்குவதே எமது நோக்கம் - கிளிநொச்சியில் செயலாளர் நாயகம் டக்ளஸ் தேவ...
டக்ளஸ் தேவானந்தா அவர்களது முயற்சியால் மீண்டும் வவுனியா பழைய பேருந்து நிலையத்திற்கு செல்லும் பேருந்து...